ގޭންގެއްގެ ލީޑަރަކަށް ޕޮލިސް ކޮމިޝަނަރުކަން ދޭން ނިންމާފައިވާ ކަމަށް ބުނެ ފަތުރަމުން ދަނީ އެއްވެސް ހަގީގަތެއް ނެތް ވާހަކައެއް ކަމަށާއި ސަރުކާރުގެ އެއްވެސް މަގާމަކަށް އައްޔަން ކުރާނެ މީހުން އަދި ނުނިންމާ ކަމަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ރިޔާސީ އިންތިހާބުގެ ދެވަނަ ބުރުގެ ކެމްޕޭނަށް މިއަދު ށ. ފުނަދޫއަށް ވަޑައިގެން އެރަށުގައި ބޭއްވި ޖަލްސާގައި ވާހަކަދައްކަވަމުން މުއިއްޒު ވިދާޅުވީ އޭނާއާ ގުޅޭގޮތުން ހަގީގަތެއް ނެތް ވާހަކަތައް ދައްކަމުންދާ ކަމަށާއި އެވާހަކަތައް ގަބޫލު ކުރުމަކީ އެއްގޮތަކަށް ވެސް ކޮށްގެން ވާނެ ކަމެއް ނޫން ކަމަށެވެ.
"އަޅުގަނޑު މިހާރު ނިންމަފަޔޯ ވަނީ ޕޮލިސް ކޮމިޝަނަރަކަށް ގޭންގު ލީޑަރަކު ލާން، އަޅުގަނޑާ ވަރަށް ބޮޑަށް ގުޅިފަޔޯ އޮތީ،" މުއިއްޒު ވިދާޅުވި އެވެ. "އަޅުގަނޑެއް އަދި ނުނިންމަން އެއްވެސް މަގާމަކަށް ލާނެ މީހަކު."
މުއިއްޒު ވިދާޅުވީ އެ ތުހުމަތުތަކަކީ ޕީއެންސީގެ މެނިފެސްޓޯގައި ހިމަނާފައި ހުރި ސިޔާސަތުތަކާ ދުރު، މުޅިން ހިލާފު ވާހަކަތެއް ކަމަށާއި އެފަދަ ވާހަކަތައް ދައްކާ މީހުން އެ ދައްކަނީ ހެޔޮ ނިޔަތުގައި ނޫން ކަމަށެވެ. އަދި އެ ވާހަކަތައް ފެތުރުމުގެ ބޭނުމަކީ ޕީއެންސީން ދައްކާ ވާހަކަތަކާ މެދު ރައްޔިތުންގެ ހިތްތަކުގައި ބިރު އުފެދޭ ގޮތެއް ހޯދުން ކަމަށް އޭނާ ވިދާޅުވި އެވެ.
"އަހުލާގީ ގޮތުން ރަނގަޅު މުޖުތަމައެއް އުފެއްދުމާއި އެކަކު އަނެކަކަށް ރެސްޕެކްތު ކުރުމާއި ޒުވާނުން ފުދުންތެރި ބަޔަކަށް ހެދުމާއި މި ހުރިހާ ވާހަކައަކާ ދިމާ އިދިކޮޅު ވާހަކައެއްނޫންތޯ މިއީ،" މުއިއްޒު ވިދާޅުވި އެވެ.
މުއިއްޒު އެ މޭރުމުން މިރޭ ވާހަކަ ދައްކަވާފައި ވާއިރު ޕީޕީއެމް/ޕީއެންސީ އަކީ ގޭންގުތަކާ ގުޅުން އޮންނަ ޕާޓީއެއް ކަމަށް ބުނެ މީސްމީޑިއާގައި ބައެއް މީހުން ދަނީ ވާހަކަ ދައްކަމުންނެވެ. އެގޮތުން ރައީސް ޔާމީނުގެ ވެރިކަމުގައި ގޭންގުތައް އިތުރަށް ބާރުވެރި ކުރުވި ކަމަށް ވެސް އެ ފަރާތްތަކުން ތުހުމަތު ކުރެ އެވެ.
