ޕީޕީއެމްގެ ބާރު ހިނގާ ސަރުކާރެއް އިޔާދަވެއްޖެ ނަމަ ކުރީގެ ރައީސް ޔާމީން އަބްދުލްގައްޔޫމްގެ އަނިޔާވެރި ސަގާފަތް އަލުން ރުޖޫއަވާނެ ކަމަށާއި ޕީޕީއެމްގެ ވެރިކަމެއް ގެނައުމަކީ ދިވެހިރާއްޖޭގެ ރައްޔިތުންނަށް ދެވޭ ވަރަށް ބޮޑު އަނިޔާއެއް ކަމަށް އެ ވެރިކަމުގައި އޮޑިޓާ ޖެނެރަލްގެ މަގާމު ފުރުއްވި، ނިޔާޒް އިބްރާހިމް ވިދާޅުވެއްޖެ އެވެ.
ސްރީ ލަންކާގައި ހުންނަވައި "އަދަދު" އަށް ނިޔާޒް ދެއްވި ހާއްސަ އިންޓަވިއުއެއްގައި ވިދާޅުވީ ޕީޕީއެމްގެ ސަރުކާރެއް އަޔަ ނުދިނުމަށްޓަަކައި މަސައްކަތް ކުރާންޖެހޭ އެތައް ބައިވަރު ސަބަބުތަކެއް އެބަހުރި ކަމަށެވެ. އެގޮތުން އޭނާ ވަނީ އޭރުގެ ސަރުކާރުން ކަންކަން ކުރަމުންދިޔަ ކަންކަން ހަނދާންކޮށް އެ ތާރީހު އިޔާދަވިިޔަ ނުދިޔަމަށް ރައްޔިތުންގެ ކިބައިން އެދިވަޑައިގެންފަ އެވެ.
"[ޕީޕީއެމްގެ ސަރުކާރެއް އިޔާދަވެއްޖެ ނަމަ] ބަދަލު ހިފުމާއި ދިވެހި ދައުލަތުގެ ފައިސާއަށް ހިޔަނާތްތެރިވުމާއި މިހުރިހައި ކަމެއް އިންތިހާއަށް ނެއްޓި ގައުމުގެ ހިންގުމުގެ ނިޒާމު އެއްކޮށް ގަޑުބަޑުވެގެންދާނެ،" ނިޔާޒް ވިދާޅުވި އެވެ.
އޭނާ ވިދަޅުވީ ޕީޕީއެމްގެ ވެރިކަމުގައި އޮޑިޓާ ޖެނެރަލްގެ މަގާމުގައި ހުރިއިރު، އެ ސަރުކާރުގެ އެތެރޭގައި ދައުލަތުގެ ވަސީލަތްތަކަށް ހިޔާނާތްތެރިވަމުންދިޔަ މިންވަރާއި އެ ހުރިހާ ކަމެއްގެ މައުލޫމާތު ލިބި، އެކަންކަން ރައްޔިތުންނަށް ހާމަ ކުރުމުން ވެގެންދިޔަ ގޮތް ދިވެހި އެއްވެސް ރައްޔިތަކަށް އޮޅިފައި ނޯންނާނެ ކަމަށެވެ.
އޭގެ އިތުރުން ރައީސް ޔާމީނު ހިންގެވި މަގުން އެމަނިކުފާނުގެ އިރުޝާދުފުޅާއި ލަފާފުޅުގެ މަތީން ވެރިކަން ކުރައްވާނެ ކަމަށް ކެންޑިޑޭޓަކު ބުނުމަކީ ބިރުވެރިކަމުގެ ނިޝާނެއް ކަމަށާއި އެއީ އެކަމާމެދު ދިވެހިން ވަރަށް ފުންކޮށް ވިސްނަންޖެހޭ ކަމަށް އޭނާ ވިދާޅުވި އެވެ.
"ރައީސުލްޖުމްހޫރިއްޔާގެ މަގާމުގައި އޭރު ހުންނެވި ޔާމީން އަބްދުލްގައްޔޫމްގެ އިރުޝާދާ އެއްގޮތަށް މިހާރު. އަލަށް މި އިންތިހާބުވާން މަސައްކަތް ކުރާ ޕްރެސިޑެންޝަލް ކެންޑިޑޭޓަކު އެގޮތަށް މަސައްކަތް ކުރައްވާނެ ކަމަށް ވިދާޅުވުމަކީ އަޅުގަނޑުމެން ބިރުވެރިވާންޖެހޭ، އެކަމާ ދޭތެރޭ ސީރިއަސްކޮށް ވިސްނަންޖެހޭ ކަމެއްގެ ގޮތުގައި އަޅުގަނޑު ދެކެން،" ނިޔާޒް ވިދާޅުވި އެވެ.
އެ ސަރުކާރުގައި ރައީސް ޔާމީނުގެ އަރިހުގައި އެމަނިކުފާނުގެ އިރުޝާދުގެ ދަށުން ކަންކަން ކުރައްވަމުން އައި ބޭފުޅުންގެ މާޒީ މިހާރު ވެސް އެއޮތީ ފެންނާން ކަމަށާއި ހަމައެކަނި އެމްއެމްޕީއާރުސީގެ ހިޔާނާތާއި އަހުމަދު އަދީބުގެ ކޭސް އެކަނި ވެސް ހެއްކަކަށް ފުދޭނެ ކަމަށް އޭނާ ވިދާޅުވި އެވެ.
"ރައީސް ޔާމީނުގެ އިރުޝާދާ އެއްގޮތަށް މަސައްކަތް ކުރި އެއްވެސް ބޭފުޅަކު ދިވެހި ދައުލަތުގެ މަސްލަހަތު އިސްކުރައްވައިފައެއް ނެތް އެ ބޭފުޅުންގެ އަމިއްލަ މަސްލަހަތުގެ މައްޗަކަށް މިހާތަނަކަށް،" ނިޔާޒް ވިދާޅުވި އެވެ.
އޭނާ ވިދާޅުވީ އެ ހުރިހާ ކަމަކާމެދު ރަނގަޅަށް ވިސްނަވައި މިހާރުގެ ވެރިކަން ދެމެހެއްޓުމަށްޓަކައި މިމަހުގެ 30 ވަނަ ދުވަހު ނުކުމެވަޑައިގެން ރައީސް ސޯލިހުއަށް ވޯޓެދެއްވުމަށް ހުރިހާ ދިވެހިރައްޔިތުންގެ ކިބައިން އެދިވަޑައިގަންނަވާ ކަމަށެވެ.
