ޕްރޮގުރެސިވް ކޯލިޝަން އޮތީ ވަރަށް ބަދަހިކޮށް، ސާބިތުކަމާ އެކު ރައީސް އަބްދުالله ޔާމީންގެ ފަހަތްޕުޅުގައި ކަމުގެ ޔަގީންކަން އެ ކޯލިޝަނުގެ ލީޑާޝިޕުން ސަޕޯޓަރުންނަށް އަރުވައިފި އެވެ.
ޕީޕީއެމްގެ މައި އޮފީހުގައި މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުއިއްޒުގެ ތަރުޖަމާނު، މުހައްމަދު ތޮލާލް ވިދާޅުވީ އެ ކޯލިޝަނުގައި ރައީސް ޔާމީނުގެ އެންގެވުމާ ހިލާފަށް އެއްވެސް ކަމެއް ނުކުރައްވާ ބޭފުޅުން ތިއްބެވި ކަމަށާއި އެ ބޭފުޅުން ވެސް އުޅުއްވަނީ ޑރ. މުއިއްޒު އިންތިހާބު ކުރުމަށްޓަކައި ކެމްޕެއިން ކުރެއްވުމުގައި އަވަދި ނެތި ކަމަށެވެ.
"އަޅުގަނޑުމެންގެ ލީޑަރުޝިޕުގައި ހިމެނިވަޑައިގަންނަވާ ކޮންމެ ބޭފުޅަކު އެ ބޭފުޅަކު ނިސްބަތްވެވަޑައިގަންނަވާ ދާއިރާއަށް ޑރ. މުއިއްޒު ވަޑައިގަންނަވަންޏާ އެ ވަޑައިގަންނަވަނީ އޭގެއިތުރުން ވެސް އެކި ބޭފުޅުން އެ ގެންދަވަނީ އެކި ދިމަދިމާލުގައި މަސައްކަތް ކުރައްވަމުން،" އިދިކޮޅު ކޯލިޝަން އޮތީ ވަރަށް ބަދަހިކޮށް ކަން ފާހަގަ ކުރައްވަމުން އޭނާ ވިދާޅުވި އެވެ.
"އަޅުގަނޑުމެން މިތިބީ ވަރަށް ސާބިތުކަމާ އެއްކޮށް ރައީސް ޔާމީނުގެ ފަހަތްޕުޅުގައި,"
އެ ވާހަކަތަކަށްފަހު "އަދަދު" ނޫހުގައި ރޭ ޝާއިޢު ކޮށްފައި އޮތް ހަބަރަކަށް ހަވާލާދެއްވައި ތޮލާލް ވަނީ އެ ވާހަކަތަކަކީ ކަނޑައެޅިގެން ދޮގު ކަމަށް ތުހުމަތު ކުރައްވައި އެއީ އެންޓި ކެމްޕެއިން ކުރުން ކަމަށް ސިފަ ކުރައްވައިފަ އެވެ. އަދި އެ ވާހަކަތަކާ ގުޅިގެން ބައެއް ނޫސްވެރިންނަށް އަމާޒު ކުރައްވައި ވެސް ފާދުވިދާޅުވެފައިވެ އެވެ.
"އެ މީހުން ބޭނުންވަނީ އަޅުގަނޑުމެންގެ ތެރެ ބައިބައިކުރަން، އަޅުގަނޑުމެންގެ ލީޑަރުން ބައިބައި ކުރަން، އަޅުގަނޑުމެންގެ ބައެއް ލީޑަރުންގެ ނަން ކިޔައިގެން މިކަހަލަ ވާހަކަތައް މިދައްކަނީ،" އޭނާ ވިދާޅުވި އެވެ.
ތޮލާލް އެހެން ވިދާޅުވި ނަމަވެސް "އަދަދު" ނޫހުގައި ރޭ ޝާއިޢު ކޮށްފައިވާ ހަބަރަކީ ރައީސް ޔާމީނު އެ ވާހަކަތައް ދެއްކެވިއިރު، ކޯޓު ރޫމުގައި ތިއްބެވި ބޭފުޅުންގެ ތެރެއިން އެމަނިކުފާނާ އަރިސް ބޭފުޅުން ދެއްވި މައުލޫމާތުގެ މައްޗަށް ބިނާކޮށް ލިޔެފައިވާ ހަބަރެކެވެ. އަދި އެ ހަބަރު ޝާއިޢު ކުރުމަށްފަހު ވެސް ޕީޕީއެމްގެ ބައެއް އިސް ބޭބޭފުޅުން މި ނޫހަށް ގުޅުއްވައި އެކަން ކަށަވަރު ކޮށްދީފައިވެ އެވެ.
ރިޔާސީ އިންތިހާބަށް އެންމެ ހަފުތާއަކަށް ވެފައިވާއިރު، އިންތިހާބުގެ ފޯރި ވަނީ އިންތިހާއަށް ގަދަވެފަ އެވެ. ޕީއެންސީގެ ކެންޑިޑޭޓު، ޑރ. މުއިއްޒު މިވަގުތު ލ. އަތޮޅުގައި ކެމްޕެއިން ކުރައްވަމުން އަންނައިރު، ގުޅިފައިވާ ޕާޓީތަކުން ރައީސް ސޯލިހުގެ ދަނީ މިރޭ މާލޭގައި ބޮޑު ޖަލްސާއެއް ބޭއްވުމުގެ މަސައްކަތް ކުރަމުންނެވެ.
