އިއްޔެ ބޭއްވި ރިޔާސީ އިންތިހާބުގެ ދެ ވަނަ ބުރުގެ ވޯޓުލުން ކުރިއަށް ދަނިކޮށް ފައިސާ ބެހި މީހަކު ހައްޔަރުކޮށްފި އެވެ.
އެންޓި-ކޮރަޕްޝަން ކޮމިޝަން (އޭސީސީ) އިން ބުނީ އިއްޔެ މާލޭގެ އެކި ސަރަހައްދުތަކުގައި ފައިސާ ބެހުމުގައި ހަރަކާތްތެރިވި މީހަކު ފުލުހުން ހައްޔަކޮށްފައިވާ ކަމަށާއި އެ މައްސަލަ ފުލުހުންގެ ފަރާތުން އެ ކޮމިޝަނަށް ހުށަހަޅާފައިވާ ކަމަށެވެ.
އެ މައްސަލައާ ގުޅިގެން ކޮމިޝަނުން ކުރިއަށް ގެންދަން ޖެހޭ ތަހުގީގު ކުރަމުން އަންނަ ކަމަށް ވެސް އޭސީސީން ބުނެފައިވެ އެވެ.
އިންތިހާބުގެ ތެރޭގައި އެކި ޖިނާއީ ކުށްތަކަށް އަރައިގަނެގެން ބަޔަކު ހައްޔަރުކުރި އެވެ. އެގޮތުން ވޯޓު ކަރުދާހުގެ ފޮޓޯ ނެގިކަމަށް ތުހުމަތުގައި ފުވައްމުލަކު ސިޓީގައި ވޯޓުލާން ދިޔަ މީހަކު ވެސް ހައްޔަރުކުރި އެވެ.
އަދި ވޯޓުލުމަށް ފަހު ވޯޓު ކަރުދާސް ދައްކައިގެން ގދ. ވާދޫއިން މީހަކު ހައްޔަރު ކުރި އެވެ.
އޭގެ އިތުރުން ދެ މީހުން ފުލުހުންގެ ބެލުމުގެ ދަށަށް ގެނެސްފައިވާއިރު އެ މީހުންނާ ގުޅޭ މައުލޫމާތެއް ފުލުހުން ހިއްސާކޮށްފައި ނުވެ އެވެ.
