މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގައި ތިން ވަނަ އަށް އެންމެ ގިނަ ވޯޓު ލިބުނު ދަ ޑިމޮކްރެޓްސް ގެ ފަރާތުން ރިޔާސީ އިންތިހާބުގެ ދެވަނަ ބުރުގައި މަސައްކަތް ކުރާނެ ގޮތެއް ނިންމުމަށް ޓަކައި ޕާޓީތަކާ މަޝްވަރާކުރާނެ ކޮމިޓީއެއް ނަގައިފި އެވެ.
ދަ ޑިމޮކްރެޓްސްގެ އިންޓެރިމް ކައުންސިލުުން މިއަދު ބޭއްވި ބައްދަލުވުމުގައި ކޮމިޓީއެއް އެކުލަވައިލީ ރިޔާސީ އިންތިހާބުގެ ދެވަނަ ބުރަށް ވަޑައިގެންނެވި ދެ ކެންޑިޑޭޓުންގެ ތެރެއިން ކެންޑިޑޭޓަކަށް ތާއީދުކުރަން ނުވަތަ އެއްވެސް ކެންޑިޑޭޓަކަށް ތާއީދުނުކުރަން ނިންމުމުގެ ކުރިން ސިޔާސީ ޕާޓީތަކާ މަޝްވަރާ ކުރުމަށެވެ. ޕާޓީތަކާ މަޝްވަރާކުރަން ޑިމޮކްރެޓުން ނެގީ އަށް މެމްބަރުންގެ ކޮމިޓީ އެކެވެ.
މަޝްވަރާކުރާ ކޮމިޓީގެ މެމްބަރުން
- ރައްޔިތުންގެ މަޖިލީހުގެ ހުޅުދޫ ދާއިރާގެ މެމްބަރު އަދި ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބް
- އިލްޔާސްގެ ރަނިންމޭޓްގެ ގޮތުގައި ނުކުންނެވި ހުސައިން އަމްރު
- ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު އަދި ޑިމޮކްރެޓްސްގެ އިންޓެރިމް ޗެއާޕާސަން ހަސަން ލަތީފު
- ރައްޔިތުންގެ މަޖިލީހުގެ ނައިބުރައީސް އީވާ އަބްދުﷲ
- ރައީސް އޮފީހުގެ ކުރީގެ މިނިސްޓަރު މުހައްމަދު ޝިފާޒް
- ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް
- ނ.އަތޮޅު ކައުންސިލްގެ ރައީސް މުހައްމަދު ބަޝީރު
- މުހައްމަދު އަންސަރު
މި ކޮމިޓީގައި ހިމެނިވަޑައިގަންނަވާ ފުރަތަމަ ހަ ބޭފުޅުންގެ ނަން ހުށަހެޅުއްވީ ވިލުފުށި ދާއިރާގެ މެމްބަރު ހަސަން އަފީފެވެ. ބަޝީރާއި އަންސަރުގެ ނަން ކޮމިޓީއަށް އިތުރުކުރީ އޭގެ ފަހުން ހުށަހެޅި ހުށަހެޅުމަކުންނެވެ. ކޮމިޓީ ފާސްކުރީ އިންޓެރިމް ކައުންސިލްގެ މިއަދުގެ ބައްދަލުވުމުގައި ބައިވެރިވި 56 މެމްބަރުންގެ ތެރެއިން 39 މެމްބަރުންގެ ތާއީދާ އެކުގަ އެވެ.
ބައްދަލުވުން ނިންމަވައިލައްވަމުން ހަސަން ލަތީފު ވިދާޅުވީ މިއަދު ނެގި ކޮމިޓީން ކުރާ މަސައްކަތްތަކުގެ މައުލޫމާތު ކައުންސިލާ ހިއްސާކުރައްވަމުން ގެންދަވާނެ ކަަމަށެވެ.
ރިޔާސީ އިންތިހާބުގެ ދެވަނަ ބުރަށް ޕާޓީތަކާ އެކު މަޝްވަރާކުރަން ޑިމޮކްރެޓުން ކޮމިޓީއެއް ނެގި ނަަމަވެސް މިއަދު ބޭއްވި ކައުންސިލް ބައްދަލުުވުމުގައި ވާހަކަދެއްކެވި ގިނަ ބޭފުޅުން ވިދާޅުވީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހަށް ތާއީދުނުކުރައްވާނެ ކަމަށެވެ.
