ޗައިނާގެ 74 ވަނަ އަހަރީ ދުވަސް ފާހަގަކުރުމުގެ ގޮތުން އިއްޔެ ސޯޝަލް ސެންޓަރުގައި ބޭއްވި ހަފުލާގައި، އިންތިހާބީ ރައީސް ޑރ. މުހައްމަދު މުއިއްޒު އަދި އިންތިހާބީ ނައިބު ރައީސް ހުސެއިން މުހައްމަދު ލަތީފްގެ އިތުރުން ސަރުކާރުގެ އިސްވެރިން އިއްޔެ ބައިވެރިވެވަޑައިގެންފި އެވެ.
މިއީ އިންތިހާބުވެވަޑައިގަތް ފަހުން ބޭރު ގައުމެއްގެ ފަރާތުން ބޭއްވި ހަފުލާއެއްގައި އިންތިހާބީ ރައީސް ޑރ. މުއިއްޒު އަދި ނައިބު ރައީސް ބައިވެރިވެވަޑައިގެންނެވި ފުރަތަމަ ފަހަރެވެ.
މި ހަފްލާގައި ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ވަންގް ލިޖިން ވަނީ ޗައިނާގެ އިގްތިސާދު ކުރިއަރައި ތަރައްގީވަމުންދިއުމަކީ ރާއްޖެ ހިމެނޭހެން ހުރިހާ ގައުމަކަށް ވެސް އިތުރު ފުރުސަތުތައް ފަހިވާނެ ކަމެއް ކަމުގައި ވިދާޅުވެފަ އެވެ.
އެގޮތުން މި އަހަރު ޗައިނާގެ އިގްތިސާދު 5.2 ޕަސެންޓް ކުރިއަރާނެ ކަމަށް އައިއެމްއެފްއިން ލަފާކޮށްފައިވާކަން ލިޖިން ފާހަގަކުރެއްވި އެވެ.
މިހާރު ސަރުކާރުގެ ބުނަމުންދިޔައީ ސަރުކާރުން ގެންގުޅޭނީ "އިންޑިއާ ފަސްޓް" ޕޮލިސީއެއް ކަމަށެވެ. ނަމަވެސް ޑރ. މުއިއްޒު ވިދާޅުވެފައި ވަނީ އެމަނިކުފާނު ގެންގުޅުއްވާނީ "މޯލްޑިވްސް ފަސްޓް" ޕޮލިސީއެއް ކަމަށެވެ.
ރާއްޖެއާއި ޗައިނާއިން ސިޔާސީ ގުޅުން ގާއިމްކުރީ އޭޕްރީލް 15، 1972 ގަ އެވެ.
