ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް އިއްވާފައިވާ ކުރީގެ ރައީސް އަބްދުﷲ ޔާމީން ޑޮކްޓަރަށް ދައްކަންޖެހިއްޖެ ހާލަތެއްގައި އަމިއްލަފުޅަށް ވަޑައިގެންނެވޭ ގޮތަށް ނިންމައި، އެމަނިކުފާނުގެ ބަންދަށް ސަރުކާރުން މިއަދު ލުއިތަކެއް ދީފި އެވެ.
މޯލްޑިވްސް ކަރެކްޝަނަލް ސާވިސްގެ މީޑިއާ އޮފިޝަލަކު ބުނީ "މެޑިކަލް ކަންކަމަށް، އެމްސީއެސް [ކަރެކްޝަންސް] އަށް އެންގުމަށްފަހު ބޭރަށް ދިޔުމަށް ލުއިތަކެއް [ޔާމީންއަށް] ދީފައިވޭ" ކަމަށެވެ.
އެހެންކަމުން، ކަރެކްޝަންސްގެ ބެލުމުގެ ދަށުން ނޫން ގޮތަކަށް ޑޮކްޓަރަށް ދައްކަން ވަޑައިގެންނެވުމުގެ ހުއްދަ ލިބިވަޑައިގެންނެވި ނަމަވެސް އިތުރު ކަމަކު އެމަނިކުފާނަށް ބޭރަށް ދިޔުމުގެ ހުއްދައެއް އަދިވެސް ނެތެވެ.
ޔާމީންގެ ބަންދަށް ސަރުކާރުން އަނެއްކާ ވެސް ލުއިތަކެއް ދީފައި މި ވަނީ، ނިމިދިޔަ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހު ނާކާމިޔާބުވި ފަހުން، އޮކްޓޯބަރު 1، ގައި ކުރީގެ ރައީސް ކ. މާފުށީ ޖަލުން ގެއަށް ބަދަލު ކުރުމަށްފަހެވެ.
ރައީސް ސޯލިހު ވިދާޅުވީ ރައީސް ޔާމީން ގެއަށް ބަދަލު ކުރީ އެއީ "މިވަގުތަށް އެންމެ މަސްލަހު ހުރި ގޮތް" ކަމަށްވާތީ ކަމަށެވެ. ނަމަވެސް ފަހުން ކަރެކްޝަންސް އިން ބުނީ އެމަނިކުފާނު ގެއަށް ބަދަލު ކުރީ ސިއްހީ ނުރައްކަލެއްގެ ސަބަބުން ގައިދީއަކު ގެއަށް ބަދަލު ކުރުމަށް ގާނޫނުން ހުއްދަ ދީފައިވާ މާއްދާއެއްގެ ދަށުން ކަމަށެވެ.
އިންތިހާބީ ރައީސް ޑރ. މުހައްމަދު މުއިއްޒު އިންތިހާބު ކާމިޔާބު ކުރެއްވި ރޭ، ޔާމީންގެ ދައުވާތައް އަނބުރާ ގެންގޮސް ވަގުތުން މިނިވަން ކުރުމަށް އެމަނިކުފާނުގެ ވަކީލުން ގޮވާލި އެވެ. ޔާމީން މިނިވަން ކުރުމަށް ގޮވާލައި، ސަޕޯޓަރުން މުޒާހަރާ ވެސް ކުރި އެވެ. އެކަމަކު، މުއިއްޒު އެދިވަޑައިގަތީ އެފަދަ މުޒާހަރާ ނުކުރުމަށާއި ކެތްތެރިވުމަށެވެ.
ޔާމީން 11 އަހަރުގެ ހުކުމެއް ތަންފީޒުކުރައްވަމުން ގެންދަވަނީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ ތެރެއިން ވ. އާރަށް ކުއްޔަށް ދޫކުރުމުގެ ތެރެއިން އެމަނިކުފާނު 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި މައްސަލަ ސާބިތުވެގެންނެވެ.
އޭގެ އިތުރުން، ރ. ފުއްގިރި ކުއްޔަށް ދޫކުރުމުގެ ތެރެއިން ވެސް ރިޝްވަތު ނަންގަވައި އެ ފައިސާ ލޯންޑަ ކުރެއްވި ކަމުގެ ތުހުމަތުގައި ޔާމީނުގެ މައްޗަށް ރިޝްވަތާއި މަނީ ލޯންޑަރިންގެ ކުށުގެ ދައުވާ އުފުލާފައި ވެ އެވެ. އެ މައްސަލަ އޮތީ ކްރިމިނަލް ކޯޓުގަ އެވެ.
