ރައީސް އިބްރާހިމް މުހައްމަދު ސޯލިހު ހުވާ ކުރެއްވި ރަސްމިއްޔާތަށް ހަރަދުވީ 17 މިލިއަން ރުފިޔާ ކަމަށް އިންތިހާބީ ރައީސް ޑރ. މުހައްމަދު މުއިއްޒުގެ އިންތިގާލީ ތަރުޖަމާނު މުހައްމަދު ފިރުޒުލު ވިދާޅުވުމުން އެކަން މަޖިލިސް އިދާރާއިން ދޮގުކޮށްފި އެވެ.
މަޖިލީހުގެ ޑިރެކްޓާ އޮފް ކޮމިއުނިކޭޝަން ހަސަން ޒިޔާއު "އަދަދު" އަށް ވިދާޅުވީ ރައީސް ސޯލިހު ހުވާކުރެއްވުމަށް 17 ނޮވެމްބަރު، 2018 ގައި ބޭއްވި ރަސްމިއްޔާތަށް ހަރަދުވީ 10 މިލިއަން ރުފިޔާ ކަމަށެވެ.
ރައީސް ހުވާ ކުރެއްވި ރަސްމިއްޔާތު ބޭއްވީ ގަލޮޅު ދަނޑުގަ އެވެ. އެ ރަސްމިއްޔާތު ގެ ހުރިހާ ކަމެއް ކުރުމަށް މަޖިލިސް އިދާރާއިން ހަވާލުކުރީ މި އަހަރުގެ ރަސްމިއްޔާތުވެސް ހަވާލުކޮށްފައިވާ ސިފައިންގެ ގެ ވެލްފެއާ ކޮމްޕެނީ (ސިވެކް) އާ ހަވާލުކޮށްފަ އެވެ.
ދެހާސް އަށާރައިގެ ރަސްމިއްޔާތަށް 17 މިލިއަން ހަރަދުވި ކަމަށް ފިރުޒުލް ވިދާޅުވީ އިންތިގާލީ އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގަ އެވެ. އެއަށްފަހު އިންތިގާލީ ތަރުޖަމާނުގެ މީޑިއާ ވަޓްސްއެޕް ގްރޫޕަށް ފޮނުއްވި މެސެޖެއްގައި ފިރުޒުލް ވިދާޅުވީ އެ އަދަދު ލިބުނީ މަޖިލީހުން ކަމަށް ވިދާޅުވީ އޮޅުމަކުން ކަމަށެވެ.
ނަމަވެސް އެ އަދަދު ރަނގަޅު ނޫން ކަމަށް ވިދާޅުވުމުގެ ބަދަލުގައި ލިޔުއްވީ އެ މައުލޫމާތު ލިބުނީ "ރަސްމިއްޔާތުގެ ތައްޔާރީތަކަށް އަޅުގަނޑުމެންގެ ފަރާތުން މަސައްކަތް ކުރައްވާ ޓީމުން އެއްކުރެއްވި މައުލޫމާތަކުން" ކަމަށެވެ.
އިންތިހާބީ ރައީސް ހުވާ ކުރައްވާ ރަސްމިއްޔާޔާތު ބޭއްވުމަށް ޖުމްހޫރީ މައިދާން ސަރަހައްދު ބަންދުކޮށް ތައްޔާރީތަކުގެ މަސައްކަތް ފަށައިފި މިހާރު ވަނީ ފަށާފަ އެވެ.
ޖުމްލަ 22.9 މިލިއަން ރުފިޔާގެ އަގަކަށް މި ރަސްމިއްޔާތުގެ މަސައްކަތް ހަވާލުކޮށްފައިވާ ސިވެކުން، އެ ސަރަހައްދު ޒީނަތްތެރިކުރުމާއި، ރަސްމިއްޔާތުގެ ކުރިއަށް ގެންދިއުން އަދި ކޭޓަރިންގެ ކަންކަންވެސް ހަމަޖައްސާނެ އެވެ.
