އަލަށް އުފެދޭ ޑރ. މުހައްމަދު މުއިއްޒުގެ ސަރުކާރުގައި ދަ ޑިމޮކުރެޓްސް ބައިވެރިކުރުމާމެދު އަދި ދަންނަވާނެ ވަކި އެއްޗެއް ނެތް ކަމަށް ޕީއެންސީގެ ކެމްޕޭނު ތަރުޖަމާނު، މުހައްމަދު ތޮލާލް ވިދާޅުވެއްޖެ އެވެ.
މުއިއްޒުގެ ވެރިކަމުގައި ދަ ޑިމޮކުރެޓްސްގެ ބައިވެރިވުން އޮންނާނެ ކަމަށް އެ ޕާޓީގެ ވަގުތީ ޗެއާޕާސަން ހަސަން ލަތީފު ރޭ ވިދާޅުވުމާ ގުޅިގެން "އަދަދު" ނޫހުން ތޮލާލްއަށް ސުވާލު ކުރުމުން ވިދާޅުވީ އެފަދަ މަޝްވަރާއެއް ހިނގާފައިވާ ކަމުގެ މައުލޫމާތު އަދި ލިބިފައި ނުވާ ކަމަށެވެ.
"އަދި އެކަހަލަ މައުލޫމާތެއް ލިބިފައެއް ނެތް، އެކަހަލަ ނިންމުމެއް ނިންމާނަމަ، އެކަމުގައި ޖަވާބުދެއްވާނީ ޑރ. މުއިއްޒު،" ތޮލާލް ވިދާޅުވި އެވެ.
އެކަމާ ގުޅޭގޮތުން މިހައިތަނަށް ޑިމޮކުރެޓްސްގެ ފަރާތުން ވެސް އެއްވެސް ތަފުސީލެއް ދީފައެއް ނުވެ އެވެ.
ދަ ޑިމޮކުރެޓްސްއިން ވަނީ ނިމިދިޔަ ރިޔާސީ އިންތިހާބުގެ ފުރަތަމަ ބުރުގައި ތިންވަނަ ހޯދައިފަ އެވެ. ނަމަވެސް އެ ޕާޓީގެ އިންޓެރިމް ކައުންސިލުގައި ކުރެވުނު މަޝްވަރާތަކަށްފަހު ނިންމީ ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރުމަށެވެ.
ޕީއެންސީގެ ސަރުކާރުގައި ޑިމޮކުރެޓްސްއިގެ ބައިވެރިވުން އޮންނާނެ ކަމަށް އެޕާޓީން ބުނެފައިވާއިރު، ދެވަނަ ބުރުގައި ޕީއެންސީއަށް ކުރީގެ ޑިފެންސް މިނިސްޓަރު، މުހައްމަދު ނާޒިމްގެ ޕާޓީ އެމްއެންޕީން ތާއީދު ކުރުމަށް ނިންމީ އެއްވެސް ޝަރުތަކާ ނުލަ އެވެ. އަދި އެކަމާ ގުޅޭގޮތުން ޕީއެންސީގެ ރައީސް އަބްދުއްރަހީމް އަބްދުﷲ ވެސް ވަނީ މުއިއްޒުއަށް ތާއީދު ކުރަންޖެހޭނީ އެއްވެސް ޝަރުތަކާ ނުލައި ކަމަށް ބުނެފަ އެވެ.
