މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ރާއްޖެ ޓްރާންސްޕޯޓް ލިންކް (އާރްޓީއެލް) ގެ ދަށުން ހުޅުމާލެއާއި މާލެއާއި ދެމެދު ދެމުން އަންނަ ބަހުގެ ހިދުމަތް 24 ގަޑިއިރަށް ބަދަލުކޮށްފި އެވެ.
އެމްޓީސީސީން ކުރި އިއުލާނެއްގައި ބުނީ މިއަދުން ފެށިގެން މާލެއާއި ހުޅުމާލެއާއި ދެމެދު ވެސްޓް ޕާކް ރޫޓުން ދަތުރުކުރާ ބަހުގެ ހިދުމަތް 24 ގަޑިއިރު ލިބޭނެ ކަމަށެވެ. އަދި ކޮންމެ ދުވަހަކު ވެސް ޝެޑިއުލާއި އެއްގޮތަށް ބަސް ދަތުރުތައް އޮންނާނެކަމުގެ ޔަގީންކަން ދޭ ކަމަށް ވެސް އެކުންފުނިން ބުންޏެވެ.
އެގޮތުން ދަންވަރު 00:00 އަދި 00:15 ގައި އޮންނަ ދަތުރަށް ފަހު ފަތިހު 05:15 ވަންދެން ކޮންމެ އެއް ގަޑިއިރަކުން ބަސް ދަތުރެއް އޮންނާނެ އެވެ. އަދި ފަތިހު 05:45 ގައި ވެސް ބަސް ދަތުރު ކުރާނެ އެވެ. މީގެ ކުރިން ރޭގަނޑުގެ ފަހު ދަތުރު ކުރަނީ 0:15 ގަ އެވެ.
ދަންވަރުގެ ބަސް ޝެޑިއުލް --
ޕީއެސްއެމްގެ "ރާއްޖެމިއަދު" ޕްރޮގްރާމުގައި އެމްޓީސީސީގެ ސީއީއޯ އާދަމް އާޒިމް ވިދާޅުވީ ބަހުގެ ހިދުމަތް 24 ގަޑިއިރަށް ބަދަލުކުރަން ނިންމީ އެ ދާއިރާތަކުގައި މަސައްކަތްކުރާ މުއައްޒަފުންގެ ތެރެއިން ދަންވަރު ޑިއުޓީ ނިމޭ މުއައްޒަފުންނަށް ފަސޭހަކޮށްދިނުމުގެ ގޮތުން ކަމަށެވެ.
އެމްޓީސީސީން އަންނަނީ ހުޅުމާލެއިން މާލެއަށް ދުވާލު ކޮންމެ 15 މިނެޓަކުން ބަސް ދަތުރު ކުރުމުންނެވެ. ހުޅުމާލެ އަށް ކުރާ ބަސް ދަތުރުތައް ފުޅާކުރުމުގެ ގޮތުން އެންމެ ފުރަތަމަ ޑަބަލް ޑެކް ބަސް ގެނައީ އޮކްޓޯބަރު 9، 2018 ގަ އެވެ. އޭގަ ފަހުން އެމްޓީސީސީން ވަނީ މި ހިދުމަތައް އިތުރު ބަސްތަކެއް އިތުރުކޮށްފަ އެވެ.
