ޓުއަރިޒަމް ވިޔަފާރި ދަށް އަތޮޅުތަކުގައި އެ ވިޔަފާރި ފުޅާކުރުމަށް ބޭނުންވާ ވައިގެ ދަތުރުފަތުގެ މަޝްރޫއުތަކާއި ރިސޯޓްތައް ގާއިމުކޮށް ޖުމުލަ 33،000 އެނދު އެ އަތޮޅުތަކުގައި ގާއިމުކުރުމަށް ޖުމްހޫރީ ޕާޓީގެ ރިޔާސީ ކެންޑިޑޭޓު ގާސިމް އިބްރާހިމް ވައުދުވެވަޑައިގެންފި އެވެ.
ވިލާ ވިޔަފާރީގެ ވެރިޔާ ގާސިމްގެ "ވީޓީވީ" މެދުވެރިކޮށް އިއްޔެ ހަވީރު ގެނެސްދެއްވި ޕްރޮގްރާމެއްގައި މިދިޔަ 10 އަހަރު ރާއްޖޭގެ ތަރައްގީގެ މަސައްކަތްތަކާއި ޕްލޭން އޮތް ގޮތާއި ހުރި މައްސަލަތައް ހައްލު ކުރުމަށް އެ ޕާޓީގެ މެނިފެސްޓޯގައި ހިމަނުއްވާފައިވާ ކަންކަން ގެނެސްދެއްވި އެވެ.
ގާސިމްގެ އެޑްވައިޒަރު އަހުމަދު ނިހާން ވާހަކަ ދައްކަވަމުން ވިދާޅުވީ މިދިޔަ ދެ ސަރުކާރުގެ ވެސް އެންމެ ބޮޑު ފެއިލާއަކީ މުޅި ރާއްޖެއަށް ތަރައްގީގެ ކުލަވަރު ދައްކުވައިނުދެވުން ކަމަށެވެ. ރާއްޖޭގެ އެންމެ ބޮޑު ސިނާއަތް، ޓުއަރިޒަމްގެ ފައިދާ ނުލިބޭ ރަށްތަކެއް ވެސް މީގައި ހިމެނޭ ކަން ފާހަގަ ކުރެއްވި އެވެ.
ގާސިމްގެ މެނިފެސްޓޯގައި ހަތް ސަރަހައްދަކަށް ރާއްޖެ ބަހާލުމަށް ފަހު، ކޮންމެ ސަރަހައްދެއްގައި ވެސް ތަރައްގީގެ މަޝްރޫއުތައް ރޭވި ބަހާލާނެ ގޮތް އެބަ އޮތް ކަން ދެން ފާހަގަ ކުރެއްވި އެވެ. އެ ގޮތުން 33،000 އެނދު ގާއިމުކުރާއިރު އެއިން 20،000 އެނދަކީ ޓުއަރިޒަމް އެންމެ ދަށް އުތުރާއި ދެކުނުގެ ސަރަހައްދެވެ.
ޓުއަރިޒަމް އެނދު ތަރައްގީކުރަން ރާވާފައިވާ ގޮތް
- ހއ. ހދ. ށ. - 10،000 އެނދު
- ނ. ރ. - 3،000 އެނދު
- ވ. މ ފ. ދ. - 6،000 އެނދު
- ތ. ލ. - 4،000 އެނދު
- ގއ. ގދ. ޏ. ސ. - 10،000 އެނދު
ކޮންމެ އިދާރީ އަތޮޅެއްގައި ޝިޕްޔާޑަކާއި ޔޮޓް ބަނދަރެއް ތަރައްގީކުރުމަށް ވެސް ހިމަނާފައިވެ އެވެ. އަދި ކޮންމެ އަތޮޅެއްގައި އެގްރިކަލްޗާއާއި މެރިންކަލްޗާގެ ވިޔަފާރިތައް ފުޅާކުރުމަށް ވެސް ހިމަނާފައިވެ އެވެ.
މާލެ ސަރަހައްދުގައި މިހާރު ހިނގާ އުމްރާނީ ތަރައްގީގެ މަޝްރޫއުތައް މަޑުޖެހިފައިވާ ސަބަބުތައް ދެނެގަތުމުގެ މަސައްކަތް އެންމެ ފުރަތަމަ ވެސް ބެލުމަށް ހިމަނާފައިވެ އެވެ. އޭގެ ތެރެއިން މި ސަރުކާރުގެ އެންމެ ބޮޑު މަޝްރޫއު މާލެ އޭރިއާ ކަނެކްޓިވިޓީ ބްރިޖާއި ގުޅީފަޅު ޕޯޓް މަޝްރޫއު ހިމެނެ އެވެ.
