އިންތިހާބީ ރައީސް ޑރ. މުހައްމަދު މުއިއްޒު ނޮވެމްބަރު 17 ގައި ހުވާކުރެއްވުމަށް ޖުމްހުރީ މައިދާނުގައި ބާއްވާ ރަސްމިއްޔާތު، މޫސުން ތަން ނުދިނުމުގެ ސަބަބުން އެހެން ތަނަކަށް ބަދަލުކުރަން ޖެހިއްޖެ ނަމަ އެ ރަސްމިއްޔާތު ބާއްވާނީ ރައްޔިތުންގެ މަޖިލިސް ކުރާ ގޭގައި ކަމަށް މަޖިލިސް އިދާރާއިން ބުނެފި އެވެ.
މަޖިލީހުގެ ޑިރެކްޓާ އޮފް ކޮމިއުނިކޭޝަން ހަސަން ޒިޔާއު "އަދަދު" އަށް ވިދާޅުވީ ރަސްމިއްޔާތުގެ 'ޕްލޭން ބީ' އަކީ މަޖިލިސް ކުރާ ގެ ކަމަށެވެ. މީގެ ކުރިން އަޑު ފެތުރިފައި އޮތް ގޮތުން މޫސުން ގޯސްވެއްޖެ ހާލަތެއްގައި އެހެން ތަނަކަށް ބަދަލުކުރަން ޖެހޭނެތީ ސޯޝަލް ސެންޓަރު 'ޕްލޭން ބީ' ގެ ގޮތުން ތައްޔާރު ކުރާނެ ކަމަށެވެ. ނަމަވެސް މަޖިލީހުން ވަނީ އެކަން ދޮގުކޮށްފަ އެވެ.
އިންތިހާބީ ރައީސް ހުވާ ކުރައްވާ ރަސްމިއްޔާތަކީ ރައްޔިތުންގެ މަޖިލީހުގެ ޖަލްސާއެކެވެ. އެ ރަސްމިއްޔާތުގެ ކަންކަން ކުރިއަށް ގެންދާނީ މަޖިލީހުގެ އިދާރާއިންނެވެ. ޑރ. މުއިއްޒު ހުވާ ކުރެއްވުމުގެ ރަސްމިއްޔާތުގެ ހުރިހާ ކަމެއް ކުރުމަށް މަޖިލިސް އިދާރާއިން ވަނީ ސިފައިންގެ ގެ ވެލްފެއާ ކޮމްޕެނީ (ސިވެކް) އާ ހަވާލުކޮށްފަ އެވެ.
ރަސްމިއްޔާތުގެ ތައްޔާރީތައް މިހާރު ފަށާފައިވާއިރު ނޮވްމެބަރު 14 ގެ ކުރިން ހުރިހާ ތައްޔާރީތައް ނިމޭނެ ކަމަށް މަޖިލީހުން ބުނެ އެވެ. ޖުމްލަ 22.9 މިލިއަން ރުފިޔާގެ އަގަކަށް މި ރަސްމިއްޔާތުގެ މަސައްކަތް ހަވާލުކޮށްފައިވާ ސިވެކުން، އެ ސަރަހައްދު ޒީނަތްތެރިކުރުމާއި، ރަސްމިއްޔާތުގެ ކުރިއަށް ގެންދިއުން އަދި ކޭޓަރިންގެ ކަންކަންވެސް ހަމަޖައްސާނެ އެވެ.
އޭގެ އިތުރުން، ގައުމުތަކުގެ ވެރިންނާއި ޑިޕްލޮމެޓުން ހިމެނޭހެން 3،500 އެއްހާ ފަރާތަކަށް ރަސްމިއްޔާތުގެ ދައުވަތު ދިނުމަށް މަޖިލީހުގެ އިދާރާއިން މިހާރު ތައްޔާރުވަމުންދާ ކަމަށާއި މިއަދު އެ ލިސްޓު ފައިނަލް ވާނެ ކަމަށް ވެސް ޒިޔާއު ވިދާޅުވި އެވެ.
