ޓްރީ ޓޮޕް ހޮސްޕިޓަލުގެ އިހުމާލުން އާއިލާގެ މެމްބަރުން މަރުވެފައިވާ ކަމަށް ބުނެ ބަޔަކު އެ ހޮސްޕިޓަލް ކުރިމަތީގައި އިއްޔެ މުޒާހަރާ ކުރުމުން، ޝަކުވާއެއް އޮތް ނަމަ ރަސްމީކޮށް, އީމެއިލް މެދުވެރިކޮށް ފޮނުވުމަށް އެ ހޮސްޕިޓަލުން އެދެފި އެވެ.
އެ ހޮސްޕިޓަލުން މިއަދު ނެރުނު ނޫސް ބަޔާނެއްގައި ބުނެފައި އޮތީ އެ ހޮސްޕިޓަލުގެ ހިދުމަތަކާ ގުޅިގެން ޝަކުވާއެއް ނުވަތަ ކަންބޮޑުވުމެއް އޮތް ނަމަ އެ ހޮސްޕިޓަލުގެ ރަސްމީ މުއާމަލާތީ ނިޒާމުން އެކަން ހުށަހެޅުމަށެވެ.
ރަސްމީކޮށް ކަމެއް ހުށަހަޅައިފި ނަމަ އެފަދަ މައްސަލަތައް ގަވާއިދުން ބަލަމުންދާނެ ކަމަށް ވެސް އެ ހޮސްޕިޓަލުން ބުނެފައިވެ އެވެ. ހޮސްޕިޓަލުން އެދެނީ ޝަކުވާއެއް އޮތް ނަމަ care@treetophospital.com އަށް އީމެއިލް ކުރުމަށެވެ.
ޓްރީ ޓޮޕް ހޮސްޕިޓަލާ ދެކޮޅަށް އިއްޔެ ކުރި މުޒާހަރާގައި މަދުވެގެން ތިން އާއިލާއަކުން ބައިވެރިވި އެވެ. އެ މުޒާހަރާގައި އެ މީހުން ބުނަމުންދިޔައީ އެމީހުންގެ އާއިލާގެ ބައެއް މެމްބަރުން މަރުވީ ހޮސްޕިޓަލުގެ އިހުމާލުން ކަމަށެވެ. ހޮސްޕިޓަލުގެ މެނޭޖްމަންޓުން އެމީހުންގެ ޝަކުވާ އަޑުނާހާ ކަމަށް ވެސް މުޒާހަރާގެ ބައިވެރިން ބުނެފައިވެ އެވެ.
