ރިޔާސީ އިންތިހާބުގައި މިއަދު ލިބިވަޑަައިގެންނެވި ކާމިޔާބީއަށްފަހު އެހެން ޕާޓީތަކާ ކޯލިޝަން ހަދަން ޕީޕީއެމް/ޕީއެންސީގެ ލީޑާޝިޕުން މަޝްވަރާ ކުރާނެ ކަމަށް އިދިކޮޅު ކެންޑިޑޭޓު ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ސަޕޯޓަރުންނާ ބައްދަލު ކުރެއްވުމަށްފަހު ސްޓެލްކޯ ކައިރިން ނޫސްވެރިންނާ ވާހަކަ ދައްކަވަމުން ޑރ. މުއިއްޒު ވިދާޅުވީ މިއަދުގެ ކާމިޔާބީއަކީ ކުރިން ވެސް އުއްމީދު ކުރި ނަތީޖާއެއް ކަމަށާއި އެދެނީ ރާއްޖެ އަނބުރާ ހޯދަން ކަމަށެވެ.
"ލީޑާޝިޕުގައި މަޝްވަރާ ކުރާނެ. އަޅުގަނޑުމެން އެދެނީ ދިވެހިންގެ ރާއްޖެ ދިވެހިންނަށް ލިބުމަށް،" ޑރ. މުއިއްޒު ވިދާޅުވި އެވެ.
މިއަދު ބޭއްވި ރިޔާސީ އިންތިހާބުގައި މުއިއްޒަށް 100،322 ވޯޓު ލިބިވަޑައިގަތެވެ. އެއީ ވޯޓުލާން ނުކުތް މީހުންގެ 45.1 ޕަސެންޓެވެ. ދެ ވަނައަށް ވަޑައިގެންނެވި އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހަށް ލިބިވަޑައިގަތީ 85،045 ވޯޓެވެ. އެއީ ވޯޓުލީ މީހުންގެ 38.2 ޕަސެންޓެވެ.
އޭގެ އިތުރުން މިރޭ ނޫސްވެރިންނާ ވާހަކަ ދައްކަވަމުން ޑރ. މުއިއްޒު ވަނީ އޭނާއަށް ތާއީދު ކުރި މީހުންނަށް ޝުކުރު އަދާ ކުރައްވައިފަ އެވެ. އަދި ވިދާޅުވީ ރައްޔިތުން ވޯޓުލާން ނުކުތީ ގައުމީ ރޫހެއްގައި ކަމަށެވެ.
"އާދެ، ވަރަށް ބޮޑަށް ޝުކުރު ދަންނަވަން ދިވެހި ލޮބުވެތި ރައްޔިތުންނަށް އަޅުގަނޑުމެންނަށް ކުރެއްވި އިތުބާރާއި ދެއްވި ތާއީދަށްޓަކައި. ހަގީގަތުގައި މިއަދު މިއީ އަޅުގަނޑު ވަރަށް އުފާ ކުރާ ދުވަހެއް. އެކިއެކި ނުފޫޒުތަކާއި އެކި ފިއްތުންތަކުގެ ކުރިމަތީގައި ދިވެހި ރައްޔިތުން ގައުމީ ރޫހެއްގައި ނިކުމެވަޑައިގެން މި ދެއްކެވީ ވަރަށް ވަރުގަދަ މިސާލެއް،" މުއިއްޒު ވިދާޅުވި އެވެ.
މިއަދުގެ އިންތިހާބުގައި ވޯޓުލުމުގެ ހައްގު ލިބުނު 282,395 މީހުންގެ ތެރެއިން 223،092 މީހުން ވޯޓު ދިނެވެ. އެއީ ހައްގު ލިބުނު އާބާދީގެ 79 ޕަސެންޓެވެ. އިދިކޮޅު ކެންޑިޑޭޓު މުއިއްޒާއި ރައީސް ސޯލިހުގެ އިތުރުން މި އިންތިހާބުގައި ހަ ކެންޑިޑޭޓުން ވާދަ ކުރި އެވެ.
