މޯލްޑިވްސް ކަސްޓަމްސް ސާވިސަސްގެ ކޮމިޝަނަރު ޖެނެރަލް، އަބްދުﷲ ޝަރީފު 28 އަހަރަށްފަހު ކަސްޓަމްސްގެ ވަޒީފާއިން ރިޓަޔާ ކުރައްވައިފި އެވެ.
އެކްސްގައި ކަސްޓަމްސްއިން ކުރި ޕޯސްޓެއްގައި ބުނީ ޝަރީފުގެ ސީޖީކަމުގެ ދަށުން ކަސްޓަމްސްއަށް ބޮޑު ކުރިއެރިމެއް ލިބިފައިވާ ކަމަށެވެ.
"2020 ވަނަ އަހަރުން ފެށިގެން ސީޖީގެ ހައިސިއްޔަތުން، ޕްރޮސީޖާތައް އޮޓޮމޭޓް ކުރުމާއި، ބޯޑަރު ސެކިއުރިޓީ ވަރުގަދަކުރުމާއި، އެމްސީއެސްގައި އިންޓެގުރިޓީ ޗެމްޕިއަން ކުރުމަށް އޭނާ އިސްކޮށް އުޅުއްވި، ފުރިހަމަ ރިޓަޔަމަންޓަކަށް އެދެން،" ކަސްޓަމްސްގެ ޕޯސްޓުގައި ބުނެފައިވެ އެވެ.
ކަސްޓަމްސްގެ ކޮމިޝަނަރު ޖެނެރަލްގެ މަގާމަށް އަބްދުﷲ ޝަރީފް އައްޔަން ކުރީ މީގެ ތިން އަހަރު ކުރިން އެ މަގާމުގައި ހުންނެވި ބޭފުޅާ އަވަހާރަވުމުންނެވެ. އޭރު ޝަރީފު ފުރުއްވަމުން ގެންދެވީ ކަސްޓަމްސްގެ ޑެޕިއުޓީ ކޮމިޝަނަރު ކަމުގެ މަގާމުގަ އެވެ.
އަބްދުﷲ ޝަރީފްއަކީ ކަސްޓަމްސްގެ ތެރޭގައި އެކި މަގާމުތައް ފުރުއްވާފައިވާ ބޭފުޅެކެވެ. އަދި ޝަރީފްއަކީ ކަސްޓަމްސްގެ ތެރެއިން ކުރި ހޯއްދަވަމުން ގޮސް ކޮމިޝަނަރާ ހަމައަށް އައި ފުރަތަމަ ކޮމިޝަނަރު ވެސްމެ އެވެ. އޭގެ ކުރިން އެ މަގާމަށް މީހުން އައްޔަން ކުރަމުންދިޔައީ ސިޔާސީ ގޮތުންނެވެ.
އަބްދުﷲ ޝަރީފް މަގާމުން މިއަދު ރިޓަޔާ ކުރެއްވިއިރު، އެނާ ކަސްޓަމްސްއަށް ކޮށްދެއްވި ހިދުމަތުގެ އަގު ވަޒަންކޮށް މި އަހަރު ވަނީ ހަނދާނީ ލިޔުމެއް ވެސް ޝަރީފްއަށް އަރުވައިފަ އެވެ.
