ސިވިލް ކޯޓުގެ އިސްގާޒީ އަހުމަދު ނިމާލް ޖުނެއިދު އަވަހާރަވުމާ ގުޅިގެން ޝަރުއީ ދާއިރާގެ ދިދަ ބައިދަނޑިއަށް ތިރިކުރަން ނިންމައިފި އެވެ.
ރޭގެ ވަގުތެއްގައި މެޔަށް ތަދެއް އަރައިގެން އުޅުމަށްފަހު ނިމާލް އަވަހާރަވުމާ ގުޅިގެން ޝަރުއީ ދާއިރާގެ އިދާރާތަކުން ދަނީ އޭނާގެ އާއިލާއަށް ތައުޒިޔާ ކިޔަމުންނެވެ.
ސުޕްރީމް ކޯޓުން މިއަދު ބުނީ، ނިމާލް އަވަހާރަވުމާ ގުޅިގެން ޝަރުއީ ދާއިރާގެ ދިދައާ ބެހޭ ގަވައިދުގެ 14 ވަނަ މާއްދާގެ ދަށުން ކުރިއަށް އޮތް ތިން ދުވަހަށް ޝަރުއީ ދާއިރާގެ ދިދަ ބައިދަނޑިއަށް ތިރިކުރަން އުއްތަމަފަނޑިޔާރު މުއުތަސިމް އަދުނާން ނިންމަވާފައިވާ ކަމަށެވެ.
ސިވިލް ކޯޓުގެ ފަނޑިޔާރު ކަމަށް ނިމާލު އައްޔަނުކޮށްފައި ވަނީ މާޗު 2022 ގަ އެވެ. އަދި, އެ ކޯޓުގެ ފަނޑިޔާރު ކަމުގެ މަސްއޫލިއްޔަތުތައް އޭނާއާ ހަވާލުކޮށްފައި ވަނީ އޮގަސްޓު 22, 2022 ގަ އެވެ.
އެއަށްފަހު އިސް ފަނޑިޔާރުގެ މަގާމަށް އައްޔަންކޮށް ފަތްކޮޅު ހަވާލު ކުރީ މެއި 9، 2023 ގަ އެވެ. އެ މަގާމަށް އޭނާ އައްޔަން ކުރީ އެ ކޯޓުގެ އިސް ގާޒީ ކަމުގައި ހުންނެވި އަބްދުﷲ އަލީ ރިޓަޔާ ކުރެއްވުމުންނެވެ.
ސިވިލް ކޯޓަށް އައްޔަން ކުރުމުގެ ކުރިން ފަރްހާން ޒަމީލް އެންޑް ނިމާލް ލޯފާމްގެ މެނޭޖިން ޕާޓްނަރެއްގެ ގޮތުގައި އަހަރެއްހާ ދުވަހު މަސައްކަތް ކުރެއްވި ނިމާލް ބެޗެލާސް އޮފް ލޯ އިން ޝަރީއާ ހާސިލުކުރެއްވީ ވިލާ ކޮލެޖުންނެވެ.
ނިމާލް އަވަހާރަވިއިރު، އަންބަކާއި ކުޑަ ދަރިފުޅެއް އެބަ ހުއްޓެވެ. ނިމާލުގެ ޖަނާޒާ އޮންނާނީ މިއަދު މެންދުރު ނަމާދަށް ފަހު އެވެ.
