އެގާރަ އަހަރުގެ ޖަލު ހުކުމެއް ތަންފީޒު ކުރަމުން ދިޔަ ކުރީގެ ރައީސް އަބްދުﷲ ޔާމީން އިއްޔެ ގޭ ބަންދަށް ބަދަލުކުރި އެވެ.
އިންތިހާބީ ރައީސް ޑރ. މުހައްމަދު މުއިއްޒު ވިދާޅުވި ގޮތުގައި ރައީސް ސޯލިހު އެ ގޮތަށް ނިންމެވީ މިވަގުތު ގައުމުގެ މަސްލަހަތަށް ބައްލަވާފަ އެވެ. ރައީސް ސޯލިހު އާއި ޑރ. މުއިއްޒު އިއްޔެ ރައީސް އޮފީހުގައި ބައްދަލު ކުރެއްވި އެވެ.
"އަޅުގަނޑުވެސް ރައީސް އިބްރާހިމް މުހައްމަދު ސޯލިހާ ބައްދަލުކޮށްފަ މިއައީ ދެއްވި ފުރުސަތުގަ. މިކަން ފާހަގަކޮށް އަޅުގަނޑު ދެންނެވިން މިވާހަކަ. މި ގައުމުގެ ރައްޔިތުން ބަސް އިއްވީމާ އެކަމުގެ ހަމަ ގޮތް ނިންމެވީ ކަމަށް ގައުމުގެ މަސްލަހަތު އިސްކުރައްވާފައި،" ރައީސް ޔާމީން މަރުހަބާ ކިޔުމަށް އެ މަނިކުފާނު ދިރުއުޅުއްވާ ހ. ދޫވެހި ކައިރިއަށް އެތައް ސަތޭކަ ސަޕޯޓަރުން ޖަމާވެފައިވަނިކޮށް އެ ސަރަހައްދަށް ވަޑައިގެން މީޑިއާތަކާ ވާހަކަ ދައްކަވަމުން މުއިއްޒު ވިދާޅުވި އެވެ.
އެމަނިކުފާނު ވިދާޅުވީ މިއީ އަމިއްލަ މަސްލަހަތަށް ވުރެ ގައުމުގެ މަސްލަހަތު އިސްކުރަންވީ ވަގުތު ކަމަށާއި، މިވަގުތަކީ އެންމެން އެކަތިގަނޑަކަށް ވާންވީ ވަގުތު ކަމަށެވެ.
"ސަރުކާރުން ރައީސް ޔާމީން ގެއަށް ދޫކޮށްލަށް ނިންމި ނިންމުމަކީ އަޅުގަނޑު ވަރަށް ބަލައިގަންނަ ވަރަށް އެކަމަށްޓަކާ ފަހުރުވެރިވާ ކަމެއް، ޝުކުރުވެރިވާ ކަމެއް،" މުއިއްޒު ވިދާޅުވި އެވެ.
ގައުމުގައި މިވަގުތު ހުރި މައްސަލަތައް ހައްލުކުރުމަށް ރައީސް ޔާމީންގެ ލަފާފުޅު ބޭނުންތެރި ކަމެއް ކަމަށް މުއިއްޒު ވިދާޅުވި އެވެ. މުޅިން މިނިވަން ނުވެ ޔާމީން ގޭގައި ހުންނެވުމަކީ ގާނޫނުގެ ތެރެއިން ވެސް ހަމަތަކެއް ކަނޑައެޅިފައިވާނެ ކަމެއްކަން ފާހަގަކުރައްވަމުން މުއިއްޒު ވިދާޅުވީ، އެކަމަކު ވެސް އެމަނިކުފާނުގެ ލަފާ ހޯއްދަވާނެ ކަމަށެވެ.
މުހިންމު ބައެއް ހަބަރު
ދުވަހުގެ ފޮޓޯ
ކުރީގެ ރައީސް ޔާމީން ޖަލުން ގޭބަންދަށް ބަދަލުކުރިއިރު އެ މަނިކުފާނަށް މަރުހަބާ ކިޔުމަށް، އިންތިހާބީ ރައީސް ޑރ. މުހައްމަދު މުއިއްޒު ހުންނެވި. އަދި ގިނަ އަދަދެއްގެ ސަޕޯޓަރުން ބައިވެރިވި. -- ފޮޓޯ: އަބްދުﷲ އިޔާން/ އަދަދު
