ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ހައުސިން މިނިސްޓަރުކަމުގައި ހުންނެވި އިރު ސިނަމާލެ ބްރިޖްއެޅި ކުންފުނިން އެކައުންޓަށް ޖަމާވީ ކުލީގެ ފައިސާކަމަށް އިދިކޮޅުން ބުނެފި އެވެ.
ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލް "އަދަދު"އަށް ވިދާޅުވީ މުއިއްޒުގެ އެކައުންޓަށް ކޮންމެ މަހަކު ވަން ޑޮލަރަކީ ގެއިން ކުއްޔަށް ދީފައިވާ ދެ އެޕާޓްމެންޓުގެ ކުލީގެ ފައިސާ ކަމަށެވެ.
"ޑރ. މުއިއްޒުގެ އެކައުންޓަށް ކޮންމެ މަހަކު ޖަމާވި ޑޮލަރަކީ އެމަނިކުފާނުގެ ރޯހައުސް އިން ކުއްޔަށް ދޫކޮށްފައިވާ ދެ އެޕާޓްމެންޓު ކުލީގެ ގޮތުގައި އެފަރާތްތަކުން ދައްކަމުން ގެންދާ ފައިސާ," ތޮލާލް ވިދާޅުވެފައިވެ އެވެ.
އެކަން ބޭންކަށް ވެސް އަންގާފައިވާނެ ކަމަށާއި، އެ ފައިސާ ރޯހައުސް ލިބުނު ހިސާބުން ފެށިގެން ސިނަމާލެ ބްރިޖް އެޅި ކުންފުނިން ދެ އެޕާޓްމެންޓު ނަގާފައިވާ ކަމަށް ތޮލާލް ވިދާޅުވި އެވެ. ތޮލާލް ވިދާޅުވީ މުއިއްޒު ގެންދަވަނީ އިންކަމް ޓެކްސްގެ ގޮތުގައި ދައްކަން ޖެހޭ ފައިސާ ވެސް ބަރާބަރަށް ދައްކަވަމުން ކަމަށާއި ސިއްރުކުރަން ޖެހޭ އެއްވެސް ކަމެއް މުއިއްޒު ނުކުރައްވާނެ ކަމަށެވެ.
ހައުސިން މިނިސްޓަރު ކަމަށް ހުންނެވިއިރު 2015 އިން ފެށިގެން ނޮވެމްބަރު، 201، ގެ ނިޔަލަށް މުއިއްޒުގެ އެކައުންޓަށް ބޭރުގެ ކުންފުނިތަކާއި ރާއްޖޭގެ ބައެއް އަމިއްލަ ފަރާތްތަކުން ގިނަ އަދަދެއްގެ ފައިސާ ޖަމާކޮށްފައިވެ އެވެ. އަދި މުއިއްޒުގެ އެކައުންޓުން ގިނަ އަދަދެއްގެ ޓްރާންސެކްޝަން އެކި ފަރާތްތަކަށް ހަދައިފައި އެބަ ހުއްޓެވެ.
މުއިއްޒުގެ ނަމުގައި ބޭންކް އޮފް މޯލްޑިވްސް (ބީއެމްއެލް) ގައި ހުޅުވާފައިވާ ޔޫއެސް ޑޮލަރު އެކައުންޓަށް ފެބްރުއަރީ 01, 2017 އިން ފެށިގެން އޮކްޓޯބަރު 15, 2018 ގެ ނިޔަލަށް ޖަމާވެފައިވާ ޔޫއެސް ޑޮލަރުގެ ތަފްސީލު ލިޔެކިޔުންތަކެއް "އަދަދު" ނޫހަށް ވަނީ ލިބިފަ އެވެ.
އެ ލިޔެކިޔުންތަކުން އެނގޭ ގޮތުގައި ފާހަގަކޮށްލެވޭ ބޮޑު އަދަދުތަކެއް ތިން ކުންފުންޏަކުން މުއިއްޒުގެ އަމިއްލަ ނަމުގައި އޮތް ޑޮލަރު އެކައުންޓަށް ޖަމާކޮށްފައިވެ އެވެ.
މި ނޫހުގެ "އެތެރެފުށް" ޕްރޮގްރާމުގައި ވާހަކަ ދައްކަވަމުން މުއިއްޒު ވިދާޅުވީ އޭނާގެ އަމިއްލަ އެކައުންޓަށް ގަވާއިދާ ހިލާފަށް އެއްވެސް ފައިސާއެއް ޖަމާވެފައި ނޯންނާނެ ކަމަށެވެ. އަދި ރޭ ލ. ފޮނަދޫގައި ބޭއްވި ޖަލްސާއެއްގައި ވާހަކަ ދައްކަވަމުން މުއިއްޒު ވިދާޅުވީ "އަޅުގަނޑު ކަންބޮޑުވާންޖެހޭ އެއްވެސް ކަމެއް ނޯންނާނެ" ކަމަށާއި ފޮރުވާނެ އެއްވެސް ކަމެއް ވެސް ނެތް ކަމަށެވެ.
"އަޅުގަނޑަކަށް ކުރިމައްޗެއް ނުކުރެވޭނެ ޖަބާދު ނުދެވޭ ސުވާލެއް. އެއްވެސް ތުހުމަތަކުން އަޅުގަނޑު އެކަމަކުން ރެކޭނެ ކަމެއް ނޯންނާނެ. ގާނޫނާ ގަވާއިދާ ހިލާފަށް އެއްވެސް އިރަކު ކުރި ކަމެއް ނޯންނާނެ. މިހާރު ވެސް ނުކުރަން، ކުރިއަށް އޮތް ތަނަކު ވެސް ނުކުރާނަން،" އޭނާ ވިދާޅުވި އެވެ.
