ޗައިނާ އާއި އިންޑިއާގެ ވާދަވެރިކަމާއި އެ ދެމެދަށް ރާއްޖެ ވަންނަން ބޭނުން ނުވާ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވީ އިއްޔެ، އެމެރިކާގެ ބްލޫމްބާގް ޓީވީއަށް ދެއްވި އިންޓަވިއުއެއްގަ އެވެ.
ރާއްޖޭގައި ހުންނަވައި މުއިއްޒު ބްލޫމްބާގް ޓީވީއަށް ދެއްވި އެ އިންޓަވިއުގައި މުއިއްޒު އަނެއްކާ ވެސް ވިދާޅުވީ އެމަނިކުފާނު ގެންގުޅުއްވާނީ "ޕްރޯ މޯލްޑިވްސް" ސިޔާސަތެއް ކަމަށެވެ.
މުއިއްޒު ވިދާޅުވީ، ރާއްޖެއަކީ އެއްވެސް ގައުމަކާ ޖެހިގެން އުޅޭވަރަށް ވުރެ ކުޑަ ގައުމެއް ކަމަށެވެ. ޗައިނާ އާއި އިންޑިއާގެ ކޯޅުމުގެ ތެރެއަށް ރާއްޖެ ވަނުމަކީ ވެސް ގައުމަށް މަސްލަހަތު އެންމެ ރަނގަޅު ގޮތް ނޫން ކަމަށެވެ.
"އަޅުގަނޑުމެން ބޭނުމެއް ނޫން ދޭދޭ ގައުމުތަކުގައި މެދުގައި އޮންނަ ސިޔާސީ ވާދަވެރިކަމުގައި ނޫން ނަމަ ބޮޑެތި ގައުމުތަކުގެ މެދުގައި އެ އޮންނަ ކަމެއްގައި ތާށިވާކަށް. އެފަދަ ކަމަކަށް އަޅުގަނޑުމެން މިއީ މާ ކުޑަ ގައުމެއް،" މުއިއްޒު ވިދާޅުވި އެވެ.
އެ އިންޓަވިއުގައި މުއިއްޒު ވަނީ ފަލަސްތީނާއެކު ރާއްޖެ އަބަދުވެސް ހުންނާނެކަމުގެ ޔަގީންކަން ދެއްވައިފަ އެވެ. އަދި ފަލަސްތީނުގެ މިނިވަން ދައުލަތެއް ހެދުމުގެ ހައްގު އެ ގައުމުގެ ރައްޔިތުންނަށް އޮންނަންޖެހޭނެ ކަމަށް ވެސް މުއިއްޒު ވިދާޅުވި އެވެ.
އޭގެ އިތުރުން، ހައްދުފަހަނައަޅައި ދިޔުމުގެ މައްސަލައާ ގުޅޭ ގޮތުން ވެސް މުއިއްޒުގެ އިންޓަވިއުގައި ވާހަކަ ދެއްކެވި އެވެ. އެމަނިކުފާނު ވިދާޅުވީ އެކަމަށް އޮތް ހައްލަކީ ވާހަކަ ދައްކައިގެން އިސްލާމީ އަސްލުތަކުގެ މައްޗަށް ރުޖޫއަވާން ގޮވާލުން ކަމަށެވެ.
"އެއްވެސް މީހަކު ހައްދުފަހަނަ އެޅި ވިސްނުމެއް ގެންގުޅެންޏާ އެއީ ކަންބޮޑުވުމެއް. އަޅުގަނޑު ބޭނުންވަނީ މި ގައުމު އަމާންތަނެއްގެ ގޮތުގައި އޮތުމަށް،" މުއިއްޒު ވިދާޅުވި އެވެ.
މުހިންމު ބައެއް ހަބަރުތައް
ދުވަހުގެ ފޮޓޯ
އިއްޔެ ބޭއްވި 28 ވަނަ ޓޭބަލް ޓެނިސް އެސޯސިއޭޝަން ޗެމްޕިއަންޝިޕްގެ އަންހެން ކެޓަގަރީން އެއްވަނަ ހޯދި ފާތިމަތު ދީމާ އަލީ އަދި ފިރިހެން ކެޓަގަރީން އެއްވަނަ ހޯދި މުހައްމަދު ޝައްފާން އިސްމާއިލް، މެޑަލް އަދި ތަށިތަކާއެކު ފޮޓޯއަކަށް ހުއްޓިގެން: ދީމާއަކީ ރާއްޖެއިން ބޭރުގެ ގިނަ ވަނަތަކެއް ވެސް ހާސިލުކޮށްފައިވާ ކުޅުންތެރިއެއް -- ފޮޓޯ: އިސްމާއިލް އަޒްމީން / އަދަދު
