ހުޅުމާލެއަށް ވަންނަ ނެރުމަތިން ދެ ލޯންޗެއް ޖެހި ނުރައްކާތެރި އެކްސިޑެންޓެއް ހިނގައި 26 މީހަކަށް އެކިވަރުގެ އަނިޔާވެއްޖެ އެވެ.
އެމްއެންޑީއެފުން ބުނި ގޮތުގައި މި ހާދިސާ ހިނގާފައިވަނީ މިރޭ 8:00 ހާއިރު އެވެ. ހާދިސާގެ ރިޕޯޓު ލިބުމާއެކު ކޯސްޓުގާޑުގެ އުޅަނދަކާއި މެރިން ޕޮލިސްގެ ލޯންޗެއް އެ ސަރަހައްދަށް ގޮސްފައިވާ ކަމަށް ވެސް އެމްއެންޑީއެފުން ބުނެފައިވެ އެވެ.
މި ހާދިސާގައި އެކްސިޑެންޓުވި ދެ ލޯންޗުގެ ތެރެއިން އެއް ލޯންޗަކީ މާލެ އަތޮޅުގައި އޮންނަ ޖޯއީ އައިލެންޑު ރިސޯޓުން ދަތުރުކުރަމުންދިޔަ ލޯންޗެކެވެ. އަނެއް ލޯންޗަކީ ލިއޯ ޓްރޭޑިން ކުންފުނީގެ ލޯންޗެކެވެ.
އެކްސިޑެންޓުވި ލޯންޗުތައް ހުޅުމާލެ ފަޅު ތެރޭގައި : އެއް ލޯންޗުގެ ކައްޕީގެ ހާލު ސީރިއަސް - ފޮޓޯ: އެމްއެންޑީއެފް
"ރިސޯޓުން ދަތުރުކުރި ލޯންޗުގައި 13 ފަތުރުވެރިޔަކާއި ތިން ފަޅުވެރިން ތިބި، އެންމެނަށްވެސް ކުދި އަނިޔާ ލިބިފައިވޭ، ލިއޯ ޓްރޭޑިންގެ ލޯންޗުގައި އެ ކުންފުނީގެ އަށް މުވައްޒަފުންނާއި ދެ ފަޅުވެރިން ތިބި،" އެމްއެންޑީއެފް އިން ބުންޏެވެ.
އެމްއެންޑީއެފުން ބުނީ ޖޯއީ އައިލެންޑު ލޯންޗުގައި ތިބި އެންމެވެސް ވެލާނާ އިންޓަނޭޝަނަލް އެއާޕޯޓަށް ގެންގޮސްފައިވާ ކަމަށާއި އެ އެންމެނަށް ވެސް ކުދި ހާނިއްކަ ލިބުނު ނަމަވެސް ހާލު ރަނގަޅު ކަމަށެވެ.
ލިއޯ ޓްރޭޑިންގެ ލޯންޗުގައި ތިބި މީހުންގެ ތެރެއިން ފަސް މީހަކަށް ބޮޑެތި އަނިޔާ ލިބިފައިވާއިރު އެ ލޯންޗުގެ ކައްޕީގެ ހާލު ސީރިއަސް ކަމަށް ވެސް ވަނީ ބުނެފަ އެވެ. އެ ފަރާތްތަކަށް ފަރުވާ ދެމުންދަނީ ހުޅުމާލެ ހޮސްޕިޓަލުގަ އެވެ.
މި ދެ ލޯންޗުން ދަތުރުކުރި މީހުންގެ ތެރެއިން އެއްވެސް މީހަކު ގެއްލިފައިނުވާކަން ސިފައިން ވަނީ ކަށަވަރުކޮށްދީފަ އެވެ.
