މާލޭ ސޯސަން މަގުގައި ދެމީހަކު ހިންގި މާރާމާރީއެއްގައި އެކަކު ވަރަށް ބޮޑަށް ޒަހަމްވުމުން އޭޑީކޭ ހޮސްޕިޓަލްގައި ފަރުވާ ދޭން ފަށައިފި އެވެ.
މާރާމާރީ ހިންގި މަންޒަރު ދުށް މީހަކު ބުނީ ސޯސަން މަގުގައި ވީޓީވީ ހިންގާ އިމާރާތުގެ ކައިރިއަށް ސައިކަލެއްގައި އައި މީހަކު އެ ސަރަހައްދުގައި ތިބި ދެމީހުންގެ ތެރެއިން އެކަކަށް މަރުތޭލަކުން ހަމަލާ ދިން ކަމަށެވެ. ނަމަވެސް ސައިކަލުގައި އައި މީހާގެ މައްޗަށް އެ ސަރަހައްދުގައި ހުރި މީހާ ގަދަވެ، މަރުތޭލަ އަތުލައި އޭނާ ޒަހަމްކޮށްލި ކަމަށް ވެސް އޭނާ ބުންޏެވެ.
"އަދަދު" އަށް މައުލޫމާތު ދިން މީހާ ބުނި ގޮތުގައި މަރުތޭލަ ހިފައިގެން އައި މީހާއަށް އޭޑީކޭ ހޮސްޕިޓަލުގައި ފަރުވާ ދޭން މިހާރު ވަނީ ފަށައިފަ އެވެ.
އެ މައްސަލައިގައި އެކަކު މިހާރު ވަނީ ހައްޔަރުކޮށްފަ އެވެ. މައުލޫމާތު ދިން މީހާ ބުނި ގޮތުގައި އެމީހާ ހައްޔަރުކުރީ ހީނާމާގޭ ޕާކިން ޒޯން ކައިރީގައި ފިލާ ހުއްޓަ އެވެ.
އެ މާރާމާރީއާ ބެހޭ ގޮތުން ފުލުހުންގެ ބަހެއް އަދި ނުލިބެ އެވެ.
