ކަނޑައެޅިގެން އަމިއްލަ އެދުމުގައި ނުކުމެ ވޯޓު ބައިކޮށްގެން ތިމާއަށް ލިބެނީ ކޯއްޗެއްތޯ ބަލަން ބޭނުންވާ ރިޔާސީ ކެންޑިޑޭޓަކު އެބަ އުޅޭ ކަމަށާއި އޭނާއަށް ފުރުސަތު ނުދޭން ރައީސް އިބްރާހިމް މުހައްމަދު ސޯލިހު މިރޭ އެދިވަޑައިގަނެފި އެވެ.
މިރޭ ސޯޝަލް ސެންޓަރުގައި ބޭއްވި ކެމްޕެއިން ހަފުލާގައި ރައީސް ފާޑުވިދާޅުވީ ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހިމަށް ކަމަށް ބެލެވުނު ނަމަވެސް އެއްވެސް ބޭފުޅެއްގެ ނަމެއް ރައީސް ނުގެންނަވަ އެވެ. އެކަމަކު ވިދާޅުވީ، އެ ކެންޑިޑޭޓުގެ ބޭނުމަކީ "ތިމަންނައަށް ލިބެން އޮތީ ކޯއްޗެއްތޯ ބެލުން" ކަމަށެވެ.
"ކަނޑައެޅިގެން އަމިއްލަ ފައިދާ އާއި މަންފާއަކަށްޓަކައި ކުރިމަތިލައްވައިގެން އުޅޭ ބޭފުޅަކު އެބަ އުޅުއްވާ. ހަމައެކަނި ބޭނުންވަނީ އިންތިހާބު ދެ ވަނަ ބުރަކަށް ގެންދެވޭތޯ ބެލުން. ކޮންމެވެސް ބަޔަކާ އެކީ ކޯލިޝަން ހަދައިގެން ތިމަންނައަށް ލިބެން އޮތީ ކޯއްޗެއްތޯ ބެލުން. ނަމަނަމަ އެ ފުރުސަތު ނުދެއްވައްޗޭ. ނަމަނަމަ އެ ފުރުސަތު ނުދެއްވައްޗޭ،" ރައީސް ވިދާޅުވި އެވެ.
އެ ޖަލްސާގައި ވާހަކަ ދައްކަވަމުން ރައީސް ވިދާޅުވީ އެމަނިކުފާނު ވެރިކަމާ ހަވާލުވުމުގެ ކުރިން ރާއްޖޭގައި އޮތީ އަނިޔާވެރި ވެރިކަމެއް ކަމަށާއި އަނެއްކާވެސް އެމަގަށްދާން ރައްޔިތުން ބޭނުންނުވާ ކަމަށެވެ.
"އެނބުރި އަނިޔާވެރިކަމަށް ދާން އެއްވެސް މީހަކު ބޭނުމެއް ނުވޭ. ބޭނުންވަނީ އުފާވެރި އަމާންރާއްޖެއަކަށް ދާން އަޅުގަނޑުމެން ފަށާފައިވާ ދަތުރު ނިންމާލުން،" އެމަނިކުފާނު ވިދާޅުވި އެވެ.
އެމަނިކުފާނު ވިދާޅުވީ ސެޕްޓެމްބަރު 9، ގައި ބާއްވާ އިންތިހާބު އެއް ބުރުން، ބޮޑު ތަފާތަކުން ކާމިޔާބު ކުރެއްވިދާނެކަމުގެ ޔަގީންކަން އޮތް ކަމަށެވެ.
"އިރާދަކުރެއްވިއްޔާ މިފަހަރު ވާނެ އެންމެ ބޮޑު ތަފާތަކުން ރިޔާސީ އިންތިހާބެއް ކާމިޔާބު ކުރާ ފަހަރު ކަމަށް. އަޅުގަނޑަށް އެ މަންޒަރު އެބަ ފެނޭ މުޅި މާލެއިން ވެސް. އައްޑޫ ސިޓީން ވެސް. ކުޅުދުއްފުށި ސިޓީ ވެސް ބަދަލުވެއްޖެ،" ރައީސް ވިދާޅުވި އެވެ.
ރައީސް ސޯލިހުގެ އިތުރުން ރިޔާސީ އިންތިހާބުގައި ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމާއި ދަ ޑިމޮކްރެޓްސްގެ އިލްޔާސް ލަބީބާއި ޕީޕީއެމް/ޕީއެންސީގެ ޑރ. މުހައްމަދު މުއިއްޒާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން ކުރީގެ ހޯމް މިނިސްޓަރު އުމަރު ނަސީރާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި ކުރީގެ ޑެޕިއުޓީ މިނިސްޓަރު ހަސަން ޒަމީލު ވެސް ރިޔާސީ ރޭހުގައި އަމިއްލަ ގޮތުން ވާދަ ކުރައްވަ އެވެ.
