އެއްވެސް ޝާރުތެއް ނެތި ވަގުތުން ވަގުތަށް ކުރީގެ ރައީސް، ޔާމީން އަބްދުލްގައްޔޫމްގެ މައްޗަށް އުފުލާފައިވާ ހުރިހާ ދައުވާތަކެއް އަނބުރާ ގެންގޮސް އެމަނިކުފާނު މިހާރުން މިހާރަށް މިނިވަން ކުރުމަށް ޔާމީންގެ ވަކީލުން ޓީމުން ގޮވާލައިފި އެވެ.
ދާދި ދެންމެއަކު އެ ޓީމުން ނެރުނު ނޫސް ބަޔާނެއްގައި ބުނީ، ރިޔާސީ އިންތިހާބުގެ ދެވަނަ ބުރުގެ ނަތީޖާއިން ދިވެހީން ބަސް ބުނެފައިވާ ކަމަށާއި ރައްޔިތުން ނިންމި ނިންމުމާ އެއްގޮތަށް ރައީސް ޔާމީން މިނިވަން ކުރަން ޖެހޭ ކަމަށެވެ.
"މިއަދުގެ ވޯޓުން ރައްޔިތުން ނިންމި ގޮތަށް، އިތުރު އެއްވެސް ޝަރުތެއްނެތި، ވަގުތުން ރައީސް ޔާމީން މިނިވަންކޮށް، އެމަނިކުފާނުގެ މައްޗަށް އުފުލާފައިވާ އެންމެހައި ދައުވާތައް އަނބުރާ ގެންދިއުމަށް ދިވެހި ސަރުކާރަށާއި ދައުލަތުގެ ކަމާބެހޭ އެންމެހައި ފަރާތްތަކަށް ގޮވައިލަން،" އެ ބަޔާނުގައި ބުނެފައިވެ އެވެ.
އެ ބަޔާނުގައި ބުނެފައި ވަނީ މި ސަރުކާރުން ރައީސް ޔާމީނުގެ މައްޗަށް އިއްވާފައި ވަނީ ސިޔާސީ ދައުވާތަކެއް ކަމަށާއި އެމަނިކުފާނުގެ މައްޗަށް ކޮށްފައިވާ ނުހައްގު ހުކުމްތަކާ ދެކޮޅަށް ރައްޔިތުން ހުއްޓުމެއްނެތި އިހުތިޖާޖު ކުރަމުންދާތާ ހަތަރު އަހަރަށްވުރެ ގިނަ ދުވަސްވެއްޖެ ކަމަށެވެ.
މިއަދު ކުރިއަށް ގެންދިޔަ ރިޔާސީ އިންތިހާބުގެ ދެވަނަ ބުރުގައި ޕީއެންސީގެ ކެންޑިޑޭޓު، ޑރ. މުހައްމަދު މުއިއްޒު ވަނީ ބޮޑު އަގުލަބިއްޔަތަކުން ކާމިޔާބު ކޮށްފަ އެވެ.
މިހާރުގެ ރައީސުލްޖުމްހޫރިއްޔާ، އިބްރާހިމް މުހައްމަދު ސޯލިހުއާ ވާދަކުރައްވައި ޑރ. މުއިއްޒު ވަނީ 54 އިންސައްތަ ހޯއްދަވައިފަ އެވެ. ރައީސް ސޯލިހުއަށް ލިބިވަޑައިގެންނެވީ 46 އިންސައްތަ އެވެ.
ރިޔާސީ އިންތިހާބުން ކާމިޔާބުވެވަޑައިގެންފިނަމަ ވޯޓުލާ ދުވަސްނޫން އަނެއް ދުވަހު ރައީސް ޔާމީން މިނިވަން ކުރުމަށް އެދި ރައީސް ސޯލިހުއަށް ދެންނެވުމަކީ ޑރ. މުއިއްޒުގެ ވައުދެކެވެ.
