ބިދޭސީއެއްގެ އަތުން އޮޅުވާލައިގެން ފައިސާ ހޯދި ކަމުގެ ކުށުގައި ކޯޓުން އިއްވާފައިވާ ޖޫރިމަނާގެ ހުކުމާ އެއްގޮތަށް އެ ފައިސާ ނުދައްކާތީ އަދަބު މުރާޖައާކޮށް ހަތަރު މަސް ދުވަހަށް ޖަލަށް ލުމަށް އަދަބު ބަދަލުކޮށްފި އެވެ.
މި މައްސަލާގައި ދައުލަތުން އަބްދުﷲ މުއާޒު ސައީދު ނަމަކަށް ކިޔާ މީހެއްގެ މައްޗަށް އުފުލީ އެހެން މީހެއްގެ މުދަލަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ އެވެ. ދައުވާއަށް އޭނާ އިއުތިރާފުވުމުން، ކޯޓުން ކަނޑައެޅި އަދަބަކީ ހަތަރު މަސް ދުވަހުގެ ތެރޭގައި 24،000 ރ. މީރާއަށް ދެއްކުމެވެ.
ޖޫރިމަނާ އެ ގޮތުގެ މަތިން ނުދައްކާތީ އަދަބު މުރާޖައާ ކޮށްދިނުމަށް ދައުލަތުން ހުށަހެޅުމުން، ކްރިމިނަލް ކޯޓުން އޭނާގެ އަދަބު ހަތަރު މަސް ދުވަހުގެ މުއްދަތަކަށް ޖަލަށް ލުމަށް ބަދަލުކުރީ މިއަދު ކުރި ހުކުމެއްގަ އެވެ.
ކުރިން ޖޫރިމަނާގެ އަދަބެއް އޭނާގެ މައްޗަށް ކަނޑައަޅައި ކުށަށް އިއުތިރާފުވެފައި، އެއިރު ވަޒީފާ އަދާކޮށް މުސާރަ ލިބޭ މީހަކަށް ވާތީ ޖޫރިމަނާ ދެއްކޭނެ ކަމަށް އޭނާ ޝަރީއަތުގައި ބުނެފައި ވުމުންނެވެ.
އަދަބު މުރާޖައާ ކުރުމުގެ ޝަރީއަތުގައި އޭނާއާ ސުވާލު ކުރުމުން ބުނެފައިވަނީ އޭނާ ވަޒީފާ އަދާ ކުރި ތަނުން މުސާރަ ނުލިބޭތީ ޖޫރިމަނާ ނުދެއްކުނީ ކަމަށެވެ. އެކަމަކު، އޭނާއަށް އެ ތަނުން ނުދީވާ މުސާރައަކީ 9،000 ރ. ކަމަށް ބުނެފައިވެ އެވެ.
ދައުލަތުން ކޮށްފައިވާ ދައުވާގައި ބުނާ ގޮތުން ލ. އަތޮޅު ސިކްސް ސެންސަސް ރިސޯޓްގައި މަަސައްކަތް ކުރާ ތައިލެންޑް މީހަކަށް ގުޅައި، އެ ރިސޯޓްގެ ފައިނޭންޝަލް ޑިޕާޓްމަންޓްގައި މަސައްކަތްކުރާ މީހެއް ކަމަށް ބުނެ އޮޅުވާލައިގެން އަމިއްލަ ބީއެމްއެލް އެކައުންޓަށް 400 ޑޮލަރު (6،144 ރ.) އޭނާ ޖަމާކޮށްފައިވެ އެވެ.
