އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި ވެރިކަމާ ހަވާލުވާ ޕީޕީއެމް/ޕީއެންސީ ކޯލިޝަނުގެ ފަރާތުން ވާދަކުރާ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ އަންނަ ޖެނުއަރީ މަހު ބާއްވާނެކަން އެ ކޯލިޝަނުން އިއުލާނުކޮށްފި އެވެ.
މިރޭ އެ ކޯލިޝަނުން ހާމަކުރި ގޮތުގައި ޕްރައިމަރީ އޮންނާނީ ޖެނުއަރީ 20, 2024 ގަ އެވެ. އަދި, އެ ކޯލިޝަނުގެ ޓިކެޓަށް ޝައުގުވެރިވާ ޕީޕީއެމް އަދި ޕީއެންސީގެ މެމްބަރުން އެކަމަށް އެދި ހުށަހެޅުމުގެ ފުރުސަތު ޑިސެމްބަރު 20 އިން 31 އަށް ހުޅުވާލާނެ ކަމަށް ވެސް އެ ކޯލިޝަނުން ހާމަކުރި އެވެ.
"ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ޕީޕީއެމް ޕީއެންސީ އިން ވާދަ ކުރުމަށް ކެންޑިޑޭޓުން ނެރޭނީ ދެ ޕާޓީ އެކުގައި އެއް ކޯލިޝަނަކުން," އެ ޕާޓީން ނެރުނު ބަޔާނެއްގައި ބުނެފައިވެ އެވެ.
ދެ ޕާޓީ އެކުގައި މަޖިލިސް އިންތިހާބަށް ނުކުންނާނެކަން ހާމަކޮށްފައި މިވަނީ ދެ ޕާޓީގެ މެދުގައި ވާދަވެރިކަން ބޮޑުވެ ލީޑާޝިޕްގައި ނުތަނަވަސްކަން އުފެދިފައިވާ ދަނޑިވަޅެއްގަ އެވެ. އަންނަ ދައުރުގައި ރާއްޖޭގެ ވެރިކަން ކުރާނީ ކޯލިޝަނުގެ މައިނޯރިޓީ ޕާޓީއެއްގެ ގޮތުގައި އޮތް ޕީއެންސީގެ ޓިކެޓުގައި ވާދަކުރެއްވި ޑރ. މުހައްމަދު މުއިއްޒު އެވެ.
ކޯލިޝަނުގެ މައި ޕާޓީއެއްގެ ގޮތުގައި އޮތް ޕީޕީއެމް ލީޑު ކުރައްވަނީ މިވަގުތު ހުކުމެއްގައި ހުންނެވި ކުރީގެ ރައީސް އަބްދުالله ޔާމީނެވެ. އެމަނިކުފާނުގެ ބަންދަށް ލުއިތަކެއް ދީފައިވާއިރު ސަޕޯޓަރުންނާ އެންމެ ފުރަތަމަ ބައްދަލުކުރެއްވި ރޭ ވެސް ވަނީ "ޕާޓީގެ އެއްވެސް މެމްބަރަކު އެހެން ޕާޓީއަކަށް ނުވަތަ ޕީއެންސީއަށް ފޯމުފުރަން ނުޖެހޭ" ކަމަށް ވިދާޅުވެފަ އެވެ. އެމަނިކުފާނު ވިދާޅުވާ ގޮތުން "އެއީ އެއް ފިކުރެއްގެ ދެ ޕާޓީ" އެވެ.
ޔާމީން ވިދާޅުވި އަނެއް ވާހަކައަކީ ކުރިއަށް މިއޮތް ފަސް އަހަރަކީ ހަމަޖެހިގެން ތިބެންވީ ފަސް އަހަރު ނޫން ކަމަށާއި މިހާރުން ފެށިގެން ޕާޓީ ވަރުގަދަ ކުރުމަށް މަސައްކަތް ފަށަން ޖެހޭ ކަމަށެވެ.
ޕީއެންސީން ވެސް މިހާރު ދަނީ ރާއްޖޭގެ އެކި ކަންކޮޅުތަކުގައި އެ ޕާޓީއަށް މެމްބަރުން އިތުރުކުރުމުގެ މަސައްކަތް ކުރަމުންނެވެ. އެހެންކަމުން, ޖެނުއަރީގައި އޮންނަ ޕްރައިމަރީގައި ދެ ޕާޓީގެ ވާދަވެރިކަން ފެނިގެންދާނެ ކަމަށް ބެލެވެ އެވެ.
