ވައިގެ މަގުން ރާއްޖެ އެތެރެކުރަން މަސައްކަތް ކުރި 4.7 ކިލޯގްރާމުގެ މަސްތުވާތަކެތި ކަސްޓަމްސްއިން އަތުލައިގަނެފި އެވެ.
އެ އިދާރާއިން މިއަދު ބުނީ ޕާކިސްތާނުން ރާއްޖެ އައި 20 އަހަރުގެ އަންހެން ފަސިންޖަރެއްގެ އަތުން 4.7 ކިލޯގެ މަސްތުވާތަކެތި އަތުލައިގަނެފައިވާ ކަމަށާއި، އެތަކެތީގެ ތެރޭގައި ހިމެނެނީ މަސްތުވާތަކެތީގެ ބާވަތެއް ކަމަށްވާ ހެރޮއިން ކަމަށެވެ.
"އެ ތަކެތި ފުރަތަމަ މަރުހަލާގައި ކަސްޓަމްސްއިން ތަހުލީލު ކުރި އިރު، މަސްތުވާތަކެތީގެ ބާވަތެއް ކަމަށްވާ ހެރޮއިންއަށް ވަނީ ޕޮޒިޓިވްވެފައި" ކަސްޓަމްސްއިން ބުނެ އެވެ.
އަތުލައިގަތް މަސްތުވާތަކެތީގެ ބަރުދަނުގައި 4.7 ކިލޯ ހުރި އިރު އޭގެ އަގު 5.8 މިލިއަން ރުފިޔާއަށް އަރައެވެ. ކަސްޓަމްސްއިން ބުނީ މަސްތުވާތަކެއްޗާއި އެތަކެތި އެތެރެކުރަން މަސައްކަތް ކުރި އަންހެން މީހާ ފުުލުހުންނާ ހަވާލުކޮށްފައި ވާކަމަށެވެ.
އެ ތަކެތި އަތުލައިގެންފައި ވަނީ ޝައްކުވެގެން ފަސިންޖަރުގެ ލަގެޖު ބަލައި ފާސްކުރުމުގެ ތެރޭގައި ކަމަށް ކަސްޓަމްސް އިން ބުނެ އެވެ.
އަތުލައިގަތް މަސްތުވާތަކެތި ހުރީ ޕެކެޓުކޮށްފައި ކަމަށާއި، ފަސިންޖަރުގެ ލަގެޖުން ނަގާފައި ވަނީ އެއް ޕެކެޓު ކަމަށް ވެސް ކަސްޓަމްސްއިން ބުނެ އެވެ.
