ރައީސް ކަމަށް ވަޑައިގެންނެވުމަށް ފަހު ރައްޔިތުން ފިޔަވާ އެހެން ބައެއްގެ ބާރެއް އެމަނިކުފާނުގެ މައްޗަށް ނުހިނގާނެ ކަމަށް ވިދާޅުވެ، އިންތިހާބީ ރައީސް ޑރ.މުހައްމަދު މުއިއްޒު އެމަނިކުފާނުގެ ސިޔާސީ ބައިވެރިންނަށާއި އެހެން ފަރާތްތަކަށް ވަރުގަދަ މެސެޖެއް ރޭ ދެއްވައިފި އެވެ.
ރިޔާސީ އިންތިހާބުގެ ކާމިޔާބީގެ އުފާ ފާޅުކުރަން ޕީޕީއެމް/ޕީއެންސީން ރޭ ސޯޝަލް ސެންޓަރުގައި ބޭއްވި ހަފުލާގައި މުއިއްޒު ވިދާޅުވީ އެމަނިކުފާނުގެ ސަރުކާރުގެ މަގާމުތަކަށް ލައްވާނީ ފުރިހަމަ އިތުބާރު އޮތް ބޭފުޅުން ކަމަށާއި އެމަަނިކުފާނު ވިދާޅުވާ ގޮތަށް މަސައްކަތްކުރައްވާ ބޭފުޅުން ކަމަށެވެ. އެ ބޭފުޅުންނަށް ފަހު ބަސް ވިދާޅުވާނީ ރައީސުލް ޖުމްހޫރިއްޔާގެ ހައިސިއްޔަތުން ޚުދު އެމަނިކުފާނު ކަމަށް ވެސް މުއިއްޒު ވިދާޅުވި އެވެ.
"އެވަރު ބޭފުޅުން ކޮންމެ މަގާމަކަށް ވެސް ލާނީ. މިސަރުކާރުގައި ވާހެނެއް، އެހެން ބައެއްގެ އަތްމަތީގައި ބާރު އޮންނަ ސަރުކާރެއް ނޫން. އަޅުގަނޑުގެ މައްޗަށް ބާރެއް ނުހިނގާނެ އެއްވެސް ބައެއްގެ، ރައްޔިތުންގެ ބާރު އެކަނި ހިނގާނީ، ރައްޔިތުން އަޅުގަނޑު އިންތިހާބުކުރީ،" މުއިއްޒު ވިދާޅުވި އެވެ.
ﷲ ސުބްޙާނަހޫ ވަތަޢާލާގެ ބާރަށް ފަހުގައި ދެން އޮންނާނީ ރައްޔިތުންގެ ބާރު ކަމަށާއި އެމަނިކުފާނާ ދޭތެރޭ ގޮތް ނިންމާނީ ރައްޔިތުން ކަމަށް ވެސް މުއިއްޒު ވިދާޅުވި އެވެ.
"އެެހެންވީމާ މި ދެންނެވީ އެނޫން ގޮތަަކަށް އަޅުގަނޑު މަސައްކަތެއް ނުކުރާނަން،" އެމަނިކުފާނު ވިދާޅުވި އެވެ.
މުއިއްޒު މިމޭރުމުން ވާހަކަފުޅު ދައްކަވާފައި މިވަނީ އެމަނިކުފާނުގެ ސަރުކާރެއްގައި އޮންނާނީ ކުރީގެ ރައީސް އަބްދުﷲ ޔާމީނުގެ ސިޔާސަތުތައް ކަމަށާއި އެއީ އަނިޔާވެރި ސިޔާސަތުތަކެއް ކަމަށް ވާދަވެރިން ތުހުމަތުކުރަމުން ދަނިކޮށެވެ. ރިޔާސީ އިންތިހާބުގައި މުއިއްޒާ ވާދަކުރެއްވި މިހާރުގެ ރައީސް އިބްރާހީމް މުހައްމަދު ސޯލިހު ނިސްބަތްވެވަޑައިގަންނަވާ އެމްޑީޕީން، އިންތިހާބުގެ ކެމްޕެއިނުގައި ވެސް އެ ތުހުމަތު ތަކުރާރުކޮށް ކުރި އެވެ.
ވެރިކަން ބަދަލުވުމުގެ މަރުހަލާ މިހާރުގެ ސަރުކާރުން ޒިންމާދާރުކޮށް ކުރިއަށް ގެންދާނެކަމުގެ ޔަގީންކަން ރަައީސް އިބްރާހީމް މުހައްމަދު ސޯލިހު ދެއްވި ކަމަށާއި އެހެންވީމާ ނޮވެމްބަރު 17 ގައި އާ ސަރުކާރުގެ މަސައްކަތް ފެށޭނީ ބާރު ސްޕީޑުގައި ކަަމަށް ވެސް މުއިއްޒު ރޭ ވިދާޅުވި އެވެ.
"އަަޅުގަނޑު އެދެން އެހައިތަނާ ޖެހެންދެން ވެސް އަދި އޭގެ ފަހުން ވެސް ރައްޔިތުންގެ މަޖިލީހުން ފުރިހަމަ އެއްބާރުލުން ދެއްވަން. އަޅުގަނޑަށް ޔަގީން އެ އެއްބާރުލުން ދެއްވާނެކަން ރައްޔިތުންގެ މަޖިލީހުގައި ވެސް ތިއްބެވީ އިންތިހާބުކުރެވިފައިވާ ބޭފުޅުން. އެ ބޭފުޅުން ވެސް ބޭނުންވެލައްވާނެ ޑިމޮކްރެޓިކް ޕްރޮސެސް އަށް ރެސްޕެކްޓް ކުރައްވަން،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި ރައްޔިތުންގެ މަޖިލީހުގެ ރައީސާ ބައްދަލުކުރައްވާ އިރު އެމަނިކުފާނަށް ވެސް އެވާހަކަ ދަންނަވާނެ އެވެ.
