ވެރިކަން ބަދަލުވުމުގެ މަރުހަލާގެ ކަންކަން ފުރިހަމަކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އިއްޔެ އެކުލާވާލި ޓްރާންސިޝަނަލް ކޮމެޓީގެ މަސައްކަތްތައް ރަސްމީކޮށް ފަށާނީ ހޮނިހިރު ދުވަހު ބޭއްވި ރިޔާސީ އިންތިހާބުގެ ދާއިމީ ނަތީޖާ އިއުލާން ކުރުމަށް ފަހު ކަމަށް ރައީސް އޮފީހުން ބުނެފި އެވެ.
ޓްރާންސިޝަނަލް ކޮމެޓީގެ އިސްވެރިއެއްގެ ގޮތުގައި ކަނޑައަޅާފައިވާ ރައީސް އޮފީހުގެ ކޯޕަރޭޓް ސެކްރެޓެރީ ހުސައިން އާމިރު "އަދަދު"އަށް ވިދާޅުވީ އެ ކޮމެޓީގެ މަސައްކަތްތައް ފެށުމަށް ހަމަޖެހިފައި ވަނީ ރިޔާސީ އިންތިހާބުގެ ދާއިމީ ނަތީޖާ އިއުލާންކުރުމަށް ފަހު ކަމަށެވެ.
"[ޓްރާންސިޝަނަލް]ކޮމެޓީގެ މަސައްކަތްތައް އަޅުގަނޑުމެންނާ ހަމައަށް އަންނާނީ ރަސްމީކޮށް ނަތީޖާ އިއުލާން ކުރީމަ." އާމިރު ވިދާޅުވި އެވެ.
އާމިރު ވިދާޅުވީ ޓްރާންސިޝަނަލް ކޮމެޓީގެ މަސައްކަތްތައް ކުރުމަށް ހާއްސަ އޮފީހެއް ވެސް އަދި ކަނޑައަޅާނެ ކަމަށާއި، އެ އޮފީސް ކަނޑައަޅާނީ ސިވިލް ސާވިސް ކޮމިޝަނުން ކަމަށެވެ. ވެރިކަން ބަދަލުވުމުގެ މަރުހަލާގައި ކުރިއަށް ގެންދާން ޖެހޭ ބައްދަލުވުންތަކާއި އެހެނިހެން ކަންކަމުގެ މަސައްކަތް ފަށާނީ އެއަށް ފަހުގަ އެވެ.
ރައީސް ސޯލިހާއި އިންތިހާބީ ރައީސް ޑރ. މުހައްމަދު މުއިއްޒު އިއްޔެ ބައްދަލުކުރެއްވި އެވެ. ވެރިކަން ބަދަލުވުމުގެ މަރުހަލާގެ ކަންކަން ވީހާވެސް ވީހާވެސް އޮމާންކަމާ އެކު ކުރިއަށް ގެންދާނެ ކަމުގެ ޔަގީންކަން އެ ބައްދަލުކުރެއްވުމުގައި ރައީސް ސޯލިހު ދެއްވި އެވެ.
ވެރިކަން ބަދަލުވުމުގެ މަރުހަލާގެ ހުރިހާ ކަމެއް ހިނގަމުންދާ ގޮތް، ރައީސް އޮފީހުގެ ފަރާތުން ވިލަރެސް ކުރައްވާނީ، ޗީފް އޮފް ސްޓާފް އަލީ ޒާހިރު އެވެ. އިންތިހާބީ ރައީސްގެ އޮފީހަށް ބޭނުންވާ އެހީތެރިކަން ދެއްވުމަށްޓަކައި ރައީސް އޮފީހުގެ ކަމާބެހޭ ފަންނީ ބޭފުޅުން ހިމެނިވަޑައިގަންނަވާ ޓީމެއްގެ އެހީތެރިކަންވެސް ލިބިވަޑައިގަންނަވާނެ ކަމަށް ރައީސް ސޯލިހު ޔަގީންކަން ދެއްވި އެވެ.
އިއްޔެ އިލެކްޝަން ކޮމިޝަނުން ހާމަކުރި ގޮތުގައި ރިޔާސީ އިންތިހާބުގެ ދާއިމީ ނަތީޖާ އިއުލާން ކުރާނީ އަންނަ އާދީއްތަ ދުވަހުގެ 15:00 ގަ އެވެ.
ރިޔާސީ އިންތިހާބުގެ ނަތީޖާ އަންދާޒާ ކުރެވޭ ގޮތުން އިންތިހާބު ކާމިޔާބުކުރެއްވީ ޕީޕީއެމް/ޕީއެންސީގެ ކެންޑިޑޭޓު ޑރ. މުއިއްޒެވެ. އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހުގެ މައްޗަށް އެމަނިކުފާނު ކުރި ހޯއްދެވީ، ޖުމްލަ ވޯޓުގެ 54 ޕަސެންޓު ހޯއްދަވައިގެންނެނެވެ.
ދެ ވަނަ ބުރުގައި 243،000 އަށް ވުރެ ގިނަ މީހުން ވޯޓުލާފައިވެ އެވެ. އެއީ ވޯޓުލުމުގެ ހައްގު ލިބިގެންވާ 282,804 މީހުންގެ ތެރެއިން 86 ޕަސެންޓެވެ.
