ކުރީގެ ރައީސް އަބްދު ޔާމީންގެ ވެރިކަމުގައި ގެނައި ތަރައްގީގެ އެންމެ ބޮޑު ބައިވެރިވެރިޔަކީ އޭރު ހައުސިން މިނިސްޓަރަކަށް ހުންނެވި، މިހާރު ޕީއެންސީގެ ރިޔާސީ ކެންޑިޑޭޓު މުހައްމަދު މުއިއްޒު ކަމަށް އޭނާގެ ސަޕޯޓަރުން ބުނާއިރު، ޔާމީންގެ ވެރިކަމުގައި ހިންގި އަނިޔާވެރި އަމަލުތަކާއި އަދުލުވެރި ކަމެއް ނެތި ހިންގި ކަންކަމުގައި އޭނާގެ ބައިވެރިވުން ވަރަށް ބޮޑަށް އޮތް ކަމަށް ރައީސް އިބްރާހިމް މުހައްމަދު ސޯލިހުގެ ކެމްޕޭނު ތަރުޖަމާނު އަދި ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
"އަދަދު" ނޫހުން ރޭ ގެނެސްދިން "އެތެރެފުށް" ޕްރޮގްރާމުގައި މާރިޔާ، މުއިއްޒު ސިފަ ކުރެއްވީ ޝަހުސް އޮޅުވާލައި، ސިޔާސީ ގޮތުން ކުލަ ބަދަލުކުރައްވާ އަދި އެ ވަގުތެއްގައި އަމިއްލަ މަންފާ އަށް ފަހިވާ ގޮތަށް ކަންކަން ކުރައްވާ ބޭފުޅެއްގެ ގޮތުގަ އެވެ.
އަދާލަތު ޕާޓީގެ މެމްބަރެއްގެ ގޮތުގައި ފުރަތަމަ ފެނިގެން ދިޔުމަށް ފަހު މުއިއްޒު އެ ޕާޓީ ދޫކޮށްލެއްވީ ރައީސް ޔާމީންގެ ވެރިކަމުގައި، ހައުސިން މިނިސްޓަރުގެ ސްލޮޓޫ އެމްޑީއޭއަށް ހަމަޖެއްސުމުން މިނިސްޓަރުގެ މަގާމު ދިފާއު ކުރެއްވުމަށެވެ. އެއަށް ފަހު ބަދަލުވީ ޕީޕީއެމް އަށެވެ. އެންމެ ފަހުން ރިޔާސީ ޓިކެޓު ހޯއްދެވުމަށް ޕީޕީއެމް ދޫކުރައްވައި ޕީއެންސީއާ ގުޅިވަޑައިގެންނެވި އެވެ.
"އަޅުގަނޑަށް ފެންނަނީ މުއިއްޒަކީ ހަމަ ޝަހުސު އޮޅުވާލައިގެން އޭނަގެ އަމިއްލަ ފައިދާއަށް ކުރެވެން އޮތް ކޮންމެ ކަމެއް ވިޔަސް ކުރައްވަން ނުކުމެ ހުރި މީހެއް [ކަމަށް]،" މާރިޔާ ވިދާޅުވި އެވެ.
ޔާމީންގެ ވެރިކަމުގައި ސަލްޓަން ޕާކު ތަރައްގީކޮށް، ރަސްރަނި ބަގީޗާގެ ނަމުގައި އޭރުގެ ރައީސް ޔާމީން އެ ބަގީޗާ ހުޅުވައި ދެއްވާއިރު ފަހަތުގައި އޭރުގެ ހައުސިން މިނިސްޓަރު މުއިއްޒު
ވެރިކަން ލިބިވަޑައިގެންފި ނަމަ ހިންގަވާނީ ކުރީގެ ރައީސް ޔާމީންގެ ސިޔާސަތު ކަމަށް މުއިއްޒު ވިދާޅުވާތީ، އެކަމަށް އިޝާރާތް ކުރައްވައި މާރިޔާ ވިދާޅުވީ މުއިއްޒުގެ އަމިއްލަ އެއްވެސް ވިސްނުމެއް ނެތް ކަމަށެވެ.
ޔާމީންގެ ވެރިކަމުގައި ހިންގި އަނިޔާވެރި އަމަލުތަކާއި އަދުލުވެރިކަމެއް ނެތި ކުރި ކަންކަމުގެ މަދަދުވެރިއެއްގެ ގޮތުގައި މުއިއްޒު ހުންނެވި ކަމަށް މާރިޔާ ވިދާޅުވީ އެ ވެރިކަން ނިމެންދެން ކެބިނެޓުގައި އޭނާ ހުންނެވުމާއި، އިންސާފުގެ ބޭރުން ހިންގި ބައެއް ކަންކަމަކީ މުއިއްޒު މަސްއޫލިއްޔަތުގެ ދާއިރާގައި ހިމެނޭ ކަންކަމަށް ވާތީ އެވެ.
އެމްޑީޕީގެ ވެރިކަމުގައި ފަށާފައިވާ މަޝްރޫއުތައް ވީރާނާވުމަށް ކުރީގެ ސަރުކާރުން ދޫކޮށްލި ކަމަށް މާރިޔާ ވިދާޅުވީ ބައެއް މިސާލާއެކު އެވެ. ކުޅުދުއްފުށީ ރޯހައުސްތަކާއި ނޮޅިވަރަންފަރުގައި އެހުރި ހައުސިން ޔުނިޓުތަކާއި ގުޅިފަޅު ތަރައްގީކުރުމުގެ މަޝްރޫއު ހުއްޓުވައި، އެތަނުން އޭރު ފެލްޓާއި ގޯތި ދީފައިވާ މީހުން އަތުން އެތަންތަން އަތުލީ މުއިއްޒު ހައުސިން މިނިސްޓަރަކަށް ހުންނަވައިގެން ކަމަށް މާރިޔާ ވިދާޅުވި އެވެ.
"މިއީ މުއިއްޒުގެ ހުރި ވަރަކީ،" ވިދާޅުވި އެވެ.
"އެމްޑީޕީ ސަރުކާރުން ކުރަން ފެށި ކަންކަން ވީމާ އެކަންކަން ނުކުރާން ވެގެން އެހެން ކަންކަން ކުރަމުން ދިޔައީ."
އެ ގޯތިތަކާއި ހައުސިން ޔުނިޓުތައް އަތުލުމުގެ ސަބަބުން ބަދަލުގެ ގޮތުގައި އެ ފަރާތްތަކަށް ވިނަރެހުން ފްލެޓު ދޭން ނިންމީ މި ސަރުކާރުންނެވެ.
މާލޭ ރައްޔިތުން އައްޔަން ކުރި ކުރީގެ ސިޓީ ކައުންސިލްގެ ބާރުތައް ކަނޑުވާލައި، ސިޓީ ކައުންސިލް ހިންގަމުން ދިޔަ އިމާރާތުން ކައުންސިލް ނެރެ، ކުޑަ ތަންކޮޅެއް ދިނީ ވެސް މުއިއްޒު ކަމަށް މާރިޔާ ވިދާޅުވި އެވެ.
މި ފަސް އަހަރު ހެޔޮ ވެރިކަމެއް ފެނިގެން ގޮސްފައިވާ ކަމަށާއި ރަށް ރަށުގައި ހިންގާ މަޝްރޫއުތަކުންނާއި، އާންމުންގެ ހިޔާލު ހުރި ގޮތުން ރައީސް ސޯލިހަށް އިންތިހާބު ކާމިޔާބު ކުރާނެކަން ޔަގީންވާ ކަމަށް މާރިޔާ ވިދާޅުވި އެވެ. އަދި ރައީސް ސޯލިހުގެ ކެތްތެރިކަން މީހުން ވަރަށް ބޮޑަށް ބަލައިގެންފައިވާ ކަމަށް އޭނާ ފާހަގަ ކުރެއްވެވި އެވެ.
