ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުގެ ކައުންސިލް މިނިސްޓްރީގެ ވައުދަށް އަމާޒުވި ފާޑުކިޔުންތަކާ ގުޅިގެން އޭނާ އެ ވަައުދު ތަފްސީލުކޮށް ދެއްވައި ސިޔާސަތު ދިފާއު ކުރައްވައިފި އެވެ.
މުއިއްޒުގެ އެ ސިޔާސަތާ ދެކޮޅަށް ސޯޝަލް މީޑިއާގައި ހިޔާލުފާޅުކުރި ބައެއް މީހުން ސުވާލު އުފެއްދި ކަމަކީ، މަރުކަޒީ ސަރުކާރުގެ ދަށަށް ގެންދިއުމުން ކައުންސިލްތައް ބާރުވެރި ވާނީ ކިހިނެއްތޯ އެވެ. އެއީ ޑިމޮކްރެސީގެ އަސާސްތަކާއެކު އެކުލަވާލި ފެހި ގާނޫނު އަސާސީގެ ކުރިން ސަރުކާރުގައި އޮޮތް އެޓޯލްސް މިނިސްޓްރީ އަލުން ގެނައުން ކަމަށް ވެސް ބަޔަކު ސިފަކުރި އެވެ.
ފާޑުކިޔުންތައް އަމާޒުވެފައިވަނިކޮށް ހދ. ނޮޅިވަރަންފަރުގައި ރޭ ބޭއްވި ކެމްޕެއިން ޖަަލްސާގައި މުއިއްޒު ވިދާޅުވީ އޭނާގެ ބޭނުމަކީ އެލްޖީއޭގައި މިހާރު ވެސް ސަރުކާރު ތަމްސީލްކުރާ ވަޒީރެއްގެ ހައިސިއްޔަތުން ބައިވެރިވާ ހޯމް މިނިސްޓަރުގެ ބަދަލުގައި "ފުލްޓައިމް" މިނިސްޓަރެއް ހަމަޖެއްސެވުން ކަމަށެވެ.
"މިހާރު އެލްޖީއޭގެ ރައީސަކީ ހޯމް މިނިސްޓަރު، އެއީ ކައުންސިލްތަކަށް، އެލްޖީއޭއަށް ވެސް ފުލްޓައިމް ދެވޭ މިނިސްޓަރެއް ނޫން، އަޅުގަނޑު މި ހުށަހަޅަނީ ކައުންސިލްތަކަށް ފުލްޓައިމްދޭ މިނިސްޓްރީއެއް، މިނިސްޓަރެއް، އެލްޖީއޭގައި ބައިވެރިވާން،" މުއިއްޒު ވިދާޅުވި އެވެ.
މިހާރު މާލޭގެ މޭޔަރަކަށް ވެސް ހުންނެވި މުއިއްޒު ވިދާޅުވީ ދިވެހި ދައުލަތުގެ ނިޒާމު ތަރުތީބު ކުރެވިފައި އޮންނަ ގޮތުން ވެރިކަން ކުރުމުގެ ބާރާއި ގާނޫނު ހެދުމުގެ ބާރާއި ޖުޑިޝަރީގެ ބާރުގެ ތެރެއިން ކައުންސިލްތައް އޮންނަނީ ވެރިކަން ކުރުމުގެ ބާރުގެ ތެރޭގައި ކަމަށެވެ.
"ސަރުކާރުން މި ދެނީ ބްލޮކް ގްރާންޓެއް، އެ ބްލޮކް ގްރާންޓްގެ އިތުރުން ވެސް ފުރުސަތުތައް ހޯދަން، ކައުންސިލްތައް ހިންގުމަށް ޓަކައި ބޭނުންވާ އެހީތެރިކަން، ކައުންސިލްތަކާއި ސަރުކާރު ގުޅުވައިދޭ މުއައްސަސާއެއްގެ ގޮތުގައި ކައުންސިލްތަކަށް ހާއްސަ މިނިސްޓްރީއެއް މި ގެންނަނީ،" މުއިއްޒު ވިދާޅުވި އެވެ.
މުއިއްޒު އެހެން ވިދާޅުވިޔަސް ލޯކަލް ގަވަރުމަންޓް އޮތޯރިޓީގެ އިދާރީ މަސައްކަތްތަކާއި ހިންގުން ހަވާލުކޮށްފައި އޮންނަނީ އެ އޮތޯރިޓީ ސީއީއޯއަށެވެ. ސީއީއޯއަކީ ރައްޔިތުންގެ މަޖިލިހުގެ މެންބަރުންގެ މެދުގައި ނަގާ ވޯޓަކުން ރުހުން ދީގެން އައްޔަން ކުރާ މަގާމެކެވެ.
އެ އޮތޯރިޓީގެ ރައީސަކަށް ހުންނަވަނީ އޭރެއްގައި ހުންނަވާ ހޯމް މިނިސްޓަރެވެ. ހޯމް މިނިސްޓަރު ނުވަތަ ސަރުކާރުން ކަނޑައަޅާ ވަޒީރަކު އެ އޮތޯރިޓީގައި ބައިވެރިވުމުގެ ބޭނުމަކަށް ގާނޫނުގައި އޮންނަނީ ސަރުކާރުގެ ސިޔާސަތުތަކާއި ގައުމީ ތަރައްގީގެ ޕްލޭންތައް ކައުންސިލްތަކާ ހިއްސާ ކުރުމަށް އެކަންޏެވެ.
ނޮޅިވަރަންފަރުގައި ވާހަކަ ދައްކަވަމުން މުއިއްޒު ވިދާޅުވީ ލާމަރުކަޒީ ނިޒާމު ހިންގުމުގެ އަނެއް ބޭނުމަކީ ސަރަހައްދުތަކުގެ ތަރައްގީގެ ހަރުދަނާ ޕްލޭނެއްގެ ތެރެއިން އެ ކަން ކުރުމެވެ. އޭނާގެ މެނިފެސްޓޯގައި ހަތް ސަރަހައްދަކަށް ތަރައްގީ ބަހާލުމަށް ވިސްނެވީ އެ މަގުސަދުގައި ކަމަށް ވިދާޅުވި އެވެ.
ހަތް ސަރަހައްދުގެ ތެރޭގައި، ތިން އާބަން ޑިވެލޮޕްމަންޓް ޒޯން ތަރައްގީ ކުރަން ހިމަނާފައި އޮތް އިރު އެއިން އެއް ޒޯނަކީ ހއ. އަތޮޅު، ހދ. އަތޮޅު، އަދި ށ. އަތޮޅު ހިމެނޭ އުތުރުގެ ޒޯނެވެ.
އެ ޒޯނުގައި ތަރައްގީގެ ބޮޑެތި މަޝްރޫއުތަކެއް ހިންގާއިރު އެ ސަރަހައްދުގައި ބިން ބޮޑެތި ރަށްތައް ހިމެނޭ ކަން މުއިއްޒު ފާހަގަ ކުރެއްވި އެވެ. ނޮޅިވަރަންފަރަކީ ވެސް އެއިން އެއް ރަށަށްވީއިރު އެ ރަށަކީ އޭނާގެ ސަރުކާރެއްގައި އުތުރުގެ ޒޯން ތަރައްގީ ކުރުމުގައި ހާއްސަ ދައުރެއް އޮންނާނެ ރަށެއް ކަމަށް ވިދާޅުވި އެވެ.
