އުއްމީދު ކުރި މިންވަރަށް ވޯޓު ނުލިބުމުން ދެރަ ކަމަށާއި ނަމަވެސް ހިތްވަރު އެލުވާނުލުމަށް ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަން ފައްޔާޒް އިސްމާއިލް މިރޭ ވިދާޅުވެއްޖެ އެވެ.
މިއަދު ކުރިއަށްގެންދިޔަ ރިޔާސީ އިންތިހާބުގެ ވޯޓުތައް ގުނާ ނިމެން ގާތްވެފައިވާއިރު، 87،000 އަށް ވުރެ ގިނަ ވޯޓު ހޯއްދަވައިގެން ކުރީގައި އުޅުއްވަނީ އިދިކޮޅު ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުއިއްޒެވެ.
އެއާއެކު މިރޭ ފައްޔާޒް ވިދާޅުވީ ދެ ވަނަ ބުރެއް ކަށަވަރުވެފައިވާ ކަމަށާއި މިހާރު މަސައްކަތް ކުރަންވީ ސެޕްޓެމްބަރު 30، ގައި ބާއްވާ އިންތިހާބު ކާމިޔާބު ކުރުމަށް ކަމަށެވެ.
"އަޅުގަނޑުމެން އުއްމީދު ކުރި ނަތީޖާ ނުލިބުމަކީ ދެރަ ކަމެއް. އެހެނަސް ﷲގެ އިރާދަފުޅާއެކު ދެ ވަނަ ބުރެއްގެ ފުރުސަތު އެބަ ލިބޭކަން މިހާރު ކަށަވަރު އެބަވޭ. ވީމާ އަނެއްކާވެސް އަތްކުރި އޮޅާލައި، އިހުނަށްވުރެ ވަރުގަދައަށް މަސައްކަތް ފަށަންވީ،" ފައްޔާޒް ވިދާޅުވި އެވެ.
މިއަދުގެ އިންތިހާބުގެ ކުރިން ރައީސް ސޯލިހާއި އެމްޑީޕީގެ ކެމްޕެއިނުން މަސައްކަތް ކުރީ އެއްބުރުން އިންތިހާބު ކާމިޔާބު ކުރުމަށެވެ. ރައީސް ސޯލިހު ވިދާޅުވެފައި ވަނީ އެމަނިކުފާނަށް 130،000 ވޯޓު ކަށަވަރުވާ ކަމަށެވެ.
"ފުރިހަމަ ޔަގީންކަން އެބަ އޮތް މި އިންތިހާބު އެއްބުރުން ނެގޭނެ ކަމަށް. 90 ޕަސެންޓު މީހުން ވޯޓުލާނެ ކަމަށް ބެލިޔަސް މިއަދު ވެސް މިތިބީ 130,000 ވޯޓު ކަށަވަރު ކޮށްގެން. މިއަކީ އެއްވެސް ވާދަވެރިޔަކަށް ކުރިއަށް އޮތް ތަނުގައި އަރާ ހަމަ ކުރެވޭނެ އަދަދެއް ނޫން," ރައީސް ސޯލިހު ވިދާޅުވެފައިވެ އެވެ.
މިއަދު އިންތިހާބު ކުރިއަށްދަނިކޮށް ރައީސް ސޯލިހު ވިދާޅުވެފައި ވަނީ ވޯޓު ލިބުމުގެ ހައްގު ލިބޭ 282,395 މީހުންގެ ތެރެއިން ގާތްގަނޑަށް 90 ޕަސެންޓު މީހުން ވޯޓުލާން ނުކުންނާނެ ކަމަށެވެ. ނަމަވެސް އިލެކްޝަންސް ކޮމިޝަނުން ބުނީ ވޯޓުލާފައި ވަނީ ގާތްގަނޑަކަށް 75 ޕަސެންޓު މީހުން ކަމަށެވެ.
