މާލެ-ހުޅުމާލެ ހައިވޭގައި "އެކްސެލެރޭޓިންގް ސަސްޓެއިންބަލް ޕްރައިވެޓް އިންވެސްޓްމަންޓް އިން ރިނިއުވަބަލް އެނާޖީ (އެސްޕަޔާ)" ޕްރޮޖެކްޓުގެ ދަށުން ހަރުކުރާ ސޯލާ ޕެނަލްތަކުގެ 95 ޕަސެންޓު މަސައްކަތް ނިމިފައިވާ ކަމަށާއި، އެހެން ތާކަށް ބަދަލުކުރާނަމަ އިތުރު ހަރަދެއް ކުރަންޖެހޭނެ ކަމަށް އެންވަޔަރަމެންޓް މިނިސްޓްރީން ބުނެފި އެވެ.
ސިނަމާލެ ބްރިޖުގެ ހައިވޭގައި ހަރުކޮށްފައިވާ ސޯލާ ޕެނަލްތައް އެ ތަނުން ނަގާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވަނީ މިދިޔަ ހޮނިހިރު ދުވަހު ވިދާޅުވެފަ އެވެ. އެމަނިކުފާނު ވިދާޅުވީ ޕެނަލްތަކުގެ ސަބަބުން ބްރިޖު ސަރަހައްދުން ފެންނަ ރީތި މަންޒަރު ވެސް ގެއްލިފައިވާ ކަމަށެވެ.
އެގޮތުން އިއާދަކުރަނިވި ހަކަތަ މުހިންމު ނަމަވެސް މިހާރު އެ މަސައްކަތް ގެންގޮސްފައިވާ ގޮތަކީ އެންމެ ރަނގަޅު ގޮތް ނޫން ކަމަށް މުއިއްޒު ވިދާޅުވި އެވެ. އިންތިހާބީ ރައީސްގެ ހައިސިއްޔަތުން އެމަނިކުފާނުގެ ވިސްނެވުމަކީ ޕެނަލްތައް އެ ތަނުން ނެގުމަށް ފަހު މީހުން ދިރިއުޅޭ އެހެން ރަށަކަށް ބަދަލު ކުރުމަށެވެ.
މިކަމާއި ގުޅިގެން "އަދަދު" ނޫހުން ސުވާލުކުރުމުން އެސްޕަޔާ މަޝްރޫއުގެ ކޮމިއުނިކޭޝަންސް ސްޕެޝަލިސްޓް އިފާދު ވަހީދު ވިދާޅުވީ އެއްބަސްވުމާއި އެއްގޮތަށް މިހާރު އެ މަސައްކަތުގެ ޖުމްލަ 95 ޕަސެންޓު މަސައްކަތް ނިމިފައިވާ ކަމަށެވެ. އަދި މިހާރު ކުރިއަށްދަނީ ސްޓެލްކޯގެ ގްރިޑަށް ގުޅުމަށް ކުރަންޖެހޭ ކަންކަން ކަމަށާއި ލޮކޭޝަން ބަދަލުކުރާނަމަ މާލީ ހިރާސްތަކެއް އަންނާނެކަން އިފާދު ފާހަގަކުރެއްވި އެވެ.
"ލޮކޭޝަން ބަދަލުކުރާނަމަ ފައިނޭންޝިއަލް އިމްޕްލިކޭޝަންސްތަކެއް އަންނާނެ. އަދި އެކަމަށް ހިނގާނެ ހަރަދެއް އަންދާޒާކުރަން އެނގޭނީ ރީލޮކޭޓްކުރަން އާ ސަރުކާރުން ބޭނުންވާ ސަރަހައްދުތަކުގެ ތަފްސީލު ލިބިގެން،" އިފާދު ވިދާޅުވި އެވެ.
އިފާދު ވިދާޅުވީ އެސްޕަޔާ މަޝްރޫއުގެ ދަށުން ހުޅުމާލޭ ލިންކް ރޯޑްގައި ގާއިމުކޮށްފައިވާ ސޯލާ ޕީވީ އެތަނުން ނަގައި އެހެން ލޮކޭޝަނަކަށް ބަދަލުކުރުމުގެ ވާހަކައެއް ޓްރާންސިޝަނަލް ކޮމިޓީގައި އިންތިހާބީ ރައީސްގެ ފަރާތުން މިނިސްޓްރީއާއި ހިއްސާކޮށްފައި ނުވާ ކަމަށެވެ.
އެގޮތުން ސޯލާ ޕެނަލްތައް އެހެން ތަނަކަށް ބަދަލުކުރާނަމަ، ސަރުކާރާއި ހަވާލުވެވަޑައިގަތުމަށް ފަހު، އިންތިހާބީ ރައީސް ޑރ. މުއިއްޒު އެ މަޝްރޫއުގެ ފަންނީ ޓީމްތަކައި އިންވެސްޓަރާއި އަދި ވޯލްޑް ބޭންކާއި އެކު މަޝްވަރާކުރައްވާނެ ކަމަށް ލަފާކުރެވޭކަމަށް އިފާދު ވިދާޅުވި އެވެ.
"އިންތިހާބީ ރައީސް ޕަބްލިކް އިވެންޓެއްގައި އެ ބަދަލު ގެންނަން ބޭނުންވާ ވަހަކަ ވިދާޅުވިޔަސް އެކަމުގެ ފަންނީ ތަފްސީލެއް މިނިސްޓްރީއަކަށް ހިއްސާކޮށްފައި ނުވޭ. އެހެންކަމުން ބެލެވެނީ އެ ބަދަލު ގެންނަވަން ނިންމަވައިފިނަމަ ސަރުކާރާއި ހަވާލުވެ މިނިސްޓްރީގެ މި މަޝްރޫއުގެ ފަންނީ ޓީމްތަކައި އިންވެސްޓަރާއި އަދި ވޯލްޑް ބޭންކާއި އެކު މަޝްވަރާކުރައްވާނެ ކަމަށް،" މަޝްރޫއުގެ އިތުރު ތަފްސީލު ދެއްވަމުން އިފާދު ފާހަގަކުރެއްވި އެވެ.
ވޯލްޑް ބޭންކުގެ އެހީގައި އެމްވަޔަރަމެންޓް މިނިސްޓްރީން ހިންގާ އެ މަޝްރޫ ކުރިއަށް ގެންދަނީ ތައިލެންޑުގެ "އެންސިސް ކޯ" ކުންފުނިންނެވެ. މި މަސައްކަތުގެ ޖުމްލަ އަގަކީ 11 މިލިއަން ޑޮލަރެވެ.
އެ މަޝްރޫއުގެ ދަށުން އުފައްދާ ކަރަންޓް ސްޓެލްކޯއަށް ވިއްކުމަށް ހަމަޖެހިފައިވާ ރޭޓަކީ ކަރަންޓް ޔުނިޓަކަށް 10.09 ޔޫއެސް ސެންޓެވެ. އެއީ ދިވެހި ރުފިޔާއިން ކަރަންޓް ޔުނިޓަކަށް އެއް ރުފިޔާ 68 ލާރި އެވެ. އެސްޕަޔާ ގެ ފުރަތަމަ ފިޔަވަހީގެ ދަށުން ހުޅުމާލޭގައި 1000 ހައުސިން ޔުނިޓްތަކުގައި ގާއިމްކޮށްފައިވާ 1.5 މެގަވޮޓްގެ ސޯލާ ޕީވީގެ ނިޒާމުން އުފައްދާ ކަރަންޓް ސްޓެލްކޯއަށް ވިއްކަމުން ދަނީ 21 ޔޫއެސް ސެންޓަށެވެ.
އެ މަޝްރޫއު ނިމުމުން އަހަރަކަށް އުފައްދާ 7.3 މިލިއަން ކަރަންޓް ޔުނިޓުން ދައުލަތުން ކަރަންޓް އުފެއްދުމަށްޓަކައި ތެލަށް ކުރާ ހޭދައިން ގާތްގަނޑަކަށް 15 އާއި 20 މިލިއަން ދިވެހި ރުފިޔާ ސަލާމަތްކުރެވޭނެ އެވެ.
