ފެނަކަ ކޯޕަރޭޝަނުގެ 75 މައްސަލައެއް ބަލަމުން އަންނަ ކަމަށާއި އެ މައްސަލަތަކާ ގުޅޭ 20 މިލިޔަނަށް ވުރެ ގިނަ ރުފިޔާ ހޯދަން އެ ކުންފުންޏަށް އަންގާފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން ބުނެފައި ވަނީ ހަގީގަތް އޮޅޭ ގޮތަށް ކަމަށް އެ ކުންފުނިން ބުނެފި އެވެ.
ފެނަކައިން ނެރުނު ނޫސް ބަޔާނެއްގައި ބުނީ އޭސީސީއިން ހޯދުމަށް އަންގާފައިވާ ފައިސާ ކަމަށް ބުނެ އާންމުކޮށްފައިވާ އަދަދާއި، ބަލާ މައްސަލަތައް ކަމަށް އާންމުކޮށްފައިވާ ތަފާސް ހިސާބަކީ 2012 ވަނަ އަހަރު އެކުންފުނި ވުޖޫދުވީ ދުވަހުން ފެށިގެން ހުރި އަދަދު ކަމަށެވެ.
އޭސީސީއިން އިއްޔެ އާންމުކުރި ނޫސް ބަޔާނުގައި، އެ މައްސަލަތަކަކީ ވަކި އިރެއްގައި ހުށަހެޅި ބަލާ މައްސަލައެއް ކަމެއް ސާފުކޮށް ބުނެފައެއް ނުވެ އެވެ.
ޒިންމާވާ ފަރާތްތަކުގެ އަތުން ކުންފުންޏަށް ހޯދުމަށް އެ ކޮމިޝަނުން އަންގަވާފައިވާ 20،504،491ރ. އަކީ، 2011 ވަނަ އަހަރުން ފެށިގެން 2017 ވަނަ އަހަރުގެ ނިޔަލަށް ކުންފުނިން ހިންގާފައިވާ ހަތަރު މުއާމަލާތަކާ ގުޅިގެން ހޯދުމަށް އަންގާފައިވާ ފައިސާ ކަމަަށް ފެނަކައިން ބުނެފައި ވެއެވެ.
ފެނަކައިން ހާމަކުރި އެ މުއާމަލާތްތަކުގެ ތަފްސީލުތައް
- ސަދަން ޔުޓިލިޓީޒް ލިމިޓެޑްގެ ކުރީގެ ފައިނޭންސް ޑިރެކްޓަރަކު ކިޔަވަން ދިއުމަށް ކުންފުނީގެ އެއިރުގެ މެނޭޖިންގ ޑިރެކްޓަރު، މަގާމުގެ ނުފޫޒު ބޭނުންކޮށްގެން ކުންފުނީގެ ބަޖެޓުން ދޫކޮށްފައިވާ ކަމަށް ބުނެވޭ 240،000.00ރ.
- 2015 ގައި އަމިއްލަ ކުންފުންޏަކުން ކޮށްފައިވާ މުއާލާތްތަކަކާ ގުޅިގެން، ކުންފުނީގެ ޕްރޮކިއުމަންޓް ޕޮލިސީއާ އެއްގޮތަށް އުނިކުރަންޖެހޭ ޖޫރިމަނާ ފައިސާ އުނި ނުކޮށް އެފަރާތަށް ފައިސާ ދައްކާފައިވާތީ، ކުންފުންޏަށް ލިބުނު ގެއްލުމަށް ވާ 1،017،170.44ރ.
- 2016 ގައި އެ ކުންފުންޏަށް ބޭނުންވާ ޑޮލަރު ގަތުމަށް އަމިއްލަ ކުންފުންޏަކާ އެކު ކުރެވުނު މުއާމަލާތުގައި ކުންފުންޏަށް ލިބެން ޖެހޭ 17،857،979.10ރ.
- 2017 ގައި އެ ކުންފުންޏަށް ބޭނުންވާ ބިލިންގ ސޮފްޓްވެއަރ ހޯދުމަށް އަމިއްލަ ކުންފުންޏަކާއެކު ކޮށްފައިވާ މުޢާމަލާތްތުގައި ކުންފުންޏަށް ގެއްލިފައިވާ 1،389،342.00ރ.
ފެނަކައިން އުސޫލުތަކުގެ ބޭރުން އެކި މީހުންނަށް ވަޒީފާ ހަމަޖައްސާފައިވާ ކަމުގެ ތުހުމަތުތަކުގެ މައްސަލަތަކާއި، ކުންފުނީގެ ޕްރޮކިއުމަންޓު އުސޫލުތަކާ ހިލާފުވުމުގެ މައްސަލަތަކާއި، ކުންފުނިން ފައިސާ ދޫކުރުމާ ގުޅޭގޮތުން އެކަށައަޅާފައިވާ އުސޫލު ހިލާފަށް ފައިސާ ދޫކުރުމުގެ ތުހުމަތުތަކުގެ މައްސަލަތައް ބަލަމުން އަންނަ ކަމަށް އޭސީސީން ބުނެ އެވެ.
އޭސީސީން ބުނި ގޮތުގައި އެކި މައްސަލަތަކުގައި 92 ކަމެއް އިސްލާހުކުރަން އެކޮމިޝަނުން ވަނީ ފެނަކައަށް އަންގައިފަ އެވެ. އޭގެ ތެރޭގައި ހިންގުމާ ގުޅޭ 48 ކަމެއް، ސިޔާސަތުތަކާ ގުޅޭ 24 ކަމެއް، ގެއްލިފައިވާ ފައިސާ ހޯދުމާ ގުޅޭ ހަ ކަމެއް އަދި ބަލައި ތަހުގީގުކުރުމާ ގުޅޭ ހަ ކަމެއް ހިމެނެ އެވެ.
