ރިޔާސީ އިންތިހާބުގެ ދެ ވަނަ ބުރުގައި ވެސް އެމްޑީއޭއިން ތާއިދު ކުރަނީ އެމްޑީޕީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހަށް ކަމަށް، އެ ޕާޓީގެ ނައިބު ލީޑަރު އަލީ މައުރޫފު މިރޭ ވިދާޅުވެއްޖެ އެެވެ.
މައުރޫފު "އަދަދު" ނޫހަށް ވިދާޅުވީ އެ ޕާޓީ ކޯލިޝަނުން "ގެއްލިއްޖެ ކަމަށް،" ނުވަތަ "ކޯލިޝަނުން ވަކިވެއްޖެ ކަަމަށް" އަޑުފެތުރީ، އެމްޑީޕީގެ ޖަގަހައިގައި މިރޭ ބޭއްވި ރައީސް ސޯލިހު ބައިވެރިވެވަޑައިގެންނެވި ޖަލްސާގައި އޭނާ ނުވަތަ އެމްޑީއޭގެ ލީޑަރު އަހުމަދު ސިޔާމް މުހައްމަދު ބައިވެރިވެވަޑައި ނުގެންނެވުމުން ކަމަށެވެ.
"އަޅުގަނޑުމެންގެ ލީޑަރާއި ރައީސް ސޯލިހާ މިހާރު ވެސް ގުޅުން އެބަ އޮތް. އަޅުގަނޑުމެން މަސައްކަތް މި ކުރަނީ ރައީސް ސޯލިހުގެ ކޯލިޝަނާއެކު. އެ ނޫން ވިސްނުމެއް ނެތް،" މައުރޫފު ވިދާޅުވި އެވެ.
މިރޭ ބޭއްވި ޖަގަހަ ޖަލްސާއަކީ، ފަރަތަމަ ބުރުގެ ނަތީޖާއަށް ފަހު ސަފުތައް ރުކުރުވާލައި، ޖޯޝް ޖެއްސުމުގެ ބޭނުމުގައި ކުރިއަށް ގެންދިޔަ ޕްރޮގްރާމެކެވެ.
ރިޔާސީ އިންތިހާބުގެ ދެ ވަނަ ބުރު އޮންނާނީ ސެޕްޓެމްބަރު 30 ގައެވެ. ދެ ވަނަ ބުރުގައި ވާދަ ކުރައްވާނީ ރައީސް ސޯލިހު އާއި މުއިއްޒެވެ.
