އެގާރަ އަހަރުގެ ޖަލު ހުކުމެއް ތަންފީޒުކުރަމުން ގެންދަވާ ކުރީގެ ރައީސް އަބްދުﷲ ޔާމީނު ގެއަށް ބަދަލުކޮށް، ޑޮކްޓަރަށް ދައްކަން ޖެހިއްޖެ ހާލަތެއްގައި އަމިއްލަފުޅަށް ވަޑައިގެންނެވޭ ގޮތަށް ބަންދަށް ލުއިދީފައި ވަނިކޮށް ޕީޕީއެމްގެ މައި އޮފީހަށް ވަޑައިގެންނެވީ ކަރެކްޝަނަށް އެންގެވުމަށް ފަހު ކަން އެނގިއްޖެ އެވެ.
ވ. އާރަށް މައްސަލާގައި ޔާމީނުގެ މައްޗަށް އުފުލާފައިވާ މަނީ ލޯންޑަރިންނާއި ރިޝްވަތުގެ ކުށް ސާބިތުވެއްޖެ ކަމަށް ދަށު ކޯޓުން ހުކުމްކުރީ ޑިސެމްބަރު 2022، ގަ އެވެ. އޭގެ ފަހުން އެމަނިކުފާނު ޖަލުގައި ހުންނެވުމަށް ފަހު ގޭބަންދަށް ބަދަލުކުރީ، ޕީޕީއެމް/ޕީއެންސީން ރިޔާސީ އިންތިހާބު ކާމިޔާބުކުރި ފަހުންނެވެ.
އޭގެ ފަހުން އެމަނިކުފާނު ޑޮކްޓަރަށް ދައްކަވަން ޖެހޭ ފަހަރުތަކުގައި ގެއިން ބޭރަށް ނުކުންނެވޭ ގޮތަށް ލުއިތަކެއް ދެއްވީ މިދިޔަ ހޮނިހިރު ދުވަހުގަ އެވެ. އޭގެ ފަހުން ރޭގެ ވަގުތެއްގައި އެމަނިކުފާނު ބޭރަށް ނުކުމެވަޑައިގަތް ވަގުތެއްގައި ވަނީ ޕީޕީއެމްގެ އޮފީހަށް ވަޑައިގެން ސަޕޯޓަރުންނާ ބައްދަލުކުރައްވައިފަ އެވެ.
ޔާމީން ސަޕޯޓަރުންނާ ބައްދަލުކުރެއްވީ ކަރެކްޝަންސްއަށް އެ ކަން އެންގުމަށް ފަހު ކަން، ޕީޕީއެމްގެ ބައެއް އިސް ބޭފުޅުން ވެސް ވަނީ "އަދަދު" ނޫހަށް ވިދާޅުވެފަ އެވެ.
މިކަމާ ގުޅޭ ގޮތުން "އަދަދު" ނޫހުން ސުވާލު ކުރުމުން ކަރެކްޝަންސްއިން ބުނީ އެމަނިކުފާނަށް ލުއިތައް ދެއްވީ، ކޮންމެހެން ބައްދަލުކުރެއްވުމަށް އެދިވަޑައިގަންނަވާ ފަރާތްތަކަށް އެ އިދާރާއާ ހިއްސާ ކުރެއްވުމަށް ފަހު ބައްދަލު ކުރެވޭ ގޮތަށް ކަމަށެވެ.
"ބޭސްފަރުވާ ކުރުމަށާއި ކަސްރަތުކޮށް އުޅުމަށް އިތުރު ލުއިތަކެއް ދެއްވުމަށް އެދިވަޑައިގެންފައިވާތީ އެ ފުރުސަތު ދީފައިވާނެ، އަދި ކޮންމެހެން ބައްދަލުކުރުމަށް އެދޭ ފަރާތްތަކަށް، މި ސާވިސްއާ ހިއްސާކުރުމަށް ފަހު ބައްދަލު ކުރުމުގެ ފުރުސަތެއް ވެސް ދީފައިވާނެ،" ކަރެކްޝަންސްގެ މީޑިއާ ޓީމުން ފޮނުވި މެސެޖުގައިވެ އެވެ.
މާފުށީ ޖަލުގައި ހުކުމް ތަންފީޒުކުރައްވަމުން ގެންދެވި ޔާމީން މިދިޔަ މަހުގެ އެކެއްގައި ޔާމީން ގެއަށް ބަދަލުކުރީ ޖަލުތަކާއި ޕެރޯލްގެ ގާނޫނުގެ 82 ވަނަ މާއްދާގެ ދަށުންނެވެ. އެ މާއްދާގައި ބަޔާންކޮށްފައި ވަނީ ސިއްހީ ނުރައްކަލެއްގެ ސަބަބުން ގައިދީއަކު ގެއަށް ބަދަލުކުރެވޭނެ ހާލަތްތަކެވެ.
ޔާމީން 11 އަހަރުގެ ހުކުމެއް ތަންފީޒުކުރައްވަމުން ގެންދަވަނީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ ތެރެއިން ވ. އާރަށް ކުއްޔަށް ދޫކުރުމުގެ ތެރެއިން އެމަނިކުފާނު 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި މައްސަލަ ސާބިތުވެގެންނެވެ.
އެ ހުކުމް ހައި ކޯޓުގައި އިސްތިއުނާފުކޮށްފައިވީ ނަމަވެސް، ފަނޑިޔާރުންގެ ޗުއްޓީތަކުގެ ސަބަބުން ދެމެދަކުން މައްސަލަ ލަސްވެގެން ގޮސްފައިވެ އެވެ.
އޭގެ އިތުރުން، ރ. ފުއްގިރި ކުއްޔަށް ދޫކުރުމުގެ ތެރެއިން ވެސް ރިޝްވަތު ނަންގަވައި އެ ފައިސާ ލޯންޑަ ކުރެއްވި ކަމުގެ ތުހުމަތުގައި ޔާމީނުގެ މައްޗަށް ރިޝްވަތާއި މަނީ ލޯންޑަރިންގެ ކުށުގެ ދައުވާ އުފުލާފައި ވެ އެވެ. އެ މައްސަލަ ވެސް އޮތީ ކްރިމިނަލް ކޯޓުގަ އެވެ.
އިންތިހާބީ ރައީސް ޑރ. މުހައްމަދު މުއިއްޒު ވަނީ ޔާމީނުގެ މައްޗަށް އުފުލާފައިވާ ދައުވާތައް އަނބުރާ ގެންދިއުމަށް ގޮވާލައްވައިފަ އެވެ. ޔާމީން ގޭބަންދަށް ބަދަލުކޮށްފައިވަނީ ވެސް، އެމަނިކުފާނު އިންތިހާބުވި ފަހުން ފުރަތަމަ ފަހަރަށް ރައީސް އިބްރާހިމް މުހައްމަދު ސޯލިހާ ބައްދަލުކުރައްވައި، ކުރެއްވި މަޝްވަރާތަކަށް ފަހު އެވެ.
