ކުދި އަދި އަމިއްލަ ވިޔަފާރިވެރިންނަށް ގޮސް މަސައްކަތް ކުރެވޭ ގޮތަށް ހުޅުމާލޭ ކޮންޓެއިނަރު ޕާކުގައި ހެދި "ކޯ-ވޯކިން ސްޕޭސް" މިއަދު ހުޅުވައިފި އެވެ.
އެއީ އިކޮނޮމިކް މިނިސްޓްރީ އާއި ބިޒްނަސް ސެންޓަރު އަދި އާބަންކޯއިން ގުޅިގެން ކުރިއަށްގެންދިޔަ ޕްރޮޖެކްޓެކެވެ. އާބަންކޯއިން ބުނީ އަލަށް ވިޔަފާރި ފަށާ މީހުންނާއި ކަމެއް ފަށަން ބޭނުންވާ މީހުން އަދި ގްރޫޕުތަކަށް އެތަނަށް ގޮސް މަސައްކަތް ކުރެވޭނެ ކަމަށެވެ.
އާބަންކޯއިން ބުނީ، ހުކުރު ދުވަސް ނޫން އެހެން ހުރިހާ ދުވަހު ވޯކިން ސްޕޭސް ހުޅުވާފައި ހުންނާނެ ކަމަށާއި ތަން ހިފަންޖެހޭނީ އޮންލައިން ޕޯޓަލެއް މެދުވެރިކޮށް ބުކް ކުރުމަށްފަހު ކަމަށެވެ. ފުރަތަމަ މަހު އެތަން ދޫކުރަން ނިންމާފައި ވަނީ ހިލެ އެވެ.
އާބަންކޯއިން ބުނީ އެތަނުގެ މައިގަނޑު މަގުސަދަކީ "ލައިވްލީ އަދި ކޮމިއުނިޓީ އެންގޭޖިން" މަސައްކަތުގެ މާހައުލެއް އުފެއްދުން ކަމަށެވެ. އަދި އެތަން މެދުވެރިކޮށް ޒުވާނުންނަށް ވަރަށް ގިނަ ފުރުސަތުތައް ފަހިވެގެންދާނެ ކަމަށް ވެސް އެ ކުންފުނިން ބުނެ އެވެ.
އޭގެ އިތުރުން އާބަންކޯއިން ބުނީ ކޮންޓެއިނަރު ޕާކުގައި ވަރަށް އަވަހަށް މީޓީން ރޫމަކާއި ޓޭކްއަވޭ ކެފޭއަކާއި ފާސްޓްފުޑް ރެސްޓޯރަންޓެއް ހުޅުވާނެ ކަމަށެވެ.
