އާލާސްކަންފުޅާ އުޅުއްވާތީ, ރައީސް އިބްރާހިމް މުހައްމަދު ސޯލިހު އއ. އާއި އދ. އަތޮޅަށް ކުރައްވަމުން ގެންދަވާ ކެމްޕެއިން ދަތުރުތައް ކެންސަލް ކުރެއްވުމަށް އެނބުރި މާލެ ވަޑައިގަންނަވަން ނިންމަވައިފި އެވެ.
ސެޕްޓެމްބަރު 9، ގައި ބާއްވާ ރިޔާސީ އިންތިހާބުގެ ކެމްޕެއިނުގައި ރައީސް އިއްޔެ އއ. އަތޮޅުގެ ހަތް ރަށަކަށް ވަޑައިގެންނެވި އެވެ. އަށް ރަށުގެ މައްޗަށް އެކުލެވޭ އެ އަތޮޅުގެ ބާކީ އޮތް ހިމަންދުއަށް ވަޑައިގަންނަވަން ހަމަޖެހިފައި އޮތީ މިއަދު ހެނދުނެވެ. އެއަށްފަހު އޮތީ އދ. އަތޮޅަށް ވަޑައިގަންނަވާ ގޮތަށެވެ.
އެހެން ނަމަވެސް, ރައީސް އާލާސްކަންފުޅާ އުޅުއްވާތީ ދަތުރު މެދުކަނޑާލާ, މިއަދު މާލެ ވަޑައިގަންނަވާ ގޮތަށް މިހާރު ވަނީ ބަދަލުވެފަ އެވެ.
ރިޔާސީ އިންތިހާބުގެ ކެމްޕެއިން އެންމެ ފުރަތަމަ ފެއްޓެވި ކެންޑިޑޭޓަކީ ރައީސް ސޯލިހެވެ. ރާއްޖޭގެ ހުރިހާ ރަށަކަށް ދަތުރުކުރައްވާ, ރައްޔިތުންނާ ބައްދަލުކުރެއްވުމަށް އެމަނިކުފާނު ކެމްޕޭން ފެއްޓެވީ ޖުލައި 9، ގަ އެވެ. ށ. އަތޮޅުން ފެއްޓެވި ކެމްޕެއިނުގައި މިހާތަނަށް އެމަނިކުފާނު ވަނީ 11 އަތޮޅަކަށް ވަޑައިގެންފަ އެވެ.
ރައީސް ސޯލިހު ވަނީ ހއ, ށ, ނ, ވ, މ, ދ އަދި ގއގެ ހުރިހާ ރަށަކަށް ވަޑައިގެންފަ އެވެ. އަދި ކ އަތޮޅުގެ ބައެއް ރަށްތަކާއި, އއ. ހިމަނދޫ ފިޔަވައި އެ އަތޮޅުގެ ހުރިހާ ރަށްތަކާއި, ގދ. ތިނަދޫ ފިޔަވައި އެ އަތޮޅުގެ ހުރިހާ ރަށެއްގެ އިތުރުން ފުވައްމުލަކަށް ވެސް ވަޑައިގެންނެވި އެވެ.
ރައީސްގެ އިތުރުން ރިޔާސީ އިންތިހާބުގައި ވާދަ ކުރައްވަނީ ޕީޕީއެމް ޕީއެންސީގެ މުހައްމަދު މުއިއްޒާއި ޖުމްހޫރީ ޕާޓީގެ ގާސިމް އިބްރާހިމާއި ޑިމޮކްރެޓްސްގެ އިލްޔާސް ލަބީބާއި އެމްއެންޕީގެ މުހައްމަދު ނާޒިމެވެ.
އޭގެ އިތުރުން، ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި އުމަރު ނަސީރާއި ހަސަން ޒަމީލް ވެސް އެ އިންތިހާބުގައި ވާދަ ކުރައްވަ އެވެ. އެ ތިން ބޭފުޅުން ވާދަ ކުރައްވަނީ އަމިއްލަ ކެންޑިޑޭޓުންގެ ގޮތުގަ އެވެ.
