ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ރަނިން މޭޓް އަމީން އިބްރާހިމް އާއި އެ ޕާޓީގެ ކައުންސިލްގެ ގިނަ މެމްބަރުންތަކެއް ރިޔާސީ އިންތިހާބުގެ ދެ ވަނަ ބުރުގައި ރައީސް އިބްރާހިމް މުހައްމަދު ސޯލިހަށް ތާއީދު ކުރަން ނިންމައިފި އެވެ.
ޖޭޕީ ކައުންސިލްގެ ގިނަ މެމްބަރުން ހިމެނޭ ގޮތަށް އެ ޕާޓީގެ ގާތްގަނޑަކަސް 60 މެމްބަރުންގެ ތާއީދު ރައީސް ސޯލިހަށް އޮތްކަން މިރޭ ހާމަ ކުރުމަށް ހަމަޖެހިފައިވާ ކަމަށް މި ނޫހަށް ވަނީ އެނގިފަ އެވެ.
ރައީސް ސޯލިހަށް ތާއީދު ކުރައްވަން ނިންމެވި ބޭފުޅުންގެ ތެރޭގައި އަމީން އިބްރާހިމްގެ އިތުރުން ކުރީގެ ހެލްތު މިނިސްޓަރު އަބްދުﷲ އަމީން ވެސް ހިމެނިވަޑައިގަންނަވަ އެވެ.
ޖޭޕީގެ އިސް ގިނަ މެމްބަރުންގެ ތާއީދު ރައީސް ސޯލިހަށް އޮތްކަން ހާމަކުރެއްވިއިރު، އެ ޕާޓީގެ އިލްހާމް އަހުމަދާއި ރިޔާޒް ރަޝީދު ވެސް ދެ ވަނަ ބުރުގައި އެމްޑީޕީއަށް ތާއީދު ކުރައްވަން މީގެ ކުރިން ވަނީ ނިންމަވައިފަ އެވެ.
ސެޕްޓެމްބަރު 9، ގައި ބޭއްވި ރިޔާސީ އިންތިހާބުގެ ފުރަތަމަ ބުރުގައި ގާސިމް އިބްރާހިމް ވަޑައިގެންނެވީ ފަސް ވަނައަށެވެ. އޭގެ ފަހުން ގާސިމް ވަނީ ދެ ވަނަ ބުރުގައި އެއްވެސް ޕާޓީއަކަށް ތާއީދު ނުކުރައްވަން ނިންމަވައިފަ އެވެ.
ނަމަވެސް ޖޭޕީގެ މެމްބަރުން، އެމީހަކަށް ފެންނަ ކެންޑިޑޭޓަކަށް ތާއީދު ކުރުން އެއީ މައްސަލައެއް ނޫން ކަމަށް ގާސިމް ވަނީ ވިދާޅުވެފަ އެވެ. އޭގެ ފަހުން، ގާސިމްގެ އެޑްވައިޒަރު އަހުމަދު ނިހާން ވަނީ އިދިކޮޅު ކެންޑިޑޭޓް ޑރ. މުހައްމަދު މުއިއްޒަށް ތާއީދު ކުރައްވަން ނިންމަވައިފަ އެވެ.
