ސެޕްޓެމްބަރު 9, ގައި އޮންނަ ރިޔާސީ އިންތިހާބުގައި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒުއަށް ދޭ ވޯޓަކީ ގައުމު އަނބުރާ ހަލާކުގެ ތެރެއަށް ވައްޓާލުމަށް ދެވޭ ވޯޓެެއް ކަމަށް އެމްޑީޕީގެ ކެންޑިޑޭޓު ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އިންތިހާބަށް އެންމެ ހަތަރު ދުވަހަށް ވެފައިވާއިރު ރިޔާސީ ކެމްޕޭނުގައި ރައީސް މިވަގުތު ގެންދަވަނީ ރ. އަތޮޅަށް ދަތުރުފުޅެއް ކުރައްވަމުންނެވެ. އިންތިހާބުގައި ވޯޓުލުމުގެ ކުރިން ވަރަށް ވިސްނަން ޖެހޭ ކަމަށާއި އެއީ ގާނޫނު އަސާސީން ރައްޔިތުންނަށް މަތިކޮށްފައިވާ ވަރަށް ބޮޑު އަމާނާތެއް ކަމަށް ރ. މާކުރަތުގައި ހުންނަވައި މިއަދު ރައީސް ވިދާޅުވި އެވެ.
މިއީ ގައުމުގެ މުސްތަގުބަލު ކަނޑައެޅުމުގައި ކޮންމެ ރައްޔިތަކު ވެސް އަދާކުރަން ޖެހޭ ވާޖިބެއް ކަމަށާއި މި އިންތިހާބުގައި އޮތީ އެމްޑީޕީ އާއި ޕީޕީއެމްގެ ވާދަވެރިކަން ކަމަށް ރައީސް އަނެއްކާ ވެސް ތަކުރާރު ކުރެއްވި އެވެ. އަދި, ޑރ. މުއިއްޒު އިންތިހާބުވެވަޑައިގަތަސް ސަރުކާރާ ހަވާލުވާނީ 2013 އިން 2018 އަށް ވެރިކަން ކުރި މީހުން ކަމަށް ރައީސް ވިދާޅުވި އެވެ.
ރައީސް ވިދާޅުވާ ގޮތުން އެއީ ރާއްޖެ ދުށް އެންމެ ނާމާން އަދި އުނދަގޫ ދުވަސްވަރެވެ.
"އެ ދުވަސްތައް ހަނދާންކޮށް ތަކުރާރުކޮށް އެޔާ މެދު ވިސްނަން ޖެހޭ. ޑރ. މުއިއްޒު, ޕީއެންސީގެ ކެންޑިޑޭޓަށް ވޯޓު ދީފިއްޔާ, އެ ކާމިޔާބުވާ ކަމަށް ވަންޏާ އަނެއްކާ ވެސް އެނބުރި ދެވޭނީ އެ ބިރުވެރި ނާމާންކަމަށް. އެއީ އަޅުގަނޑުމެންނަށް އޮތް ޗޮއިސެއް ނޫން," ރައީސް ވިދާޅުވި އެވެ.
އެ އަނިޔާވެރިކަމުގެ ތެރެއަށް ދިޔުމަކީ އެއްވެސް ރައްޔިތަކަށް އަދި ގައުމަށް ވެސް އޮތް ޗޮއިސެއް ނޫން ކަމަށް ރައީސް ވިދާޅުވި އެވެ. މުއިއްޒުގެ އިތުރުން ވެސް އިންތިހާބުގައި ވާދަކުރާ އެހެން ކެންޑިޑޭޓުން ތިއްބެވި ކަމަށާއި ނަމަވެސް އޭގެ ތެރެއިން ކޮންމެ ބޭފުޅަކަށް ވެސް ދޭ ވޯޓަކީ އިސްރާފެއްގެ ގޮތުގައި ރައީސް ސިފަ ކުރެއްވި އެވެ.
"މި އިންތިހާބުގައި އެމްޑީޕީއަށް ވޯޓު ދިނުން ނޫން ގޮތެއް ނެތް. ޕީއެންސީއަށް ވޯޓު ދީފިއްޔާ ވާނެ ގޮތް މި ދެންނެވީ. މުޅި ގައުމު އަނެއްކާ ވެސް ހަލާކުގެ ތެރެއަށް އަނބުރާ މިދަނީ. ދެން ތިއްބެވި ބޭފުޅުންނަށް ވޯޓު ދީފިއްޔާ އެއީ ގެއްލޭ އެއްޗެއް. އެކަމެއް ކުރެވެން ނެތް,"
ރާއްޖޭގެ މުސްތަގުބަލަށްޓަކައި ވެސް ގާނޫނު އަސާސީން ހަވާލުކޮށްފައިވާ އަމާނާތުގައި ހިފައި ވޯޓުލާން ރައީސް އެދިވަޑައިގެންނެވި އެވެ. އަދި, އޮތް ހަމައެކަނި ޗޮއިސަކީ އެމަނިކުފާނަށް ވޯޓު ދިނުން ކަމަށް ވިދާޅުވި އެވެ.
މިދަނީ ރާއްޖެއަށް ތަފާތު ބޮޑު ހެޔޮ ބަދަލެއް ގެނައުމަށް ކަމަށާއި ރޭވިފައި ހުރި މަޝްރޫއުތައް ނިމުމުން ފެންނާނީ ރާއްޖެއަށް މުޅިން އާ ޒަމާނެއް ކަމަށް ރައީސް ވިދާޅުވި އެވެ. އަދި ހުރިހާ ބޭފުޅުން ވެސް އެކަމުގައި ބައިވެރިވުމަށް ރައީސް ދައުވަތު އެރުވި އެވެ.
މާކުރަތަށް ވި ވައުދުތައް
- ބިން ހިއްކުން
- ހައުސިން ޔުނިޓް އެޅުން
- ފެން ބޮޑުވާ މަގުތައް ޒަމާނީ ފެންވަރަށް ހަދައި ތަރައްގީކުރުން
- ސްޕޯޓްސް ކޮމްޕްލެކްސް ގާއިމުކުރުން
- ސްކޫލުގައި މަލްޓި ޕާޕޮސް ހޯލް އެޅުން
- ސިއްހީ މަރުކަޒުގައި ލެބޯޓަރީގެ ހިދުމަތް ފެށުން
- ދޯނި އެހެލާ ސަރަހައްދެއް ގާއިމުކުރުން
