އޭނާގެ ވެރިކަމެއްގައި ފެނާއި ކަރަންޓު ހިދުމަތުގެ އަގު ވިޔަފާރިތަކާއި ގޭބިސީތަކުގައި ފަރަގެއް ނުގެންގުޅޭނެ ކަމަށާއި އަގު ކުރާނީ އެއް ރޭޓަކުން ކަމަށް، ޖުމްހޫރީ ޕާޓީގެ ރިޔާސީ ކެންޑިޑޭޓު އަދި އެ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.
ހއ. ހޯރަފުށީގައި އިއްޔެ ބޭއްވި ޖުމްހޫރީ ޕާޓީގެ ޖަލްސާގައި ގާސިމް ވިދާޅުވީ އޭނާ އަށް ވެރިކަން ލިބިވަޑައިގެންފި ނަމަ، ކަރަންޓު ބިލާއި ފެން ބިލް ނުދެއްކިގެން މިހާރު ޖޫރިމަނާ އަށް އަރާފައިވާ ފައިސާ މައާފުކޮށް ދެއްވާނެ ކަމަށެވެ.
ސޯޝަލް ހައުސިން ހިލޭ ދޭނެ ކަމަށާއި، އަލަތު ކައިވެންޏަށް ފްލެޓެއް އަދި މިހާރު ހުރި ހުރިހާ ސޯޝަލް ހައުސިންއެއްގެ ކުލި މައާފުކޮށް ދެއްވާނެ ކަމަށް ގާސިމް ވިދާޅުވި އެވެ. ކުލި މައާފުކޮށް ދެނީ މާލޭން ހިލޭ ބިން ދީފައި، ފްލެޓުތަކުން ކުލި ނެގުމަކީ އިންސާފެއްގެ ގޮތުގައި ގަބޫލު ނުކުރެއްވޭތީ ކަމަށް އޭނާ ވިދާޅުވި އެވެ.
ހޮނިހިރު ދުވަހު ބާއްވާ ރިޔާސީ އިންތިހާބަށް ކުޑަތަންވެފައި ވާއިރު، ރައްޔިތުން ވޯޓު ދޭންވީ ޓްރެކް ރިކޯޑު އެންމެ ރަނގަޅު ކެންޑިޑޭޓަކަށް ކަމަށް ގާސިމް ވިދާޅުވި އެވެ.
"އެއީ އަޅުގަނޑު ކަމަށް ވަންޏާ އަޅުގަނޑު. މި ތިއްބެވި ބޭފުޅުން ދެއްކެވި ވާހަކައިން ކަމަށް ވަންޏާ އަދި އެހެން މީހުން ދައްކާ ވާހަކައިން ކަމަށް ވަންޏާ އަޅުގަނޑާ އެއްވަރުގެ ޓްރެކް ރެކޯޑެއް އޮތް، ސާފުތާހުރި، އެނަޖެޓިކް، އަދި ތަޖުރިބާ ހުރި ކަންތައްތައް ކުރުމުގެ ވިސްނުމާއި ގާބިލިއްޔަތު [އެހެން ކެންޑިޑޭޓެއްގެ ކިބައިގައި] ނެތް" ގާސިމް ވިދާޅުވި އެވެ.
ރާއްޖޭގައި ހުންނެވި އެންމެ ބޮޑު އެއް މަހުޖަނު ވިދާޅުވީ އޭނާ އެޅުއްވަނީ ވެރިކަމުގެ ދަހިވެތިކަމުގައި ނޫން ކަމަށާއި މިފަހަރު ވެސް ވާދަ ކުރެއްވީ އިސްލާހަށް މަސައްކަތް ކުރާ މީހަކަށް ވާތީވެ، ގައުމު އޮތް އަނދަވަޅު ސަލަމާތް ކުރުމަށް ކަމަށެވެ. ވެރިކަން ބޭނުން ވާނަމަ އޭނާ ހުންނެވީހީ އެންމެ ބޮޑު އެމްޑީޕީ ނުވަތަ ޕީޕީއެމްގެ ލީޑަރެއްގެ ގޮތުގައި ކަމަށް ވެސް ވިދާޅުވި އެވެ.
"އަޅުގަނޑު އެކަން ކުރަން ހުރި ނަމަ ލާހިކެއް ނޫން އެހެން މީހަކަށް ކުޅަދާނައެއް ނޫން ކައިރިވެލަން ވެސް. އެއީ ކަށަވަރު ކަމެއް. އެއީ އެތަންތަން އުފެއްދީ އަޅުގަނޑު މަސައްކަތް ކޮށްގެން އަޅުގަނޑު. ވަރަށް ގިނަ މީހުންނަށް އެނގޭނެ މިކަން ވެސް،" ގާސިމް ވިދާޅުވި އެވެ.
