ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ވާދަކުރައްވާ ކެންޑިޑޭޓުން، ކެމްޕެއިނަށް ފައިސާ ހޯއްދަވާ ގޮތާއި ހަަރަދުކުރައްވާ ގޮތުގެ ތަފްސީލު ހޯދަން، އެ އިންތިހާބުގައި ވާދަކުރައްވާ އަށް ކެންޑިޑޭޓުންނަށް ހުށަހެޅުމުން އެ ތަފްސީލު ނުދެއްވައި އެންމެ ބޭފުޅުން ވެސް މައުލޫމާތު ހިފަހައްޓަވައިފި އެވެ.
ކެމްޕެއިނަށް ފައިސާ ހޯއްދަވާ ގޮތާއި ހަރަދުކުރައްވާ ގޮތުގެ ތަފްސީލު ދެއްވުން އެދި "އަދަދު" އިން އަށް ކެންޑިޑޭޓުންނަށް ވެސް ފޮނުވީ ސިޓީ އެކެވެ. އެ ތަފްސީލު ހޯދަން ބޭނުންވާ ހަ ސުވާލެއް އެ ސިޓީގައި ހިމަނާފައި ވާނެ އެވެ.
ކެމްޕެއިނަށް ހަރަދުކުރައްވާ ގޮތާ ގުޅޭ ސުވާލުތައް
- ރިޔާސީ އިންތިހާބުގެ ކެމްޕޭނަށް (އޮގަސްޓު 15 ވަނަ ދުވަހުގެ ނިޔަލަށް) ލިބިފައިވާ ފައިސާގެ އަކީ ކިހާވަރެއްތޯ؟
- ރިޔާސީ އިންތިހާބުގެ ކެމްޕޭނަށް ފައިސާ ނުހިމެނޭ ގޮތަށް ލިބިފައިވާ އެހެނިހެން އެހީތަކަކީ ކޮބައިތޯ ؟
- ކެމްޕޭނަށް ފައިސާ އާއި އެހެނިހެން ގޮތް ގޮތުން އެހީ ދީފައިވަނީ ކޮން ފަރާތްތަކަކުންތޯ ؟ (އެ ފަރާތްތަކުން ދީފައިވާ އެހީ އެނގޭ ގޮތަށް)
- އަމިއްލަ ބަޖެޓުން ކެމްޕޭނަށް މިހާތަނަށް ހޭދަކުރީ ކިހާވަރެއްތޯ ؟
- މި އޮގަސްޓު 15ގެ ނިޔަލަށް ކެމްޕޭނުގެ އެކިއެކި ކަންކަމަށް ހަރަދު ކުރެވިފައިވަނީ ކިހާ ވަރެއްތޯ؟
- ކެމްޕޭނު ހަރަދުގެ މައިގަނޑު ދާއިރާތަކާއި ހަރަދު.
އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު އަދި އަނެއް ހަ ކެންޑިޑޭޓުންނަށް ވެސް މި ސުވާލުތައް ފޮނުވުމުން އެއްވެސް ބޭފުޅަކު ޖަވާބެއް ނުދެއްވަ އެވެ.
ރައީސް ސޯލިހުގެ ކެމްޕެއިން ތަރުޖަމާނު އަދި ޑިފެންސް މިިނިސްޓަރު މާރިޔާ އަހުމަދު ދީދީ މިއަދު ބޭއްވި ނޫސްވެރިންގެ ބައްދަލުވުމުގައި ކެމްޕެއިން ހަރަދުތަކާ ބެހޭ ގޮތުން ސުވާލުކުރުމުން އޭނާ ވިދާޅުވީ އިންތިހާބުތަކާ ބެހޭ އާއްމު ގާނޫނުގައިވާ ގޮތުގެ މަތިން، މި އިންތިހާބު ނިމުމުން އެ ހަަރަދުތަކުގެ ތަފްސީލު އިލެކްޝަންސް ކޮމިޝަނަށް އެމްޑީޕީން ދޭނެ ކަމަށެވެ.
ތަފްސީލު ނުދެއްވި ނަމަވެސް މާރިޔާ ވިދާޅުވީ ރައީސް ސޯލިހުކުރައްވަނީ ސާފު ކެމްޕެއިނެއް ކަމަށެވެ.
"އަދި އަޅުގަނޑުމެންގެ ސަރުކާރުން ސިޔާސީ ހުރިހާ ބޭފުޅުންގެ އެކައުންޓްތައް އަހަރު ނިމޭ އިރު ހުށަހަޅާފައިވާނެ އަދި ރައީސް ވެސް ހަމަ ހުށަހަޅުއްވަމުން އެ ގެންދަވަނީ އޮޑިޓާ ޖެނެރަލް އަށް ވެސް އެހެންވީމާ ރައީސް ޔާމީނުގެ ވީހެން ކެމްޕޭނަށް ދިން ފައިސާއޭ ކިޔާފައި މިލިޔަނުން ޑޮލަރު އޮވެފައި، ކެމްޕޭނަށް ހަރަދު ނުކޮށްފައި އެ ނުޖެހޭނޭ ޕާޓީއަށް ދޭކަށް ކިޔާފައި އެކަހަލަ ވާހަކަތަކެއް ނުދާނެ. ހަމަ ވަރަށް ސާފު ކެމްޕެއިނެއް ރައީސް ސޯލިހު ކުރައްވަމުން އެ ގެންދަވަނީ،" މާރިޔާ ވިދާޅުވި އެވެ.
އޭނާ ވިދާޅުވީ އިންތިހާބުތަކާ ބެހޭ އާއްމު ގާނޫނުގަައިވާ ގޮތަށް، ކެމްޕޭން ނިމުމުން ހަރަދުތައް "ޑެކްލެއާ ކުރަން ޖެހޭނެ" ކަމަށެވެ. އެމްޑީޕީން 2018 ވަނަ އަހަރުގެ ރިޔާސީ އިންތިހާބުގެ ކެމްޕޭނަށް ކުރި ހަރަދު ވެސް އެގޮތަށް ހާމަކޮށްފައި ވާނެ ކަމަށް ވެސް އޭނާ ވިދާޅުވި އެވެ.
ރިޔާސީ އިންތިހާބުގެ ކެމްޕެއިނަށް ވަކި ބޭންކު އެކައުންޓެއް ހުޅުވައި ހިނގި ހަރަދުބަރަދުގެ މާލީ ބަޔާނެއް ކޮންމެ ކެންޑިޑޭޓަކު ވެސް ހުށަހަޅަންޖެހެ އެވެ. ނަމަވެސް ފައިސާގެ ދެފުށް ފެނި ބެލޭނެ ގޮތެއް ގާނޫނުގައި ބަޔާންކޮށްފައެއް ނޯވެ އެވެ.
