އެމްޑީޕީގައި އިސްކޮށް އުޅުއްވުމަށް ފަހު ވަކިވެވަޑައިގެންނެވި ބޭފުޅުންތަކެއް އުފެއްދެވި ދަ ޑިމޮކްރެެޓްސްއާ އެމްޑީޕީއާ ދެމެދު ފިކުރުގެ ތަފާތެއް ނެތް ކަމަށް އެމްޑީޕީގެ ރައީސް އިބްރާހީމް މުހައްމަދު ސޯލިހުގެ ރަނިންމޭޓް މުހައްމަދު އަސްލަމް ރޭ ވިދާޅުވެއްޖެ އެވެ.
އައްޑޫ ހުޅުދޫގައި ރޭ ބޭއްވި ހަރުގެ ޖަލްސާއެއްގައި އަސްލަމް ވިދާޅުވީ ދަ ޑިމޮކްރެޓްސްގައި ތިއްބެވީ ރައްޔިތުން ބޭނުންވާ ގޮތަށް ވެރިކަން ކުރުމުގެ ނިޒާމަކަށް ރާއްޖެ ބަދަލުކުރުމުގައި އެމްޑީޕީން ކުރި މަސައްކަތުގައި އިސްކޮށް ތިއްބެވި ބޭފުޅުން ކަމަށެވެ. އޭނާ ވިދާޅުވި ގޮތުގައި ގިނަ ޕާޓީ ނިޒާމަށް ބަދަލުވުމުގެ ކުރިން ރާއްޖޭގައި އޮތީ ރައްޔިތުންނަށް އެހާ ބޮޑަށް ބަސް ނުކިޔޭ ގޮތަަށް ހިންގި ވެރިކަންތަކެއް ނޫނެވެ.
"އަޅުގަނޑު ދަންނަވާނީ މޯލްޑިވިއަން ޑިމޮކްރެޓިކް ޕާޓީއާ ދަ ޑިމޮކްރެޓްސްއާ ފިކުރުގެ ގޮތުން އެއްވެސް ތަފާތެއް ނެތޭ. އަޅުގަނޑުމެންގެ ތެރޭގައި ބައެއް ކަންކަން ކުރުމުގައި ހިޔާލުގެ ތަފާތެއް މިއޮތީ. މިއީ ވަރަށް ގާތް ގުޅުމެއް އޮތް ، އެއް އާއިލާއެއް ކަމުގައި އަޅުގަނޑު ދެކެނީ،" އަސްލަމް ވިދާޅުވި އެވެ.
އަތުގެ އިނގިލިތައް ދުރުކޮށްލައްވައި ދައްކަވައިލައްވަމުން އޭނާ ވިދާޅުވީ ދަ ޑިމޮކްރެޓްސްއަށް އެމްޑީޕީއާ ދުރަށް ދެވޭނީ އެމިންވަރަށް ކަމަށެވެ. ދުރަށް ދެވުނަސް މުޅިން ވަކި ނުވެވޭނެ ކަމަށް އޭނާ ވިދާޅުވި އެވެ.
"އަޅުގަނޑު ދަންނަވާނީ ފިކުރުގެ ގޮތުން ޑިމޮކްރެޓްސްއަކީ ވަކި ޕާޓީއެއް ހައްދަވައިގެން ތިއްބަސް އެމްޑީޕީއާ މާދުރަށް ދެވޭނެ ބައެއް ނޫނޭ، ހިންގަވާށޭ އެކުގައި މަސައްކަތްކުރައްވަން،" އަސްލަމް ވިދާޅުވި އެވެ.
ދަ ޑިމޮކްރެޓްސް އަކީ އެމްޑީޕީގެ ރިޔާސީ ޕްރައިމަރީ ރައްޔިތުންގެ މަޖިލީހުގެ ރަައީސް މުހައްމަދު ނަޝީދަށް ނާކާމިޔާބުވެވަޑައިގެންނެވުމުން، ކުރެއްވި ތުހުމަތުތަކަށް ފަހު، ފިކުރެއްގެ ދިރުމުގެ ނަމުގައި އުފެއްދެވި ފެކްޝަން އެޕާޓީން ވަކިވެގެން އުފެއްދި ޕާޓީ އެކެވެ. ރިޔާސީ އިންތިހާބުގެ ފުރަތަމަ ބުރުގައި ތިން ވަނައަށް އެންމެ ގިނަ ވޯޓު ހޯއްދެވީ ދަ ޑިމޮކްރެޓްގެ ރިޔާސީ ކެންޑިޑޭޓް އިލްޔާސް ލަބީބެވެ.
ރިޔާސީ އިންތިހާބުގެ ދެވަނަ ބުރުގައި ދަ ޑިމޮކްރެޓްސްގެ ތާއީދު ރައީސް އިބްރާހީމް މުހައްމަދު ސޯލިހަށް ހޯދަން އެމްޑީޕީން އަންނަނީ މަސައްކަތްކުރަމުންނެވެ.
