މި ދުވަސްވަރު ދައުލަތުގެ ބައެއް އިދާރާތަކުންނާއި ސަރުކާރު އަދި ސަރުކާރު ހިއްސާވާ ކުންފުނިތަކުން ކުރިއަށްގެންދާ ކަންތަކުގެ ތެރެއިން ހުއްޓުވަނީ ދައުލަތަށް އިއާދަނުކުރެވޭ ގެއްލުން ލިބޭނެ ކަންކަން ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.
ސަރުކާރު އިދާރާތަކާއި ކުންފުނިތަކުން ކުރާ ބައެއް ކަންކަން ހުއްޓުވާ ސަބަބު ތަފްސީލުކޮށްދީ އޭސީސީން ބަޔާނެއް ނެރެފައިވާއިރު, އެ ކޮމިޝަނުން ވަނީ ހުޅުމާލޭގެ ކަންކަން ބަލަހައްޓާ އާބަންކޯ ކުންފުންޏާ ގުޅޭ ކޮރަޕްޝަންގެ ތަހުގީގަކާ ގުޅިގެން އެ ކުންފުނިން ފަސް ކަމެއް ކުރުން ހުއްޓާލުމަށް އަންގާފަ އެވެ.
އާބަންކޯއިން ކުރުން މަޑުޖައްސާލުމަށް އެންގި ކަންކަން:
- ބޭރުގެ ފަރާތްތަކަށް ހުޅުމާލެއިން ބިން ދިނުމާ ގުޅޭ ކަންކަން.
- އީއޯއައި ހުށަހަޅައިގެން ކުރިއަށް ގެންދިއުމަށް ރާވާފައިވާ ކަންކަން.
- ދިގު މުއްދަތަކަށް ބިން ކުއްޔަށް ދިނުމާއި ބިން ވިއްކުމާ ގުޅޭ މުއާމަލާތްތައް.
- ޖޮއިންޓު ވެންޗާ އުސޫލުން ކުރިއަށް ގެންދާ ކަންކަން.
- މަޝްރޫއުތަކާއި ގުޅޭ އެއްބަސްވުންތަކުގައި ސޮއިކުރުން.
އޭސީސީން ނެރުނު ބަޔާނުގައި ބުނީ މަޝްރޫއުތައް ހުއްޓުވަނީ އެކަންކަމާ ގުޅިގެން ހުށަހަޅާ މައްސަލަތައް ތަހުގީގު ކުރުމަށްޓަކައި ކަމަށެވެ. އަދި އެފަދަ ކަންކަން ހުއްޓުވަނީ ހުށަހަޅާ ތުހުމަތުތަކަށް ބަލާއިރު އެކަންކަން ނުހުއްޓުވައިފިނަމަ އެކަންކަމުގެ ސަބަބުން ދައުލަތާއި ރައްޔިތުންނަށް އިއާދަ ނުކުރެވޭފަދަ ގެއްލިން ލިބިދާނެ ކަމުގެ އިހުތިމާލު އޮންނާތީ ކަމަށް ވެސް އެ ކޮމިޝަނުން ބުނެ އެވެ.
އެ ކޮމިޝަނުން ބުނީ ވަގުތީ ގޮތުން މަޝްރޫއުތައް މަޑުޖައްސާލަން އެންގި ނަމަވެސް, ރައްޔިތުންނަށް ދޭ އަސާސީ ހިދުމަތެއް ނުވަތަ އިދާރާއެއްގެ އިދާރީ ހިންގުން ފަދަ އެއްވެސް ކަމެއް ހުއްޓާލުމަށް އަންގާފައި ނުވާނެ ކަމަށެވެ.
އޭސީސީން ބުނީ މިގޮތަށް އަންގާ އެންގުންތަކަކީ ވަގުތީ ގޮތުން އަންގާ އެންގުންތަކެއް ކަމަށާއި, މައްސަލަތަކާ ގުޅިގެން ބަލަންޖެހޭ ކަންކަން ބެލުމަށްފަހު އެފަދަ އެންގުމަކަށް ބަދަލު އައިސްފިނަމަ އެކަން ރައްދުވާ ފަރާތަކަށް އަންގާނެ ކަމަށެވެ. އަދި މަޑުޖައްސާލަން އަންގާފައިވާ މައްސަލަތަކުގެ ތަހުގީގު ވީހާވެސް އަވަހަކަށް ނިންމަން މަސައްކަތް ކުރާ ކަމަށް އޭސީސީން ބުނެ އެވެ.
