އާ ސަރުކާރު އެކުލަވާލުމުގެ މަސައްކަތުގެ ތެރެއިން ވަކި ޕާޓީއަކަށް ވީތީ ގާބިލު ފަރާތްތައް ދުރުކުރުމުގެ ވިސްނުން އިންތިހާބީ ރައީސް ޑރ. މުހައްމަދު މުއިއްޒު ނުގެންގުޅުއްވާނެ ކަމަށް އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވެއްޖެ އެވެ.
އޭނާ މިހެން ވިދާޅުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ލީޑުކުރައްވާ ދަ ޑިމޮކްރެޓްސް ޕާޓީއާއެކު އެއްބަސްވުމެއް ނެތް ނަމަވެސް އާ ސަރުކާރުން ފުރުސަތު ލިބޭނެ ކަމަށް އިންތިހާބީ ރައީސް ވިދާޅުވި ކަމަށް ބުނެ ނޫހެއްގައި ޖަހާފައިވާ ހަބަރަކާ ގުޅިގެން ކުރެއްވި ޕޯސްޓެއްގަ އެވެ.
އެ ޕޯސްޓަކީ ހަބަރުގެ ސުރުހީގެ ސަބަބުން އޮޅުން އަރާފާނެތީ ކުރެއްވި ޕޯސްޓެއް ކަމަށް ވިދާޅުވެ ފިރުޒުލް ވަނީ މުއިއްޒުގެ ވާހަކަފުޅު ތަފުސީލުކޮށްދެއްވާފަ އެވެ.
"އިންތިހާބީ ރައީސްގެ ވާހަކަފުޅުގައި އިޝާރާތްކުރެއްވީ ޝާމިލު ސަރުކާރެއް އެކުލަވާލައްވާނެ ވާހަކައަށް. ވަކި ޕާޓީއަކަށް ވީތީ ގާބިލު ފަރާތްތައް ދުރުކުރުމުގެ ވިސްނުން ނުގެންގުޅުއްވާނެކަމަށް."
އޭގެ އިތުރުން މުއިއްޒު ވިދާޅުވީ ގާބިލުކަމާއި ޖަވާބުދާރީވުމުގެ ޝަރުތު ފުރިހަމަވާ ނަމަ، ކޮންމެ ޕާޓީއެއްގައި ހުންނެވި ނަމަވެސް، އެ ފަދަ ބޭފުޅުން ސަރުކާރުގައި ހިމެނިވަޑައިގަތުމުގެ ފުރުސަތު އޮތް ކަމަށް ކަމުގައި ފިރުޒުލް ލިޔުއްވާފައިވެ އެވެ.
ސިދާ ވަކި ސިޔާސީ ޕާޓީއެއް ސަރުކާރުގައި ހިމަނުއްވާނެކަމަށް ވިދާޅުވި ވިދާޅުވުމެއް ނޫންކަން ފާހަގަކުރަން
ފިރުޒުލް މިހެން ވިދާޅުވި ނަމަވެސް، ނަޝީދު އަދި ޑިމޮކްރެޓްސްގެ އިންތިގާލީ ޗެއާޕާސަން ހަސަން ލަތީފުވެސް މީގެ ކުރިން ވަނީ އާ ސަރުކާރުގައި ޑިމޮކްރެޓުން ބައިވެރިވާނެ ކަމަށް ވިދާޅުވެފަ އެވެ. ނަމަވެސް އެކަމާ ގުޅިގެން ޕީއެންސީ/ޕީޕީއެމް ކޯލިޝަނާ ސުވާލުކުރުމުން ވަކި ޖަވާބެއް ދީފައެއް ނުވެ އެވެ.
