ބޭސްފަރުވާއަށް ރާއްޖޭން ބޭރަށް ވަޑައިގަންނަވަން ކުރީގެ ނައިބު ރައީސް އަހުމަދު އަދީބަށް މޯލްޑިވްސް ކަރެކްޝަނަލް ސާވިސްއިން ދިން މުއްދަތު އަންނަ މަހާ ހަމައަށް އިތުރުކޮށްދީފި އެވެ.
ކަރެކްޝަންސްގެ މީޑިއާ އޮފިޝަލަކު މިއަދު "އަދަދު" އަށް ވިދާޅުވީ، އަދީބުގެ ބޭސްފަރުވާގެ މުއްދަތު އިތުރުކުރަން އެދުމުން އަންނަ މަހުގެ އެއް ވަނަ ދުވަހާ ހަމައަށް އެ މުއްދަތު އިތުރުކޮށްދޭން ނިންމާފައިވާ ކަމަށެވެ.
ބޭސްފަރުވާއަށް އަދީބު ސިންގަޕޫރަށް ފުރަން ކަރެކްޝަންސްއިން ހުއްދަ ދިނުމުން އޭނާ ފުރީ ޖުލައި 12، ވަނަ ދުވަހު އެވެ. އޭރު ދިން 10 ދުވަހުގެ މުއްދަތު އިތުރުކުރަން އަދީބު އެދުމުން އޮގަސްޓް މަހުގެ ނިޔަލަށް މީގެ ކުރިން މުއްދަތު އިތުރުކޮށްދީފައިވެ އެވެ. އަދި އެ މުއްދަތު ހަމަވުމުން އޭނާގެ އެދުމުގެ މަތިން ސެޕްޓެމްބަރު 15، އާ ހަމައަށް މުއްދަތު އިތުރުކޮށްދީފައިވެ އެވެ.
އޭނާ ރާއްޖެއިން ބޭރަށް ފޮނުވީ އަނބުރާ ގެނެވޭނެކަން ކަށަވަރުވާ ގޮތަކަށް ކަމަށް ސަރުކާރުން ކުރިން ބުނެފައިވެ އެވެ. އެގޮތުން، އެނާ ފޮނުވީ ވަގުތީ ޓްރެވަލް ޑޮކިއުމަންޓެއްގެ ދަށުން ކަމަށާއި އޭނާއާއެކު ސެކިއުރިޓީ އޮފިސަރުން ވެސް ދާނެ ކަމަށް ބުންޏެވެ.
އޭނާގެ ސެކިއުރިޓީ އަދިވެސް ބަލަހައްޓަމުންދޭތޯ މި ނޫހުން ސުވާލުކުރުމުން ކަރެކްޝަންސްއިން ބުނެފައި ވަނީ އެކަން އަދިވެސް ކުރިއަށްދާ ކަމަށެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އެމްއެމްޕީއާރުސީއަށް ލިބެންޖެހޭ ފައިސާގެ ތެރެއިން ދެ ބިލިއަނަށްވުރެ ގިނަ ރުފިޔާއަށް ހިޔާނާތްތެރިވިކަމުގެ ކުށް ސާބިތުވެ 20 އަހަރަށް ޖަލަށް ލީ އޭނާ ދައުލަތާއެކު ހެދި އިއުތިރާފު އެއްބަސްވުމެއްގެ ދަށުންނެވެ.
ޖަލު ހުކުމެއް އޮތަސް އަދީބު ޖަލުން ގެއަށް ބަދަލުކުރީ އޭނާގެ ސިއްހީ ހާލަތާ ގުޅުވައިގެންނެވެ. އޭނާގެ ޖަލު ހުކުމް ގޭބަންދުގައި ފުރިހަމަ ކުރަން ދޫކޮށްފައި ބަހައްޓާތީ ސަރުކާރަށް ވަރަށް ބޮޑަށް ފާޑުކިޔުން ވެސް އަމާޒުވި އެވެ. އެ ފާޑުކިޔުންތަކާ ގުޅިގެން ހޯމް މިނިސްޓްރީން ކުރިން ބުނެފައި ވަނީ އޭނާ ގެއަށް ބަދަލުކުރީ ނިދާ އިރު މެޝިނެއް ބޭނުންކުރަން ޖެހޭތީ ކަމަށެވެ.
