ޕީޕީއެމް/ޕީއެންސީއަށް ވެރިކަން ލިބުނާ އެކު ތަހުގީގުކޮށް، އެކަންކަމުގައި ޒިންމާވާ މީހުންނަށް ފިޔަވަޅު އަޅަން އެދޭ ކަންތައްތަކުގެ ދިގު ލިސްޓެއް ކުރީގެ ރައީސް އަބްދުﷲ ޔާމީނު އަބްދުލް ގައްޔޫމު މިރޭ ދެއްވައިފި އެވެ.
ރިޝްވަތު ހިފުމާއި މަނީ ލޯންޑަރިންގެ ކުށުގައި ކްރިމިނަލް ކޯޓުން އިއްވި ހުކުމްތަންފީޒުކުރަން ޖަލުގައި ގިނަ ދުވަސްތަކެއް ހޭދަކުރެއްވުމަށް ފަހު ސިޔާސީ ޖަލްސާއެއްގައި ފުރަތަމަ ފަހަރަށް ވާހަކަފުޅު ދައްކަވަމުން ޔާމީނު ސިފަކުރެއްވި ގޮތުގައި މިހާރު ކުރަން އޮތް އެންމެ މުހިއްމު މަސައްކަތަކީ މައްސަލަތައް ބެލުމެވެ. ތަރައްގީގެ މަސައްކަތްތަކަކީ އެމަނިކުފާނު ވިދާޅުވި ގޮތުގައި ހިނގަހިނގައި ހުންނާނެ " ފަސޭހަ" ކަމެކެވެ.
ލިސްޓްގެ އެއްވަނައިގައި ޔާމީނު ހިމެނުއްވީ ޗާގޯސްއަކީ މޮރިޝަސްގެ ބައެއް ކަމަށް ބަލައިގެން ރާއްޖެއާ އެ ޖަޒީޒާ ތަކާ ދެމެެދު އޮތް ކަނޑުގެ ސަރަހައްދު ބައިކުރި މައްސަލަ އެެވެ. އެކަމުގެ ތެރޭގައި ރާއްޖޭގެ ކަނޑުން ބޮޑު ސަރަހައްދެއް ގެއްލުނުކަމަށް ވިދާޅުވެ ދައްކަވާ ވާހަކަ ތަކުރާރު ކުރެއްވި އެވެ.
ދެވަނަ އަށް އޮތީ ރާއްޖޭގައި އިންޑިއާ ސިފައިން ތިބޭ ކަމަށާއި އެކަމުގެ ސަބަބުން ރާއްޖޭގެ މިނިވަންކަމަށް ބުރޫ އަރާ ކަމަށް ވިދާޅުވެ ދައްކަވާ ވާހަކަފުޅެވެ.
"އިންޑިއާގެ އެންމެ ބޫޓުކިބައެއް ވެސް [އިންޑިއާ ސިފައިންގެ އެންމެ މީހެއް ވެސް] ރާއްޖޭގައި ހުންނަން ނުޖެހޭނެ" ކަމަށް ވިދާޅު އެ ވާހަކަ ނިންމަވައިލެއްވުމަށް ފަހު އެމަނިކުފާނު ވަޑައިގެންނެވީ 2018 ވަނަ އަހަރު، އެމަނިކުފާނުގެ ވެރިކަން ނިމުނު އިންތިހާބުގެ ވާހަކަ އަށެވެ.
"ރައްޔިތުންގެ ވޯޓަށް އަރައިގަތް ނުބަލަންޏާ ކޯއްޗެއް މިތާ ބަލަންވީ؟"
ޔާމީނު ވިދާޅުވީ މިހާރު ވެރިކަމުގައި އޮތް އެމްޑީޕީއަށް ތާއީދު އޮތް ވަރު ބެލުމަށް ޓަކައި "2018ގެ އިންތިހާބު ވަގަށް ނެގި ގޮތް" ބަލަން ޖެހޭ ކަމަށެެވެ. އެ އިންތިހާބުގެ ނަތީޖާ ގަބޫލުނުކުރައްވައި އެއީ ވަގަށް ނެގި އިންތިހާބެއްގެ ގޮތުގައި އެމަނިކުފާނު ފުރަތަ ތުހުމަތު ކުރައްވަމުން ގެންދެވި އެވެ. މިރޭ ވިދާޅުވީ އެ މައްސަލަ ބަލައިފި ނަމަ، މިހާރު ވެރިކަމުގައި (ސަރުކާރުގައި ތިބި މީހުންގެ) ތެރެއިން ސަލާމަތުން ތިބޭނީ ކިތައް މީހުންތޯ ސުވާލު އުފެދޭ ކަމަށެވެ.
"އެއް ގޮތަކަށް ވެސް ޒާތީވާކަށް ނޫން، މުއައްސަސާތަކުގެ ހައްގަށް އަރައިގަތް ގޮތް ބަލައިނުގަނެ ކޯއްޗެއް މި ތަނުގައި ބަލަން އޮންނާނީ، އީސީ ޝަރީފު އެ ކަމުގެ އިސްކޮށް ހުރި ކަމަށް ވެދާނެ، އެކަމަކު އޭނަ އެކަންޏެއް ނޫން ޝާމިލު ވަނީކީ ވެސް، 2018 ގެ ރިޔާސީ އިންތހާބު ވަގަށް ނެގި މައްސަލަ ބަލަން ޖެހޭނެ، ލާޒިމު ކަމެއް އެއީ، އެއީ ޒާތީވުމެއް ނޫން، ބަދަލު ހިފުމެއް ވެސް ނޫން،" ޔާމީން ވިދާޅުވި އެެެވެ.
އެމަނިކުފާނު ވިދާޅުވި ގޮތުން އެ އިންތިހާބާ ގުޅޭ ތުހުމަތު ކުރައްވަނީ އިލެކްޝަންސް ކޮމިޝަނުގެ ރައީސަކަށް އޭރު ހުންނެވި އަހުމަދު ޝަރީފު އެކަންޏަކަށް ނޫނެވެ. ވިދާޅުވީ ޝަރީފުގެ އިތުރުން އެ މައްސަލާގައި ދެން ޝާމިލުވާ އެންމެންގެ މައްސަލަ ބެލެން ވާނެ ކަަމަށެެވެ.
"އެހެންވީމާ މި މައްސަލަތައް ބަލާލައިފިއްޔާ މިތާކު ނުތިބޭނެ [ސިޔާސީ މީހުންނެެއް] މިހާރު ވެރިންގެ ތެރޭގައި ތިބި އެއްވެސް މީހަކު ނުތިބޭނެ،" އެމަނިކުފާނު ވިދާޅުވި އެެވެ.
ކަނޑުގެ ސަރަހައްދު ބައިކުރި މައްސަލައާއި އިންޑިއާ ސިފައިންގެ މައްސަލަ އަދި 2018 ގެ އިންތިހާބުގެ މައްސަލައިގެ އިތުރުން ވެސް ބަލަން އެދިވަޑައިގަންނަވާ އެތައް ކަމެއް ޔާމީނު ފާޅުކުރެއްވި އެެވެ.
