މި ދައުރުން ފަށާފައިވާ ތަރައްގީގެ މަޝްރުއޫތަައް ދެން އަންނަ ސަރުކާރަކުން ނުހުއްޓުވައި ކުރިއަށް ގެންގޮސްދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު އެދިވަޑައިގެންފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމަނިކުފާނު ވިދާޅުވީ ދެން ވެރިކަމަށް އަންނަ ސަރުކާރެއްގެ ކިބައިން އެމަނިކުފާނު އެދިވަޑައިގަންނަވާނީ ދެކަމަކަށް ކަމަށެވެ. އެއީ ތަރައްގީގެ މަޝްރުއޫތައް ނުހުއްޓުވާ ކުރިއަށް ގެންދިއުމަށާއި، ހެޔޮ ވެރިކަމަށް ކޮށްދިނުމަށް ކަމަށް ރައީސް ސޯލިހު ވިދާޅުވި އެވެ.
"އާ ސަރުކާރުގެ ކިބައިން އެ ދޭ ދެ ކަމެއް. އެއް ކަމަކީ ހެޔޮ ވެރިކަމެއް ކުރުން. އަނެއް ކަމަކީ ގައުމުގެ ތަރައްގީއަށްޓަކައި ފަށާފައިވާ މަސައްކަތްތައް ކުރިއަށްގެންދިޔުން،" ރައީސް ސޯލިހު ވިދާޅުވި އެވެ.
މިހާރު ސަރުކާރުން ފަށާފައިވާ މަޝްރުއޫތައް ކުރިއަށް ގެންދިއުމަށް އިންތިހާބީ ރައީސް ޑރ. މުހައްމަދު މުއިއްޒުއާ އެކު މަޝްވަރާ ކުރައްވާނެ ކަމަށް ރައީސް ވިދާޅުވި އެވެ.
ރައީސް ވިދާޅުވީ ރައްޔިތުންގެ ލާބައާ މަންފާއަށް، އަދި ގައުމުގެ ތަރައްގީއަށް ފަށާފައިވާ ގިނަ މަޝްރުއޫތަކެއް މިހާރުވެސް ކުރިއަށް ގެންދާކަން ރައީސް ފާހަގަކުރެއްވި އެވެ.
ރައީސް ވިދާޅުވީ، އެމަނިކުފާނުގެ ފަސް އަހަރުގެ ދައުރުގައި ހެޔޮ ވެރިކަމެއް ކޮށްދެވިއްޖެ ކަމުގެ އިހްސާސް ކުރެވޭ ކަމަށެވެ. އަދި މި އިންތިހާބަށް ފަހު ވެސް ސިޔާސީ މަސައްކަތްތަކާ ދުރައް ވަޑައިނުގެން، އެމްޑީޕީ އެކަތިގަނޑެއްގެ ގޮތުގައި ދެމެހެއްޓުމުގެ މަސައްކަތް ކުރައްވާނެ ކަމަށް ރައީސް ވިދާޅުވި އެވެ.
ހޮނިހިރު ދުވަހު ބޭއްވި ރިޔާސީ އިންތިހާބުގެ ދެވަނަ ބުރުގައި 54 ޕަސެންޓު ހޯއްދަވައިގެން ރައީސް ސޯލިހުގެ މައްޗަށް ކުރި ހޯއްދެވީ ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު އެވެ. ރައީސް ސޯލިހަށް ލިބިވަޑައިގަތީ 46 އިންސައްތަ އެވެ.
