ފަޅުރަށެއްގެ ގޮތުގައި އެތައް ސަތޭކަ އަހަރެއް ވުމަށް ފަހު ރ. ދުވާފަރު އަލުން އާބާދުކުރީ ރާއްޖެ އަށާއި އެހެން އެތައް ގައުމަކަށް 2004 ވަނަ އަހަރު އެރި ވަރުގަދަ ސުނާމީގައި އެންމެ ބޮޑަށް ހަލާކުވި އެއް ރަށް ކަމަށްވާ ކަނދޮޅުދޫ މީހުން ހިޖުރަކޮށްގެންނެވެ. އަތޮޅުގައި މީހުން އުޅޭ އެހެން ރަށްތަކާ މާ ދުރުގައި އޮތް ކަނދޮޅުދޫ، ދުވާފަރު މީހުންނަށް މުހިންމީ އެ ގޮތުންނެވެ.

ސުނާމީގައި ހަލާކުވުމުގެ ކުރިން ރ. އަތޮޅުގެ އެންމެ މަސްވެރި ރަށުގެ ގޮތުގައި އޮތް ކަނދޮޅުދޫގެ ރައްޔިތުން ދުވާފަރުގައި ވަޒަންވެރިވި ފަހުން ވެސް މަސް ކައްކައި ހިއްކުން ފަދަ މަސައްކަތްތައް އެރަށުގައި ކުރި އެވެ

ކަނދޮޅުދޫގެ ރަށްވެހިން މިހާރު ދިރިއުޅޭ ރ. ދުވާފަރުގައި ބޭއްވި ކެމްޕޭނު ޖަލްސާގައި މުއިއްޒު އާއި ޕީޕީއެމް/ޕީއެންސީގެ އިސް ވެރިން. -- ފޮޓޯ: ޕީޕީއެމް

ސެޕްޓެމްބަރު 9 ގައި ބާއްވާ ރިޔާސީ އިންތިހާބަށް ކެމްޕޭން ކުރަން ޕީޕީއެމް/ޕީއެންސީން ދުވާފަރުގައި ބޭއްވި ޖަލްސާގައި މުއިއްޒު ވިދާޅުވީ ކަނދޮޅުދުއަކީ ދުވާފަރަށާއި މުޅި ރ. އަތޮޅަށް ވެސް އިގުތިސާދީ ވަރަށް މުހިންމު ބޭނުމެއް ހިފިދާނެ ރަށެއް ކަމަށެވެ. އެ ރަށުގައި މަސް ރައްކާކުރާ ކޯލްޑް ސްޓޯރޭޖަކާއި ފާނަ މަސްވެރިކަމަށް ބޭނުންވާނެ ވަސީލަތްތައް ތަރައްގީކޮށްދެއްވަން އެއާ އެކު އޭނާ ވައުދުވެވަޑައިގެންނެވި އެވެ.

"މަސްކިރޭނެ ނިޒާމު، އިރާދަކުރެއްވިއްޔާ ކޯލްޑް ސްޓޯރޭޖް ނިޒާމު އެތަނުން [ކަނދޮޅުދޫން] ހަމަޖެހުނީމާ ސަރަހައްދީ ގޮތެއްގައި ރާއްޖެ ބަހައިލެވޭ އިރުގައި، ވަރަށް [ބޮޑެތި] ފަސޭހަތަކެއް އިރާދަކުރެއްވިއްޔާ ލިބިގެންދާނެ. މި ސަރަހައްދުގެ ބޭނުންކުރާ ހުރިހާ މަސްވެރިންނަށް ވެސް [އެ ފަސޭހަތައް] ލިބިގެންދާނެ،" މުއިއްޒު ވިދާޅުވި އެވެ.

އެހެން ރަށްތަކާ ދުރު، ދަތުރުކުރަން އޮތް މަގު އުނދަގޫ

މަސްވެރިކަމުގެ ސިނާއީ ރަށެއްގެ ގޮތުގައި ކަނދޮޅުދޫ ތަރައްގީ ކުރައްވަން މުއިއްޒު ވައުދުވެވަޑައިގެންނެވި އިރު އެއީ ދުވާފަރާއި ރ. އަތޮޅުގައި މީހުން އުޅޭ އެހެން ރަށްތަކާ ވަރަށް ދުރުގަައި އޮތް ރަށެކެވެ. އަތޮޅުގައި މީހުން އުޅޭ ގިނަ ރަށްތައް ހުރީ އަތޮޅުގެ އިރުމަތީ ބިތުގައި ކަމަށް ވާއިރު ކަނދޮޅުދުއަކީ އެންމެ ހުޅަނގުގައި އޮތް ރަށެކެވެ.

ރ. އަތޮޅުގެ އިރުމަތީ ބިތުގައި އޮތް ދުވާފަރާއި ކަނދޮޅުދުއާ ދެމެދު 20 ކިލޯމީޓަރުގެ ދުރުމިނެއް ހުރެ އެވެ. އިރުމަތީ ބިތުގެ ރަށްތަކާ އެރަށާ ދެމެދު ގިނަ އަދަދެއްގެ ފަރުތަކާއި ގިރިތައް ހުރުމުން އެއީ އިރުމަތިން އަންނަ އުޅަނދުފަހަރަށް ދަތުރުކުރަން ފަސޭހަ މަގެއްގައި އޮތް ރަށެއް ވެސް ނޫނެވެ.

އެއީ ރަނގަޅު ބަނދަރެއް ހެދެން ނެތް، ކަނޑާ ޖެހެންދެން ހިއްކައިލާފައިވާ ކުޑަކުޑަ ރަށެކެވެ

ރ. ދުވާފަރުގައި ބޭއްވި ޖަލްސާގައި ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވާހަކަ ދައްކަވަނީ. -- ފޮޓޯ: ޕީޕީއެމް

މިޒަމާނުގެ މަސްވެރިކަމަކީ ރަށްކައިރީ ނުވަތަ އަތޮޅު ތެރޭގައި ކުރާ ކަމަކަށް ނުވާތީ ހުޅަނގު ކަނޑަކީ ހުރިހާ ދުވަސްވަރެއްގައި މަސްވެރިކަން ކުރާ ކަނޑަކަށް ނުވެ އެވެ. މަސްދޯނިފަހަރު ދަތުރުކުރަނީ އެވަގުތަކަށް މަސްވެރިކަން އޮތް ސަރަހައްދަކަށެވެ. މި ގޮތް ގޮތުން ބަލާއިރު ކަނދޮޅުދުއަކީ ކޯލްޑް ސްޓޯރޭޖެއް ހިންގަން އެންމެ އެކަށީގެންވާ ރަށެއް ނޫނެވެ. އެކަމަކު އެއީ ދުވާފަރު މީހުންގެ އިހުސާސްތަކާ ކުޅެލާނެ ވައުދެކެވެ.

ތެދެކެވެ. މިވަގުތަށް ކެންޑިޑޭޓުންނަށް މުހިންމު ވާނީ، ވާ ވައުދަކީ ފުއްދޭނޭ ވައުދެއްތޯ ނުވަތަ ކުރަން އެ ބުނާ ކަމަކީ ހަގީގަތުގައިވެސް ކުރެވިދާނޭ ކަމެއްތޯ ބެލުމެއް ނޫނެވެ. ގިނަ ވައުދުތަކަކީ ފުއްދަން ވާ ވައުދުތަކެއް ނޫނެވެ. އެއީ ރުއްސަން ވާ ވައުދުތަކެވެ. އެ ވައުދު ފުއްދަން ކުރާންޖެހޭ ހޭދައާއި، އެކަމުގެ ހަގީގީ މަންޒަރަށް ބެލީމާ އެއީ ކުރަން ހެޔޮވާ ކަމެއް ނޫންކަން އެންމެ ރަނގަޅަށް އެނގޭނީވެސް އެ ވައުދުވާ ކެންޑިޑޭޓުންނަށެވެ. މުއިއްޒު ކަނދޮޅުދޫއަށް މި ވީ ވައުދަކީވެސް ހަމަ މިފަދަ ވައުދެކެވެ. އެކަމަކު ތަރައްގީއާ ފަސޭހަތަކަށް އެދިއެދި ތިބި މައުސޫމު ރައްޔިތުންގެ ތެރެއިން ބަޔަކު މި ވައުދު ގަބޫލުކޮށްފިނަމަ އެއީ މުއިއްޒުއަށް ލިބޭނޭ ކާމިޔާބެކެވެ.