އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒުގެ ވައުދާއެއްގޮތަށް ގާނޫނުގެ ތެރެއިން ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން މިނިވަންކުރާނީ ކިހިނެއްތޯ ސުވާލުކުރުމުން އެ ސުވާލަށް ޕީޕީއެމްގެ ސެކްރެޓަރީ ޖެނެރަލް މުހައްމަދު ތޮލާލު، ސާފު ޖަވާބެއް ނުދެއްވައި ދޫކުރައްވައިފި އެވެ.
މުއިއްޒު ޕީއެންސީގެ ރިޔާސީ ޓިކެޓު ހޯއްދެވުމަށްފަހު އެންމެ ފުރަތަމަވެސް ވެވަޑައިގެންނެވި އެއް ވައުދަކީ އޭނާގެ ވެރިކަމެއްގައި ޔާމީނު މިނިވަންކުރާނެ ކަމަށް ވިދާޅުވުމެވެ. ނަމަވެސް، ޝަރުއީ ނިޒާމަށް ނުފޫޒު ފޯރުވުމެއްނެތި އެކަން ކުރައްވާނެގޮތެއް މުއިއްޒު މިހާތަނަށް ވިދާޅުވެފައެއް ނުވެ އެވެ.
ޕީޕީއެމް/ޕީއެންސީ ކޯލިޝަނުގެ ކެމްޕޭނުން މިރޭ ނޫސްވެރިންނާ ބައްދަލުކުރުމުން "އަދަދު" އިން އެ ވައުދާ ގުޅިގެން ކުރި ސުވާލަށް ޖަވާބުދެއްވަމުން ޕީޕީއެމްގެ ސެކެޓްރީ ޖެނެރަލް އަދި މުއިއްޒުގެ ތަރުޖަމާނު މުހައްމަދު ތޮލާލު ވިދާޅުވީ، ޔާމީނުގެ މައްޗަށް ޖަލު ހުކުމެއް އިއްވީ މި ސަރުކާރުން ކޯޓުތަކަށް ނުފޫޒު ފޯރުވައިގެން ކަމަށާއި އެ ހުކުމް ބާތިލްކުރަން މުއިއްޒުގެ ވެރިކަމެއްގައި ކޯޓުތަކަށް ނުފޫޒު ފޯރުވަން ނުޖެހޭނެ ކަމަށެވެ.
"ގާނޫނީ ހަމަތަކުގެ ތެރެއިން އެމަނިކުފާނު [ޔާމީނު] މިނިވަންކޮށްގެން އަޅުގަނޑުމެންނާ ހަމައަށް ގެނެސްދެއްވާނަމޭ، ޑރ. މުއިއްޒު ވަރަށް ސާފުކޮށް މިނޫން ގޮތަކަށް އެއްވެސް ސްޕީޗެއްގަ ވިދާޅުވެފައެއް ނުވެ، ރައީސް ޔާމީނެއްވެސް، ޑރ. މުއިއްޒެއްވެސް ޖުޑީޝަރީއަކަށް އަތެއް ނުބާނުއްވާނެ"
އަދި، މުއިއްޒުގެ ވެރިކަމެއްގައި ޝަރުއީ ނިޒާމު މިނިވަން ކުރައްވާނެ ކަމަށް ތޮލާލު ވިދާޅުވި ނަމަވެސް، ޔާމީނު މިނިވަންކުރާނެ ގޮތުގެ ތަފުސީލެއް ނުދެއްވެ އެވެ. ހަމައެކަނި ވިދާޅުވީ ޝަރުއީ ނިޒާމު އިސްލާހުކުރަން ޖުޑީޝަލް ސާވިސް ކޮމިޝަންގެ ކޮމްޕޮޒިޝަން ބަދަލުކޮށް ގާނޫނަށް ގެންނަންޖެހޭ ބަދަލުތައްވެސް މުއިއްޒުގެ ވެރިކަމެއްގައި ގެންނާނެ ކަމަށެވެ.
"ގާނޫނީ ހަމަތަކުގެ މަތިން [ޔާމީން] މިނިވަންކުރައްވަން އެކަމަށް ކުރައްވަން ޖެހޭ ކަންކަން [މުއިއްޒު] ކުރައްވާނެ، ގާނޫނީ ގޮތުން ބަލަންޖެހޭ އެ ބެލުންތައް ބަލުއްވާނެ، ހަމަ ޔަގީނުންވެސް ޑރ. މުއިއްޒު އެކަން ކުރައްވާނީ ގާނޫނަށް އަތް ބާނައިގެނެއް ނޫން، ގާނޫނުގެ ތެރެއިން އެކަން ކުރައްވާނީ" ތޮލާލު ވިދާޅުވި އެވެ.
އިދިކޮޅު ކޯލިޝަނުން އެންމެ ފުރަތަމަ މި އަހަރުގެ ރިޔާސީ އިންތިހާބަށް ކެންޑިޑޭޓެއްގެ ގޮތުން ދެއްކީ ޔާމީނެވެ.
ނަމަވެސް، ރިޔާސީ ޓިކެޓު އެރުވުމަށްފަހު، އެމްއެމްޕީއާރުސީ ހިޔާނާތުގެ ތެރެއިން ވ. އާރަށް ކުއްޔަށް ދިނުމުގައި ރިޝްވަތު ހިފުމާއި މަނީ ލޯންޑަރިންގެ ކުށް ސާބިތުވެ މިދިޔަ އަހަރުގެ ޑިސެމްބަރު 25 ގައި ޔާމީނުގެ މައްޗަށް ކްރިމިނަލް ކޯޓުން ވަނީ 11 އަހަރުގެ ޖަލު ހުކުމެއް ނިންމާފަ އެވެ. އެ ހުކުމް ހައި ކޯޓުގައި އިސްތިއުނާފުކުރި ނަމަވެސް އަދި މައްސަލާގައި ވަކި ގޮތެއް ނުނިންމެ އެވެ.
އެ ޖަލު ހުކުމާއެކު ޔާމީނަށް ރިޔާސީ އިންތިހާބުގައި ވާދަކުރުމުގެ ފުރުސަތު ހަނިވި އެވެ. ހުކުމް އޮތް ނަމަވެސް ޕީޕީއެމުން ޔާމީނުގެ ކެންޑިޑެސީ އީސީއަށް ހުށަހަޅާ، އީސީއިން ކެންޑިޑެސީ ބަލައިނުގަތުމުން ޔާމީނު ވަނީ އިންތިހާބީ ހައްގު ކަށަވަރުކުރުމަށް ސުޕްރީމް ކޯޓަށްވެސް ގޮސްފަ އެވެ. ނަމަވެސް ސުޕްރީމް ކޯޓުގެ ހަތް ފަނޑިޔާރުންވެސް އިއްތިފާގުވީ ޔާމީނަށް މި އިންތިހާބުގައި ވާދަނުކުރެވޭނެ ކަމަށެވެ.
