މަނީ ލޯންޑާކުރުމާއި ރިޝްވަތު ހިފުމުގެ ކުށް ސާބިތުވެ 11 އަހަރަށް ޖަލަށް ލާން ކުރީގެ ރައީސް އަބްދުﷲ ޔާމީނަށް ކްރިމިނަލް ކޯޓުން ކޮށްފައިވާ ހުކުމް ބާތިލުކުރެވޭނެ ފޯމިއުލާއަކީ ޝަރުއީ ނިޒާމު އިސްލާހު ކުރުން ކަމަށް ދޭހަވާ ގޮތަށް އިންތިހާބީ ރައީސް ޑރ. މުހައްމަދު މުއިއްޒު ވާހަފުޅު ދައްކަވައިފި އެވެ.
އަލްޖަޒީޒާގެ "ޓޯކް ޓު އަލްޖަޒީރާ" ޕްރޮގްރާމުގައި ކުރި ސުވާލަކަށް ޖަވާބު ދެއްވަމުން މުއިއްޒު ވިދާޅުވީ ރާއްޖޭގެ ކޯޓުތައް ސިޔާސީ ނުފޫޒުން ސަލާމަތްކުުރުމަށްޓަކައި ދެކަމެއް ކުރައްވާނެ ކަމަށެވެ. އެއް ކަމަކީ ޖުޑީޝަލް ސާވިސް ކޮމިޝަން (ޖޭއެސްސީ)ގެ އެކުލެވިފައިވާ ގޮތް ބަދަލުކޮށް، ސިޔާސީ މީހުން އެ ކޮމިޝަންގައި ނުހިމެނުމެވެ. ދެވަނަ ފިޔަވަޅަކީ ޝަރުއީ ދާއިރާގެ އިދާރީ ކަންތައްތައް ބެލެހެއްޓުން އެ ކޮމިޝަނުން ވަކިކުރުމެވެ.
ޔާމީނަށް ކުރި ހުކުމަކީ ސިޔާސީ ހުކުމެއް ކަމަށް މުއިއްޒު ވިދާޅުވީ "ކޮރަޕްޝަނާ ދެކޮޅަށް މަސައްކަތް ކުރާ ނަމަ، ކޮރަޕްޝަންގެ ކުށް ސާބިތުވެފައިވާ ބޭފުޅަކު މިނިވަން ކުރައްވަން މަސައްކަތް ކުރައްވަނީ ކީއްވެތޯ" އަލްޖަޒީރާއިން ސުވާލުކުރުމުންނެވެ.
އެގޮތަށް ޖަވާބު ދެއްވުމުން އަލްޖަޒީރާއިން ސުވާލުކުރީ "ރާއްޖޭގެ ޝަރުއީ ނިޒާމަކީ މިނިވަން އިންސާފުވެރި ނިޒާމެއް ކަމަށް ގަބޫލުކުރައްވަންތޯ" އެވެ.
"މިވަގުތު މިނިވަނެއް ނޫން. އަދި އަޅުގަނޑު ފުރަތަމަ ދުވަހުން ފެށިގެން ކަށަވަރުކުރާނަން އެ ނިޒާމަކީ މިނިވަން އިންސާފުވެރި ނިޒާމެއް ކަން. އަދި އެ ނިޒާމަކީ މިނިވަން އިންސާފުވެރި ނިޒާމެއްކަން ކަށަވަރު ކުރުމަށް އަޅުގަނޑު ފިޔަވަޅުތައް އަޅާނަން،" މުއިއްޒު ރައްދުގައި ވިދާޅުވި އެވެ.
"އަޅުއްވާނީ ކޮން ފިޔަވަޅުތަކެއްތޯ؟" އެ ހިސާބުން އަލްޖަޒީރާ އިން ސުވާލުކުރި އެވެ.
މުއިއްޒު ވިދާޅުވީ ޖުޑީޝަލް ސާވިސް ކޮމިޝަން (ޖޭއެސްސީ) އިން ސިޔާސީ ނުފޫޒު ނައްތަވައިލައްވާނެ ކަމަށާ ޝަރުއީ ދާއިރާގެ އިދާރީ ހިންގުމުން އެ ކޮމިޝަނުން ވަކިކުރައްވާނެ ކަމަށެވެ. އެކަމަށް ޓަކައި ގާނޫނުތައް ހައްދަވާނެ ކަމަށް ވެސް ވިދާޅުވި އެވެ.
"ޝަރުއީ ނިޒާމު އެގޮތަށް އިސްލާހު ކުރައްވާއިރު ޔާމީނު މިނިވަން ކުރަން އެ ނިޒާމުގެ ތެރެއިން މަސައްކަތް ކުރުން މާ ރަނގަޅުނޫންތޯ" ޖަވާބާ ގުޅުވައި އަލްޖަޒީރާއިން ސުވާލުކުރި އެވެ. މުއިއްޒު ވިދާޅުވީ ޔާމީނު މިނިވަން ކުރުމުގެ މަސައްކަތް ކުރާނީ އެ ނިޒާމުގެ ތެރެއިން ކަމަށެވެ.
"މީހަކު ބަހައްޓާ ތަން ބަދަލުކުރުމަކީ ރައީސަށް ކުރެއްވޭނެ ކަމެއް. އެއީ ޖަލުން ގޭބަންދަށް ބަދަލުކުރުން ކަމަށް ވިޔަސް ނުވަތަ އެހެން ގޮތަކަށް ވިޔަސް، އެއީ ގާނޫނު ހުއްދަކުރާ ކަމެއް. އެކަމަކު މީހަކު މުޅިން މިނިވަން ކުރުމަކީ ނުވަތަ ކޮށްފައި އޮތް ހުކުމެއް ބާތިލުކުރުމަކީ ފަނޑިޔާރުންނާ ހިސާބުގައި އޮތް ކަމެއް،" މުއިއްޒު ވިދާޅުވި އެވެ.
ޖޭއެސްސީގައި މިހާރު ތިއްބަވާ ސިޔާސީ ބޭފުޅުންނަކީ ރައްޔިތުންގެ މަޖިލީހުގެ ދެ މެމްބަރަކާއި ބަންޑާރަނައިބެވެ. އެކޮމިޝަނުގެ އެކުލެވުން ބަދަލުކުރަން މިހާރުގެ ސަރުކާރުން ވެސް ވަނީ ރައްޔިތުންގެ މަޖިލީހަށް ބިލެއް ހުށަހަޅައިފަ އެވެ.
މިހާރު އޮތް 19 ވަނަ ރައްޔިތުންގެ މަޖިލީހުގައި މެޖޯރިޓީ އޮތީ އެމްޑީޕީއަށް ކަަމަށް ވާތީ، ޖޭއެސްސީގެ އެކުލެވުން މުއިއްޒު އެދިވަޑައިގަންނަވާ ގޮތަކަށް ބަދަލުކުރައްވަން މި ދައުރުގައި ފަސޭހައެއް ނުވާނެ އެވެ. މިހާރު އޮތް މަޖިލީހުގެ ދައުރު އަންނަ އަހަރު ނިމޭނެ އެވެ.
ޔާމީން 11 އަހަރުގެ ހުކުމެއް ތަންފީޒުކުރައްވަމުން ގެންދަވަނީ އެމަނިކުފާނުގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ ތެރެއިން ވ. އާރަށް ކުއްޔަށް ދޫކުރުމުގެ ތެރެއިން އެމަނިކުފާނު 1.1 މިލިއަން ޑޮލަރު ރިޝްވަތުގެ ގޮތުގައި ނަންގަވައި އެ ފައިސާ ލޯންޑަކުރެއްވި މައްސަލަ ސާބިތުވެގެންނެވެ.
އޭގެ އިތުރުން، ރ. ފުއްގިރި ކުއްޔަށް ދޫކުރުމުގެ ތެރެއިން ވެސް ރިޝްވަތު ނަންގަވައި އެ ފައިސާ ލޯންޑަ ކުރެއްވި ކަމުގެ ތުހުމަތުގައި ޔާމީނުގެ މައްޗަށް ރިޝްވަތާއި މަނީ ލޯންޑަރިންގެ ކުށުގެ ދައުވާ އުފުލާފައި ވެ އެވެ. އެ މައްސަލަ އޮތީ ކްރިމިނަލް ކޯޓުގަ އެވެ.
